ចិនកំពុងអន្ទងចិត្តអឺរ៉ុប ខណៈអឺរ៉ុប និងអាមេរិកកំពុងឃ្នើសចិត្តគ្នារឿងផលប្រយោជន៍សេដ្ឋកិច្ច
ប្រធានាធិបតីចិនស៊ី ជីនពីង កាលពីថ្ងៃព្រហស្បតិ៍ ទី១ខែធ្នូ បានទទួលជួបមន្ត្រីជាន់ខ្ពស់សហភាពអឺរ៉ុបមួយរូបទៀតហើយ ស្របពេលដែលប្រធានាធិបតីបារាំង…
ថ្លែងទៅកាន់ប្រធានាធិបតីបារាំង លោក Emmanuel Macron ក្នុងសន្និសីទសារព័ត៌មានរួមគ្នាមួយនៅសេតវិមាន លោក Biden បាននិយាយថា៖ «នឹងមានការកែប្រែមួយចំនួនដែលយើងអាចធ្វើបាន ដែលជាមូលដ្ឋានអាចធ្វើឱ្យវាងាយស្រួលសម្រាប់ក្រុមហ៊ុននៃបណ្តាប្រទេសក្នុងតំបន់អឺរ៉ុបក្នុងការចូលរួមក្នុងទីផ្សារអាមេរិក»។
យ៉ាងណាមិញ លោក Biden មិនបានបញ្ជាក់លម្អិតអំពីអ្វីដែលអាចត្រូវបានធ្វើឡើងនោះទេ ហើយជម្រើសនៃការកែសម្រួលនីតិបញ្ញត្តិច្បាប់ គឺមានលក្ខណៈតិចតូចស្តូចស្តើងមែនទែន។ មិនតែប៉ុណ្ណោះ គេក៏រំពឹងតិចណាស់ ដែលថាវិមានកាភីតូលរបស់សហរដ្ឋអាមេរិកអាចបើកលទ្ធភាពក្នុងការជជែកដេញដោល សើរើច្បាប់នេះឡើងវិញនោះ បន្ទាប់ពីពេលថ្មីៗនេះគណបក្សសាធារណរដ្ឋបានឡើងមកដឹកនាំសភាអាមេរិកជំនួសគណបក្សប្រជាធិបតេយ្យ ក្រោយឈ្នះការបោះឆ្នោតពាក់កណ្ដាលអាណត្តិថ្មីៗនេះ។
ទោះបីជាយ៉ាងណាក៏ដោយ ប្រទេសបារាំងកំពុងជំរុញសេតវិមានឱ្យប្រើប្រាស់អំណាចនីតិប្រតិបត្តិ គឺអំណាចប្រធានាធិបតីនោះឯង ដើម្បីធ្វើយ៉ាងណាបន្ធូរបន្ថយច្បាប់កាត់បន្ថយអតិផរណា ដែលបណ្តាប្រទេសអ៊ឺរ៉ុបបានគូសបញ្ជាក់ថា ច្បាប់នេះគឺពិតជាគិតគូរលើផលិតកម្មរបស់ក្រុមហ៊ុនអាមេរិកខ្លាំងជ្រុលពេក និងដាក់សម្ពាធយ៉ាងធ្ងន់ធ្ងរលើក្រុមហ៊ុនសម្ព័ន្ធមិត្តអឺរ៉ុប។
លោក Chris Coons សមាជិកព្រឹទ្ធសភាមកពីគណបក្សប្រជាធិបតេយ្យបានថ្លែងប្រាប់ទីភ្នាក់ងារព័ត៌មានរ៉យទ័រនៅខាងក្រៅព្រឹទ្ធសភាអាមេរិក នៅថ្ងៃទី ១ ខែធ្នូនេះថា ថាតើយន្តការនោះអាចទៅជាយ៉ាងណា និងថាវានឹងមានការប្រែប្រួលផ្លូវច្បាប់ ឬច្បាប់កាត់បន្ថយអតិផរណានោះនឹងត្រូវអនុវត្តយ៉ាងណានោះ គឺលោកមិនច្បាស់នោះទេ»។
ទោះយ៉ាងណា នៅថ្ងៃដដែលនោះ សហរដ្ឋអាមេរិក និងបារាំងក៏បានប្រកាស អំពីការបង្កើតក្រុមការងាររួមគ្នារវាងសហរដ្ឋអាមេរិក និងសហភាពអឺរ៉ុប ដើម្បីដោះស្រាយជម្លោះពាណិជ្ជកម្មជុំវិញបញ្ហាថាមពលស្អាតផងដែរ។
គួរជម្រាបថា ច្បាប់ស្តីពីការកាត់បន្ថយអតិផរណា (IRA) ត្រូវបានចុះហត្ថលេខាជាផ្លូវការក្នុងខែសីហាកន្លងទៅដោយប្រធានាធិបតីអាមេរិកលោក ចូ បៃដិន ដោយក្នុងនោះ មានកញ្ចប់ថវិកាចំនួនជាង ៥២ ពាន់លានដុល្លារ ដើម្បីផ្តល់ការឧបត្ថម្ភធនដ៏សម្បើមក្នុងការផលិតឧស្សាហកម្មបន្ទះឈីបក្នុងស្រុក ដែលវាក៏នឹងជួយឧបត្ថម្ភលើការពង្រីកការស្រាវជ្រាវបច្ចេកវិទ្យានៃផលិតបន្ទះសៀគ្វីកម្រិតខ្ពស់ផងដែរ៕
