តើមានកត្តាអ្វីខ្លះធ្វើឱ្យការផលិតស្ករត្នោតកំពង់ស្ពឺ មិនអាចឆ្លើយតបនឹងការបញ្ជាទិញពីក្រៅប្រទេស?

បើតាមការលើកឡើងរបស់សមាគមនេះ ការផលិតស្ករត្នោតកំពង់ស្ពឺកាលពីឆ្នាំ២០២៣ កន្លងទៅមិនអាចបំពេញតាមតម្រូវការបញ្ជាទិញរបស់ទីផ្សារអន្តរជាតិនោះទេ។ តើមានកត្តាអ្វីខ្លះធ្វើឱ្យការផលិតស្ករត្នោតកំពង់ស្ពឺ មិនអាចឆ្លើយតបនឹងតម្រូវការបញ្ជាទិញពីខាងក្រៅ?

លោក វី វាសនា ជំនួយការសមាគមស្ករត្នោតកំពង់ស្ពឺ បានគូសបញ្ជាក់ថា បច្ចុប្បន្នស្ថានភាពទីផ្សារស្ករត្នោតកំពង់ស្ពឺ ​នៅតែមានភាពទូលំទូលាយ និងមានតម្រូវការខ្ពស់សម្រាប់នាំចេញ។ ជាក់ស្តែងនៅពេញមួយឆ្នាំ២០២៣នេះ សមាគមស្ករត្នោតកំពង់ស្ពឺ ផលិតបានស្ករត្នោតជាង១០០តោន សម្រាប់នាំចេញទៅទីផ្សារក្រៅប្រទេស និងផ្គត់ផ្គង់ទីផ្សារក្នុងស្រុក។ ក្នុងនោះស្ករសាច់ប្រមាណ៣០តោន ត្រូវបានផ្គត់ផ្គង់តម្រូវការប្រើប្រាស់ក្នុងស្រុក និងស្ករម្សៅប្រមាណ៧៣តោន ត្រូវបាននាំចេញទៅកាន់ទីផ្សារអន្តរជាតិ ខណៈតម្រូវការបញ្ជាទិញពីទីផ្សារអន្តរជាតិ មានប្រមាណ១២០តោនឯណោះ។

ការផលិតស្ករត្នោតមិនអាចឆ្លើយតបនឹងតម្រូវការបញ្ហាទិញនេះ ត្រូវបានលោក វី វាសនា អះអាងថា គឺដោយសារបញ្ហាប្រែប្រួលអាកាសធាតុបានធ្វើឱ្យទិន្នផលទឹកត្នោតធ្លាក់ចុះ ដែលធ្វើឱ្យប៉ះពាល់ដល់ដំណើរការផលិតស្ករត្នោត។ បញ្ហាមួយទៀតនោះ គឺកាប្រែប្រួលឡើងចុះនៃចំនួនអ្នកឡើងត្នោត បន្ទាប់ពីមានអ្នកខ្លះបានបោះបង់ការងារនេះដោយកត្តាអាយុច្រើន និងមួយចំនួនបានប្តូរទៅធ្វើការងារ ឬប្រកបរបរផ្សេងវិញ។ បើតាមលោក វី វាសនា តម្លៃស្ករត្នោតប្រភេទម្សៅនៅឆ្នាំនេះមានតម្លៃល្អជាងឆ្នាំមុនបន្តិច ដោយលក់ចេញបានក្នុងតម្លៃ៧,៤០០រៀលក្នុងមួយគីឡូក្រាម កើនឡើង១០០រៀល បើធៀបនឹងតម្លៃកាលពីឆ្នាំ២០២៣។

គួរជម្រាបថា សមាគមស្ករត្នោតកំពង់ស្ពឺ បច្ចុប្បន្នមានសមាជិកចំនួន១៦០គ្រួសារ ដែលជាអ្នកប្រកបរបរឡើងត្នោត និងមានក្រុមហ៊ុនជាង១០ក្រុមហ៊ុន ដែលបានប្រមូលទិញស្ករត្នោតកំពង់ស្ពឺ ដើម្បីនាំចេញទៅកាន់ទីផ្សារអន្តរជាតិ ខណៈផលិតផលសម្គាល់ភូមិសាស្ត្ររបស់ខេត្តកំពង់ស្ពឺមួយនេះត្រូវបាននាំចេញទៅលក់នៅលើទីផ្សារអន្តរជាតិចំនួន៩ប្រទេស រួមមាន ប្រទេសក្នុងសហគមន៍អឺរ៉ុប ជប៉ុន និងចិនជាដើម៕