រដ្ឋាភិបាលអ៊ីស្រាអែលបង្កើនកូតាទទួលនិស្សិតកម្ពុជាទៅរៀននៅអ៊ីស្រាអែលដល់២៥០នាក់ក្នុងមួយឆ្នាំ

នៅក្នុងជំនួបពិភាក្សាការងារជាមួយលោកជំទាវ Eynat Shlein នាយកប្រតិបត្តិអង្គការ MASHAV និងជាអគ្គនាយករងនៃក្រសួងការបរទេសនៃរដ្ឋអ៊ីស្រាអែល នៅថ្ងៃទី ២៩ ខែសីហា ឆ្នាំ ២០២២ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងថា អ៊ីស្រាអែល បានចូលរួមយ៉ាងសកម្មក្នុងការអភិវឌ្ឍធនធានមនុស្សរបស់កម្ពុជា ជាពិសេសតាមរយ:ការផ្តល់ឱកាសឲ្យនិស្សិតដែលរៀនជំនាញផ្នែកកសិកម្មបានមកធ្វើកម្មសិក្សានៅតាមបណ្តាក្រុមហ៊ុន និងកសិដ្ឋានក្នុងប្រទេសអ៊ីស្រាអែលតាំងពីឆ្នាំ២០០៨ រហូតមកទប់បច្ចុប្បន្នមានរយ:ពេល ១៤ឆ្នាំហើយជាពិសេសថ្មីៗនេះ រដ្ឋាភិបាលអ៊ីស្រាអែលបានឯកភាពតាមសំណើរបស់ក្រសួងកសិកម្ម រុក្ខាប្រមាញ់ និងនេសាទបង្កើនកូតានិស្សិតថែមក្នុង១ឆ្នាំ ៥០នាក់បន្ថែមទៀតសរុប ២៥០នាក់ក្នុងមួយឆ្នាំ។

លោកជំទាវ Eynat Shlein នាយកប្រតិបត្តិអង្គការ MASHAV និងជាអគ្គនាយករងនៃក្រសួងការបរទេសនៃរដ្ឋអ៊ីស្រាអែល លើកឡើងថា ប៉ុន្មានឆ្នាំកន្លងមកនេះ រដ្ឋាភិបាលអ៊ីស្រាអែលបានកាត់បន្ថយចំនួនសិស្សពីបណ្តាប្រទេសនានា លើកលែងតែកម្ពុជាដែលត្រូវបានបង្កើនទៅវិញ។ ដើម្បីឲ្យកិច្ចសហប្រតិបត្តិការរវាងប្រទេសទាំងពីរកាន់តែរីកថែមមួយកម្រិតទៀត លោកជំទាវបានលើកឡើងថា ប្រទេសទាំងពីរគួររួមគ្នារៀបចំគម្រោងពិនិត្យ ផ្តល់ប្រឹក្សាយោបល់ និងតាមដានសកម្មភាព ភាពជោគជ័យ និងបញ្ហារបស់និស្សិត ដែលបានបញ្ចប់ការធ្វើកម្មសិក្សានៅអ៊ីស្រាអែល។

ជាមួយគ្នានេះដែរ ឯកឧត្តម Oded Forer រដ្ឋមន្រ្តីក្រសួងកសិកម្ម និងអភិវឌ្ឍជនបទនៃរដ្ឋអ៊ីស្រាអែល បានគូសបញ្ជាក់ថា បច្ចុប្បន្ននិស្សិតកម្ពុជាដែលបានមកសិក្សានៅអ៊ីស្រាអែល បាននិងកំពុងចូលរួមចំណែកយ៉ាងសកម្មក្នុងការរួមចំណែក និងចែករំលែកបទពិសោធន៍ល្អៗទាក់ទងបច្ចេកវិទ្យាកសិកម្មទំនើបៗ ដែលទទួលបានពីប្រទេសអ៊ីស្រាអែលដើម្បីអភិវឌ្ឍន៍វិស័យនេះឲ្យកាន់តែរីកចម្រើនស្របតាមបរិបទនៃកំណើនសេដ្ឋកិច្ចកម្ពុជា។ តាមរយ:កិច្ចសហប្រតិបត្តិការរវាងប្រទេសទាំងពីរ អនុវិស័យសាកវប្បកម្មកម្ពុជាបាននិងកំពុងអភិវឌ្ឍគួរឲ្យកត់សម្គាល់ ដូចជា ផ្ទះសំណាញ់បាននិងកំពុងរីកដុះដាលនៅទូទាំងប្រទេស ប្រព័ន្ធដំណក់ទឹកសម្រាប់ដំណាំ និងបន្លែ បាននិងកំពុងអនុវត្តយ៉ាងទូលំទូលាយ។

ទន្ទឹមនេះ លោកឧកញ៉ា ហ៊ុន ឡាក់ អគ្គនាយកក្រុមហ៊ុន រីច ហ្វាម អេស៊ា តំណាងឲ្យវិស័យឯកជន ដែលបានចូលរួមក្នុងការសិក្សាស្វែងយល់រៀនសូត្រពីជំនាញបច្ចេកវិទ្យាកសិកម្មនៅអ៊ីស្រាអែលបានគូសបញ្ជាក់ថា អ៊ីស្រាអែលជាប្រទេសមួយដែលមានការរីកចម្រើនខ្លាំងក្នុងការធ្វើទំនើបកម្មកសិកម្ម បច្ចេកទេសជំនាញកសិកម្មតាមបែបវៃឆ្លាត ហើយលោកឧកញ៉ា មានក្តីសង្ឃឹមថា បន្ទាប់ពីបាននាំយកនូវជំនាញបច្ចេកទេសថ្មីក្នុងការធ្វើទំនើបកម្មកសិកម្ម បច្ចេកទេសជំនាញតាមបែបវៃឆ្លាតពីអ៊ីស្រាអែលមកកម្ពុជា លោកឧកញ៉ាសង្ឃឹមថា វិស័យកសិកម្មកម្ពុជានៅពេលខាងមុខ និងមានការអភិវឌ្ឍកាន់តែច្រើនឡើងផងដែរដែរ។

សូមបញ្ជាក់ថា និស្សិតដែលបានទៅសិក្សាជំនាញកសិកម្មបានទៅធ្វើកម្មសិក្សានៅតាមបណ្តាក្រុមហ៊ុន និងកសិដ្ឋានក្នុងប្រទេសអ៊ីស្រាអែលប្រទេសអ៊ីស្រាអែលតាំងពីឆ្នាំ២០០៨ រហូតមកទប់បច្ចុប្បន្នមានរយ:ពេល ១៤ឆ្នាំហើយ សរុបមាននិស្សិតចំនួន ១ ៤៦៩នាក់៕