បើតាមការចុះផ្សាយដោយសារព័ត៌មានរ៉យទ័រ ការជ្រើសរើសឯកអគ្គរដ្ឋទូតថ្មីរបស់អាមេរិកប្រចាំប្រទេសចិននាពេលនេះ គឺជាសញ្ញាមួយបង្ហាញថា រដ្ឋបាលលោកចូបៃឌិន នឹងស្វែងរកបេសកជន ដើម្បីដើរតួនាទីស្នូលបន្ថែម ក្នុងទំនាក់ទំនងរវាងប្រទេសអាមេរិក និងចិនខណៈបច្ចុប្បន្នភាគីទាំងពីរកំពុងមានទំនាក់ទំនងប្រះឆាកាន់តែខ្លាំងឡើង។
លោក Nicholas Burns ធ្លាប់បម្រើការជាអនុរដ្ឋលេខាធិការក្រោមការដឹកនាំរបស់ប្រធានាធិបតី George W. Bush និងធ្លាប់ជាប្រេសិតអាមេរិកប្រចាំនៅប្រទេសក្រិក និងអង្គការណាតូផងដែរ។ លោក Burns នឹងចូលមកកាន់តំណែងជាឯកអគ្គរដ្ឋទូតប្រចាំទីក្រុងប៉េកាំង បន្ទាប់ពីមួយទសវត្សរ៍មុន អ្នកដែលកាន់តំណែងនេះ គឺសុទ្ធសឹងជាក្រុមអតីតអ្នកនយោបាយរបស់អាមេរិក។
ប្រសិនបើព្រឹទ្ធសភាអាមេរិកយល់ព្រម លោក Burns នឹងធ្វើដំណើរទៅកាន់ប្រទេសចិនកាន់តំណែងជាឯអគ្គរដ្ឋទូត នៅគ្រាដែលប្រទេសទាំងពីរកំពុងតែមានទំនាក់ទំនងធ្លាក់ចុះដុនដាបដល់កម្រិតទាបបំផុតក្នុងរយៈពេលប៉ុន្មានទសវត្សរ៍មកនេះ ហើយលោកនឹងជំនួសតំណែង បន្ទាប់ពីលោក Terry Branstad ជាអតីតប្រសិតពិសេសរបស់លោកដូណាល់ត្រាំ ដែលបានលាលែងតាំងពីខែតុលាឆ្នាំ២០២០មក។
ប្រទេសអាមេរិក និងចិន ដែលជាមហាអំណាចលេខ១ និងលេខ២ក្នុងពិភពលោក កំពុងស្ថិតនៅក្នុងជម្លោះជាច្រើន រួមទាំងផ្នែកពាណិជ្ជកម្ម, បច្ចេកវិទ្យា, បញ្ហាមេរោគកូវីដ-១៩, បញ្ហានៅកោះតៃវ៉ាន់ និងសកម្មភាពយោធាចិននៅក្នុងដែនជម្លោះសមុទ្រចិនខាងត្បូងជាដើម។ ដោយភាគីម្ខាងៗតែងតែចោទដាក់គ្នាទៅវិញទៅមកថា មានអាកប្បកិរិយាបង្កហេតុដោយចេតនា។
អត្ថបទគួរអាន
ឯកអគ្គរដ្ឋទូតថ្មីរបស់អាមេរិករូបនេះ ក៏នឹងត្រូវឈឺក្បាលនឹងការដោះស្រាយបញ្ហាដួលរលំនៃរដ្ឋាភិបាលប្រទេសអាហ្វហ្កានីស្ថាន ដែលបច្ចុប្បន្នត្រូវបានកាន់កាប់ដោយក្រុមតាលីបង់ និងស្ថានភាពចលាចលនៅក្នុងការភៀសខ្លួនរបស់ជនជាតិអាមេរិកចេញពីទីក្រុងកាបុលផងដែរ ដោយបញ្ហានេះ កំពុងចោទជាសំណួរជាច្រើនទាក់ទងនឹងសមត្ថភាពរបស់រដ្ឋបាលលោកចូបៃឌិន ក្នុងការផ្លាស់ប្ដូរនូវការផ្ដោតការយកចិត្តទុកដាក់ទៅក្នុងតំបន់ឥណ្ឌូ-ប៉ាស៊ីហ្វិក និងការប្រឆាំងទប់ទល់នឹងប្រទេសចិន។
ចិននៅមិនទាន់ទទួលស្គាល់ជាផ្លូវការក្រុមតាលីបង់ ចំពោះការដឹកនាំប្រទេសអាហ្វហ្កានីស្ថាននៅឡើយទេ ប៉ុន្ដែ រដ្ឋមន្ត្រីការបរទេសចិនលោក វ៉ាង យី កាលពីខែមុន បានជួបជាមួយនឹងលោក Mullah Baradar ប្រធាននៃក្រុមការិយាល័យនយោបាយរបស់ក្រុមតាលីបង់រួចហើយ។ លោក វ៉ាង យី បាននិយាយថា ពិភពលោកគួរតែបង្ហាញផ្លូវ និងគាំទ្រប្រទេសអាហ្វហ្កានីស្ថាន នៅពេលដែលមានការផ្លាស់ប្ដូររដ្ឋាភិបាលថ្មី ជំនួសឲ្យការដាក់សម្ពាធបន្ថែមទៀត៕
None
