រដ្ឋបាលរបស់ប្រធានាធិបតី លោក ចូ ប៉ៃដិន បាននិងកំពុងធ្វើការ ដើម្បីបញ្ចុះបញ្ចូលសភាឱ្យអនុម័តច្បាប់នេះ ខណៈច្បាប់នេះរួមបញ្ចូលនូវទឹកប្រាក់ប្រហែល ៥២ ពាន់លានដុល្លារ ដើម្បីប្រើប្រាស់សម្រាប់ជាឧបត្ថម្ភធនដល់ការផលិត និងការស្រាវជ្រាវបន្ទះអេឡិចត្រូនិច ខណៈពេលដែល ផលិតផលនេះ កំពុងមានការខ្វះខាតខ្លាំងមែនទែនក្នុងការយកទៅប្រើប្រាស់សម្រាប់ការផលិតយានយន្ដ និងកុំព្យូទ័រជាដើម។
យ៉ាងណាមិញ ក្នុងសេចក្ដីព្រៀងច្បាប់នេះមានបទប្បញ្ញត្តិពាណិជ្ជកម្មជាច្រើន ហើយក្នុងនោះ ក៏មានការរួមចំណែកចំនួនជាង ៨ ពាន់លានដុល្លារពីសហរដ្ឋអាមេរិកដល់មូលនិធិអាកាសធាតុបៃតង ដែលបង្កើតឡើងដោយកិច្ចព្រមព្រៀងទីក្រុងប៉ារីស ដើម្បីប្រយុទ្ធប្រឆាំងនឹងការប្រែប្រួលអាកាសធាតុ និងជួយដល់ប្រទេសកំពុងអភិវឌ្ឍន៍។
ទន្ទឹមនេះ ប្រធានសភាលោកស្រី Nancy Pelosi កាលពីសប្តាហ៍មុនបាននិយាយដែរថា សេចក្ដីព្រៀងច្បាប់នេះ នឹងមានឥទ្ធិពលខ្លាំងលើ ការវិនិយោគលើបន្ទះឈីប ជំរុញការផលិត និងការស្រាវជ្រាវរបស់សហរដ្ឋអាមេរិក និងជំរុញនូវភាពនាំមុខគេក្នុងការផលិតបន្ទះឈបី ខណៈដែលបច្ចុប្បន្នអាមេរិក កំពុងប្រឈមមុខនឹងការប្រជែងកាន់តែខ្លាំងពីប្រទេសចិន។
អត្ថបទគួរអាន
សូមរំឭកថា ព្រឹទ្ធសភាអាមេរិកបានអនុម័ត ច្បាប់ស្តីពីការច្នៃប្រឌិត និងការប្រកួតប្រជែងរបស់សហរដ្ឋអាមេរិករួចហើយកាលពីខែមិថុនា ឆ្នាំមុន។ ច្បាប់នោះមានរួមបញ្ចូលទាំងថវិកា ៥២ ពាន់លានដុល្លារ ដើម្បីបង្កើនការផលិតបន្ទះអេឡិចត្រូនិចក្នុងស្រុក និងទឹកប្រាក់ ១៩០ ពាន់លានដុល្លារទៀតសម្រាប់បច្ចេកវិទ្យា និងការស្រាវជ្រាវរបស់សហរដ្ឋអាមេរិកដើម្បីប្រកួតប្រជែងជាមួយប្រទេសចិន។
ជុំវិញការប្រកួតប្រជែងលើការផលិតបន្ទះឈីបនេះដែរ ប្រទេសចិនក៏ខិតខំសម្បើមណាស់ដែរ ដោយថ្មីៗនេះ ចិនប្រកាសថា នឹងបង្កើតអង្គភាពពិសេសមួយ ដែលដើរតួជាអ្នកសម្របសម្រួលកិច្ចសហការរវាងក្រុមហ៊ុនក្នុងស្រុក និងរោងចក្រផលិតបន្ទះឈីបនៅក្រៅប្រទេសដូចជា Intel, AMD និងក្រុមហ៊ុនបរទេសមួយចំនួនទៀត ដែលសុទ្ធសឹងតែជាក្រុមហ៊ុនផលិតបន្ទះឈីបឈានមុខគេក្នុងពិភពលោក ដើម្បីជំរុញដល់ការអភិវឌ្ឍមជ្ឈមណ្ឌលកម្មវិធី Software សម្ភារៈ និងឧបករណ៍រោងចក្រផលិតនៅក្នុងប្រទេសចិន។ នេះបើយោងតាមការចុះផ្សាយដោយសារព៍ត៌មាន Nikkei Asia ៕អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
