ឯកឧត្ដមឧបនាយករដ្ឋមន្រ្តីប្រចាំការ វង្សី វិស្សុត អញ្ជើញជាអធិបតីក្នុងពិធីប្រកួតវគ្គផ្ដាច់ព្រ័ត្រ នៃគម្រោងមន្ទីរពិសោធន៍នវានុវត្តន៍ខេត្តកំពង់ធំ និងប្រគល់ជ័យលាភីដល់សហគ្រិនឆ្នើម

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត មានប្រសាសន៍ថា វត្តមានចូលរួមសារជាថ្មីម្តងទៀតរបស់រូបលោកនាពេលនេះ គឺដើម្បីបង្ហាញពីការប្តេជ្ញាចិត្តចូលរួមលើកតម្កើងសហគ្រិន​ភាព តាមរយៈការបណ្តុះ​បណ្តាលនិងបំពាក់ជំនាញ, ចំណេះ, ការច្នៃប្រឌិត, នវានុវត្តន៍ និងបច្ចេកវិទ្យាស្រាសៗ និងល្មមៗ ដល់អាជីវករ ពាណិជ្ជករ និងអ្នកផលិត ព្រមទាំងអ្នករកស៊ីក្នុងកម្រិតគ្រួសារ ក្នុងខេត្តកំពង់ធំឱ្យកាន់តែរឹងមាំឡើង និងមានឱកាសរីកចម្រើនក្លាយជាសហគ្រិនធំៗ ក៏ដូចជាដើម្បីលើកទឹកចិត្តដល់សហគ្រិនឱ្យចេះចាត់យកជំនាញ ចំណេះ និងបំណិន ដែលទទួលបានពីគម្រោងយកទៅធ្វើជាសកម្មភាពនិងការពង្រីកក្នុងអាជីវកម្ម ធុរកិច្ច និង​វិនិយោគរបស់ខ្លួនក្នុងខេត្តកំពង់ធំ ដើម្បីបង្កើន និងបង្កើតការងារ ប្រាក់ចំណូល តម្លៃបន្ថែម និងផលិតភាព ព្រមទាំងពង្រឹងសហគមន៍អាជីវកម្ម និងធុរកិច្ច (Business community) ក្នុងខេត្តកំពង់ធំឱ្យកាន់តែរីកធំធាត់។

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត ក៏មានប្រសាសន៍ផងដែរថា រូបលោកនៅតែមានជំនឿថា វិស័យឯកជននៅតែជាកម្លាំងចលករនៃការអភិវឌ្ឍសេដ្ឋកិច្ចជាតិរយៈពេលវែង ព្រោះថាវិស័យឯកជនគឺជាអ្នកដើរ​តួនាទីបង្កើតទ្រព្យ ការងារ និងតម្លៃបន្ថែម ក្នុងសេដ្ឋកិច្ចជាតិ ដោយមានសហគ្រិនជាអ្នកដឹកមុខ ឬជា​ក្បាល​ម៉ាស៊ីន ដែល​អាច​ហៅ​បាន​ថា ជាមេទ័ពក្នុងវិស័យឯកជន។ ដូច្នេះ យើងចាំបាច់ត្រូវពង្រឹងនិងអភិវឌ្ឍសហគ្រិនភាពនេះ ដើម្បី​បង្កើត​ការងារ មុខរបរ និងប្រាក់ចំណូលជូនដល់កម្លាំងពលកម្មសកម្មកម្ពុជាប្រមាណ ៩,៥លាននាក់ ក្រៅពីកម្លាំងពលកម្ម​ក្នុងវិស័យ​សាធារណៈ​ដែលជាមន្រ្តីរាជការនិងកងកម្លាំងប្រដាប់អាវុធដែលមានប្រមាណ ០,៥លាននាក់ នៅពេល​​បច្ចុប្បន្ន។​ ឯកឧត្តមឧបនាយករដ្ឋមន្រ្តីប្រចាំការ បានបន្តថា ដោយឈរលើទស្សនវិជ្ជានេះ ទើបបានជាក្នុងពេលរូបលោកបំពេញការងារកន្លងមក រូបលោកបានជំរុញឱ្យមានការកសាងនូវស្ថាប័នជាច្រើន ក្នុងនោះជាពិសេសមានស្ថាប័នពីរ គឺសហគ្រិន​ខ្មែរ (KE) និងមូលនិធិអភិវឌ្ឍន៍ជំនាញ (SDF) ក្នុងគោលដៅបង្កើនសមត្ថភាពសហគ្រិន និយោជក បង្កើនសមត្ថភាពពលករ និងកម្មករនិយោជិតរបស់កម្ពុជា ដោយម្ខាងឱ្យមានជំនាញអាចរកប្រាក់ចំណូលខ្ពស់បាន ដើម្បីលើកស្ទួយជីវភាពគ្រួសារ និងម្ខាងទៀត ជំនាញនេះធ្វើឱ្យមានផលិតភាពការងារ សំដៅរួមចំណែកបង្កើនផលិតភាពសេដ្ឋកិច្ចជាតិ​ឱ្យកាន់តែខ្ពស់។

