ផ្សារទំនើបលក់បោះដុំទំនិញដ៏ធំមួយនេះ ជាការបោះទុនវិនិយោគរួមគ្នារវាងក្រុមហ៊ុន អិល វ៉ាយ ភី គ្រុប (LYP Group) ដែលគ្រប់គ្រងដោយមហាសេដ្ឋីស្រុកខ្មែរ គឺអ្នកឧកញ៉ា លី យ៉ុងផាត់ ដែលកាន់កាប់ភាគហ៊ុនចំនួន ៣០ភាគរយ និងក្រុមហ៊ុន ស៊ី.ភី. គ្រុប ដែលគ្រប់គ្រងកាន់កាប់ដោយមហាសេដ្ឋីលេខ១ របស់ប្រទេសថៃ គឺលោក ថានីន ជារ៉ាវ៉ានុន (Dhanin Chearavanont) ដែលកាន់កាប់ភាគហ៊ុនចំនួន ៧០ភាគរយ។
ផ្សារទំនើប Makro នេះ សាងសង់លើផ្ទៃដីប្រមាណជាង ៥ហិកតា ដែលមានកម្ពស់២ជាន់ នៅក្នុងតំបន់អភិវឌ្ឍន៍ទីក្រុងពោងពាយរបស់អ្នកឧកញ៉ា លី យ៉ុងផាត់ ស្ថិតក្នុងសង្កាត់ភ្នំពេញថ្មី ខណ្ឌសែនសុខ នៅក្បែរគ្នានឹង ផ្សារទំនើប AEON ទី២ របស់ជប៉ុនដែលកំពុងសាងសង់ផងដែរ។
👉 គួរអាន ! តើការចូលមកនៃផ្សារទំនិញខ្នាតយក្សរបស់ថៃ នឹងចំណេញអ្វីខ្លះដល់កម្ពុជា?
លោកស្រី ស៊ុឆាដា អ៊ីធីចារូគូល អគ្គនាយកក្រុមហ៊ុន ស៊ីយ៉ាម ម៉ាក្រូ ចំកាត់ មហាជន បានឲ្យដឹងក្នុងពិធីសែនក្រុងពាលី បញ្ចុះបឋមសិលាសាងសង់ផ្សារម៉ាក្រូនៅកម្ពុជា ថា Makro គឺជាផ្សារទំនើបស្តុកលក់ទំនិញបោះដុំរាប់ពាន់មុខធំជាងគេបង្អស់របស់ថៃ គ្រោងនឹងបើកដំណើរការអាជីវកម្មជាផ្លូវការរបស់ខ្លួននៅកម្ពុជាក្នុងខែធ្នូ ឆ្នាំ២០១៧ ខាងមុខនេះហើយ។
ផ្សារ Makro នឹងដាក់លក់បោះដុំទំនិញជាង ១ម៉ឺន៥ពាន់មុខ។
(រូបភាព៖ FB.com/makrocambodia)
លោកស្រីជឿជាក់ថា ផ្សារម៉ាក្រូ នឹងដើរតួជាអ្នកផ្គត់ផ្គង់ផលិតផលម្ហូបអាហារដ៏ធំ និងសំខាន់ជាងគេមួយសម្រាប់វិស័យលក់រាយនៅកម្ពុជា។
Makro គឺជាក្រុមហ៊ុនមួយដែលស្ថិតក្នុងចំណោមក្រុមហ៊ុនបុត្រសម្ព័ន្ធរបស់ក្រុមហ៊ុន ស៊ី.ភី. គ្រុប ដែលជាក្រុមហ៊ុនកសិពាណិជ្ជកម្មធំជាងគេរបស់ថៃ ដូចគ្នាទៅនឹងក្រុមហ៊ុន ស៊ី.ភី. ខេមបូឌា ដែលជាក្រុមហ៊ុនផលិតចំណីសត្វធំជាងគេនៅក្នុងប្រទេសកម្ពុជា។
បច្ចុប្បន្ន ក្រុមហ៊ុនផ្សារទំនើប Makro កំពុងតែជ្រើសរើសបុគ្គលិកចំនួនជាង ២០០នាក់ សម្រាប់បម្រើការងារនៅក្នុងផ្សារទំនើបលក់ទំនិញបោះដុំដ៏ធំមួយនេះ។
សូមបញ្ជាក់ថា បើតាមគម្រោងនៅក្នុងឆ្នាំនេះ មានក្រុមហ៊ុនផ្សារទំនើបធំៗចំនួនពីរដែលមកពីប្រទេសថៃ នឹងបោះទីតាំងប្រតិបត្តិការអាជីវកម្មនៅកម្ពុជា។ ជាក់ស្តែងថ្មីៗនេះ សារព័ត៌មានអេឡិចត្រូនិក ខេមបូណូមីស បានចុះផ្សាយថា ក្រុមហ៊ុនសិនត្រាល់ គ្រុប គឺជាក្រុមហ៊ុនលក់រាយដ៏ធំជាងគេបំផុតនៅប្រទេសថៃ ក៏គ្រោងនឹងបោះទីតាំងវិនិយោគរបស់ខ្លួនជាលើកដំបូងនៅប្រទេសកម្ពុជា ដែរ។
👉 ដឹងទីតាំងដែលគេគ្រោងសាងសង់ផ្សារ សិនត្រាល់ មកពីថៃហើយ !
អ្នកឧកញ៉ា លី យ៉ុងផាត់ អគ្គនាយកក្រុមហ៊ុន LYP GROUP ចូលរួមពិធីបញ្ចុះបឋមសិលាសាងសង់ផ្សារ Makro។
ផ្សារទំនើប សិនត្រាល់ នេះ មានទីតាំងស្ថិតនៅតាមបណ្តោយមហាវិថីសហព័ន្ធរុស្ស៉ី ម្តុំស្ពានអាកាសតិចណូ ជួរបណ្តោយជាមួយនឹងផ្សារទំនើបដ៏ធំមួយ គឺផ្សារទំនើប ផាសិនម៉ល មកពីប្រទេសម៉ាឡេស៊ី ដែលវិនិយោគសាងសង់ដោយឯកឧត្តមឧកញ៉ា អូសស្មា ហាសាន់ ដែលកំពុងតែសាងសង់ជិតរួចរាល់ហើយ។
ជារៀងរាល់ឆ្នាំ ថៃបានធ្វើការជំរុញទំនាក់ទំនងពាណិជ្ជកម្មជាមួយកម្ពុជា តាមរយៈការនាំចូលទំនិញជាច្រើនប្រភេទមកដាក់តាំងលក់នៅក្នុងពិព័រណ៍ពាណិជ្ជកម្មថៃនៅកម្ពុជា
👉 ផលិតផលថៃបន្តវាយលុកក្នុងទីផ្សារកម្ពុជា
តាមការសង្កេតមើល ពលរដ្ឋខ្មែរមួយចំនួនតែងតែនិយមចូលចិត្តប្រើប្រាស់ផលិតផលថៃ ដោយបានអះអាងថា ផលិតផលថៃមានគុណភាពល្អ និងមានតម្លៃសមរម្យ។
កម្ពុជាគឺជាទីផ្សារសំខាន់សម្រាប់ការនាំចេញរបស់ថៃ។ ហើយកម្ពុជាមានតម្រូវការខ្ពស់លើទំនិញឧស្សាហកម្ម និងទំនិញមូលដ្ឋានផ្សេងទៀត៕
👉 គួរអាន ! ថៅកែហាង Brown Coffee បង្ហើបពីរូបមន្ដ៤យ៉ាងដើម្បីជោគជ័យ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
