ប្រទេសរុស្ស៊ីកំពុងប្រឈមមុខនឹងការដាក់ទណ្ឌកម្មពីអន្តរជាតិកាន់តែច្រើនឡើងៗ ពិសេសគឺទណ្ឌកម្មពីបណ្តាប្រទេសលោកខាងលិចក្នុងគោលបំណងឃាំងខ្ទប់រុស្ស៊ីឲ្យនៅឱកោ ផ្តាច់ចេញពីសេដ្ឋកិច្ចពិភពលោក ដោយថ្មីៗនេះ រុស្ស៊ីក៏ទើបតែត្រូវបានបិទខ្ទប់លែងឲ្យប្រើប្រាស់ប្រព័ន្ធទូទាត់ប្រាក់សកលោក SWIFT និងការរឹតបន្តឹងលើប្រតិបត្តិការធនាគារកណ្តាលរបស់ខ្លួនថែមទៀតផង។
ប្រភព័ត៌មានពីរ៉យទ័រ បានគូសបញ្ជាក់ថា លទ្ធភាពដែលអាចនឹងដករុស្ស៊ីចេញពី G20 គឺមិនអាចធ្វើបានទេ ដោយសារតែវានឹងមានការបោះឆ្នោតវេតូ (ជំទាស់) ពីប្រទេសចិន ឥណ្ឌា អារ៉ាប់ប៊ីសាអ៊ូឌីត និងប្រទេសមួយចំនួនទៀត ដែលជាសមាជិក G20។
ទីប្រឹក្សាសន្តិសុខជាតិអាមេរិកលោក Jake Sullivan បានប្រាប់អ្នកយកព័ត៌មាននៅសេតវិមានកាលពីថ្ងៃអង្គារថា លោកជឿថាវាមិនមែនជាបញ្ហាធម្មតាសម្រាប់រុស្ស៊ីទេ នៅក្នុងការផ្តាច់ទំនាក់ទំនងពីទីផ្សារសេដ្ឋកិច្ចអន្តរជាតិ។ លោកបានអះអាងថា ទោះបីជាយ៉ាងណាក៏ដោយ សហរដ្ឋអាមេរិកគ្រោងនឹងពិគ្រោះជាមួយសម្ព័ន្ធមិត្តរបស់ខ្លួន មុនពេលមានការប្រកាសពីសេចក្តីសម្រេចណាមួយផ្សេងទៀតដែលត្រូវធ្វើឡើងជាបន្តបន្ទាប់នាពេលខាងមុខ។
អត្ថបទគួរអាន
ប្រភពពីសហភាពអឺរ៉ុបបានបញ្ជាក់ដែរថា នឹងមានកិច្ចប្រជុំ អំពីសមាជិកភាពរបស់រុស្ស៊ី នៅក្នុងកិច្ចប្រជុំនៃក្រុមប្រទេស G20 នាពេលខាងមុខ ដែលប្រធានដឹកនាំការប្រជុំក្នុងឆ្នាំនេះ គឺត្រូវដឹកនាំដោយប្រទេសឥណ្ឌូនេស៊ី។
គួរបញ្ចាក់ថា កិច្ចប្រជុំក្នុងឆ្នាំនេះ គឺពិតជាស្មុកស្មាញមែនទែន សម្រាប់ប្រទេសឥណ្ឌូនេស៊ីក្នុងការសម្របសម្រួល ចំពោះវត្តមានរបស់រុស្ស៊ីនៅក្នុងកិច្ចប្រជុំនាពេលខាងមុខនេះ ប្រសិនបើរុស្ស៊ី ពិតជានឹងចូលរួមក្នុងកិច្ចប្រជុំនេះដែរ។ ប្រភពព័ត៌មានរ៉យទ័រថ្មីៗនេះបានស្រង់សម្តីរបស់ឯកអគ្គរដ្ឋទូតរុស្ស៊ីប្រចាំនៅឥណ្ឌូនេស៊ីបានឲ្យដឹងថា ប្រធានាធិបតីរុស្ស៊ីលោកពូទី ក៏មានផែនការនឹងចូលរួមក្នុងកិច្ចប្រជុំ G20នៅឥណ្ឌូនេស៊ីនាពេលខាងមុខនេះដែរ។
យ៉ាងណាមិញ មន្ត្រីនៃប្រទេសសមាជិក G20 នៅអាស៊ីបានលើកឡើងថា វាមិនអាចទៅរួចទេក្នុងការដករុស្ស៊ីចេញពី G20 លុះត្រាតែទីក្រុងម៉ូស្គូធ្វើការសម្រេចចិត្តសុខចិត្តដើរចេញដោយខ្លួនឯង។
ក្រុមប្រទេសG20 ក៏មានសមាជិកនៃក្រុមប្រទេសរីកចម្រើនទាំង៧ (G7)ផងដែរ រួមមានអាមេរិក កាណាដា អង់គ្លេស បារាំង អាល្លឺម៉ង់ អ៊ីតាលី និងជប៉ុន រួមទាំងប្រទេសធំៗចំនួន១៣ផ្សេងទៀត៕
អត្ថបទ វ៉ាន់ ស្រីរ័ត្ន
None