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានបន្តថា អនាគតរបស់ប្រទេសយើងទៅថ្ងៃមុន គឺមានតែពឹងផ្អែកលើផលិតភាពនេះឯង ព្រោះផលិតភាពគឺជាកត្តាកំណត់នៃការទ្រទ្រង់កំណើនសេដ្ឋកិច្ចរយៈពេលវែង ដោយសារប្រភពទ្រទ្រង់កំណើន (Factor of Growth) ២ ទៀត គឺកត្តាពលកម្ម (Labor Participation) និងកត្តាការវិនិយោគទុន (Capital Accumulation) ដែលធ្លាប់ទ្រទ្រង់កំណើនសេដ្ឋកិច្ចក្នុងរយៈពេលជាង៣០ឆ្នាំមកនេះ មានលំហកាន់តែតូចទៅៗ។ ដូច្នេះ យើងចាំបាច់ត្រូវកសាងប្រព័ន្ធអេកូឡូស៊ីសម្រាប់សហគ្រិនភាពឱ្យរស់រវើក ទាំងក្នុងក្របខ័ណ្ឌទូទាំងប្រទេស ក៏ដូចជា​ក្នុងខេត្តកំពង់ធំរបស់យើង ដើម្បីធ្វើឱ្យសហគ្រិនរឹងមាំ និងមានឱកាសចូលរួមចំណែកជំរុញសេដ្ឋកិច្ចឱ្យកាន់តែរីកលូតលាស់ និងម្យ៉ាងទៀត ទាល់តែប្រជាជន ពិសេសអ្នករកស៊ី ដែលជា​សហគ្រិនជាក្បាលម៉ាស៊ីននេះឯងរឹងមាំ និងអាចរកស៊ីមានបាន ទើបប្រទេសជាតិយើងអាចរឹងមាំនិងមានបានដែរ។ ឯកឧត្តមឧបនាយករដ្ឋមន្រ្តីប្រចាំការបានគូសបញ្ជាក់ថា កិច្ចការនេះ ក៏ជាជ្រុងមួយនៃការពង្រឹងភាពជាម្ចាស់​របស់​កម្ពុជា ដែលធ្វើឱ្យប្រទេសយើងទៅថ្ងៃក្រោយ​អាចជាប្រទេសដែលអាចពឹងខ្លួនឯងបាន គឺធ្វើឱ្យប្រជាជនយើងពូកែ, ឆ្លាត, ចេះដឹង, ចេះរកស៊ី, ចេះផលិត, ចេះបង្កើតទ្រព្យ និងបង្កើតតម្លៃបន្ថែម ហើយរកស៊ីដោយគោរពច្បាប់ និងស្ដង់ដាសង្គមនិងបរិស្ថាននានា។

ក្នុង​ឱកាសនោះដែរ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត ក៏បានវាយតម្លៃខ្ពស់ចំពោះ KE, SDF, ឧទ្យាននវានុវត្តន៍សង្គមអង្គរ(ASIP) និងរដ្ឋបាលខេត្តកំពង់ធំ ព្រមទាំង​ភាគីពាក់ព័ន្ធផ្សេងទៀត ដែលបានផ្តល់ការគាំទ្រដល់ «គម្រោងមន្ទីរពិសោធន៍នវានុវត្តន៍ខេត្តកំពង់ធំ» ដើម្បីរួមចំណែកឈានទៅសម្រេចចក្ខុវិស័យក្នុងការ​ប្រែក្លាយ ​«ខេត្តកំពង់ធំ ឱ្យទៅជាប្រព័ន្ធ​អេកូឡូស៊ីនវានុវត្តន៍ដ៏រស់រវើកមួយ»។ ឯកឧត្តមឧបនាយករដ្ឋមន្រ្តីប្រចាំការ ក៏បានលើកទឹកចិត្តដល់គម្រោងឱ្យបញ្ចូលនូវជំនាញទន់ (Soft skill) បន្ថែមទៀត ដោយរួមទាំងគំនិតនវានុវត្តន៍ក្នុង​អាជីវកម្មគួបផ្សំនឹងបច្ចេកវិទ្យាស្រាលៗ និងល្មមៗ ដែលងាយទទួលយកបានដោយសហគ្រិន, ម៉ូដែលធុរកិច្ច (Business Model) និងថ្នាលបណ្ដុះសហគ្រិនភាព ដើម្បីលើកកម្ពស់ការច្នៃប្រឌិត និងនវានុវត្តន៍ឱ្យបានកាន់តែច្រើន និងដើម្បីបង្កើតជាសហគមន៍ធុរកិច្ច (Business community) មួយ ដែលជាប្រព័ន្ធអេកូឡូស៊ី​កាន់តែពេញលេញ និងធន់ ឱ្យស្ដែងចេញជាសកម្មភាពអាជីវកម្ម សកម្មភាព​​ធុរកិច្ច និងសកម្មភាពវិនិយោគ​នៅក្នុងមូលដ្ឋាន ដើម្បីឈានឆ្ពោះទៅសម្រេចនូវចក្ខុវិស័យ​របស់ សម្តេចធិបតី ហ៊ុន ម៉ាណែត «លែងឱ្យខេត្តកំពង់ធំជាកន្លែងដែលទៅហួសមកហួស ទាំងការវិនិយោគ ពាណិជ្ជកម្ម ទេសចរណ៍ និងគម្រោងអភិវឌ្ឍ»។

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត ក៏បានផ្ដាំផ្ញើ និងលើកទឹកចិត្តដល់សហគ្រិនទាំងអស់ក្នុងខេត្តកំពង់ធំ ឱ្យបន្តអភិវឌ្ឍសមត្ថភាពជាប់ជាប្រចាំ និងត្រូវចេះមើលឱកាស ចេះស្គាល់ឱកាស និងចេះប្រើឱកាស និងសក្តានុពលរបស់ខេត្តកំពង់ធំក្នុងវិស័យកសិកម្ម និងកសិ-ឧស្សាហកម្ម ពិសេសស្រូវ ស្វាយចន្ទី ដំឡូងមី និងការចិញ្ចឹមសត្វនិងត្រី ដើម្បីបង្កើតមុខរបរនិងវិនិយោគលើអ្វីដែលអាចរីកទៅមុខបាន និងម្ខាងពាក់ព័ន្ធ​ទៅនឹងអ្វីដែលជាទំនាក់ទំនង Spill Over Effect នៃ Business ឬការវិនិយោគ​​ផ្សេងៗរបស់អ្នកមកពីខាងក្រៅ ទាំងបរទេសក្តី និងក្នុងស្រុកក្តី ពិសេសគម្រោងវិនិយោគធំៗ ទាំងសាធារណៈ និងឯកជន ដូចជាគម្រោងចិញ្ចឹមស្វា, គម្រោងចិញ្ចឹមគជ់ខ្យង់, គម្រោងអភិវឌ្ឍសួនឧស្សាហកម្ម​ស្វាយចន្ទី, គម្រោងតំបន់សេដ្ឋកិច្ចពិសេស និង​​​គម្រោងអភិវឌ្ឍវិស័យទេសចរណ៍តំបន់ប្រាសាទសំបូរព្រៃគុកនិងតំបន់ជុំវិញភ្ជាប់ទៅ​ក្រុងស្ទឹងសែនជាដើម និងម្ខាងទៀត ដើម្បីពង្រីកអ្វីដែលជាមូលដ្ឋានរបស់ខ្លួន ដែលគេហៅ Backward Linkage និង SME Clustering។​​

ចុងក្រោយ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានផ្តល់ការណែនាំថា រដ្ឋបាលខេត្តកំពង់ធំ និងសមត្ថកិច្ចពាក់ព័ន្ធ មានភារកិច្ចផង និងកាតព្វកិច្ចផង ក្នុងការផ្តល់ការគាំទ្រដល់អ្នករកស៊ី និងអ្នកធ្វើអាជីវកម្មនៅក្នុងមូលដ្ឋាន ដើម្បីរួមគ្នាជាមួយនឹងក្រុមការងារ ក្នុងការបង្កើតបានជាប្រព័ន្ធមួយ ប្រកបដោយសហថាមពល ដើម្បីរុញសេដ្ឋកិច្ចខេត្តកំពង់ធំឱ្យរីកចម្រើនខ្លាំងក្លា និងអាចក្លាយជាចន្ទល់សេដ្ឋកិច្ចរបស់ប្រទេសតែម្តង ក្នុងរយៈពេល​ពី១០ ទៅ ២០ឆ្នាំទៀត ដែលនេះហើយ គឺជាវឌ្ឍនភាព និងវិបុលភាពនៃខេត្តកំពង់ធំរបស់យើង។