លោក ហ្វា សាលី ប្រធានសម្ព័ន្ធសហជីពជាតិ បានលើកឡើថា ការបញ្ជាទិញ និងការនាំចេញផលិតផលវាយនភណ្ឌ សម្លៀកបំពាក់ ស្បែងជើង កាបូប និងផលិតផលធ្វើដំណើររបស់កម្ពុជា នៅដើមឆ្នាំ២០២៥ មានកំណើនគួរឱ្យកត់សម្គាល់បើធៀបនឹងឆ្នាំមុន។ កំណើននេះ ត្រូវបានជំរុញដោយសារឥទ្ធិពលនៃបញ្ហាចលាចលក្នុងប្រទេសមួយចំនួន និងការដំឡើងពន្ធលើផលិតផលឧស្សាហកម្មកាត់ដេរនៅក្នុងប្រទេសវៀតណាម ដែលជំរុញឱ្យវិនិយោគិនមានទំនុកចិត្តខ្ពស់ក្នុងការបញ្ជាទិញពីកម្ពុជា ជំនួសវិញ កាន់តែច្រើនឡើង។ នេះបើតាមការអះអាងរបស់អ្នកជំនាញរូបនេះ។
បើតាមការអះអាងរបស់លោក ហ្វា សាលី កំណើននៃការបញ្ជាទិញនេះ ក៏បានជំរុញឱ្យមានការធ្វើការថែមម៉ោងមានការកើនឡើងផងដែរ ដោយសារនៅតាមបណ្តារោងចក្រសហគ្រាសមួយចំនួនកំពុងជួបបញ្ហាខ្វះកម្លាំងពលកម្មច្រើន ដ្បិតថា កម្មករ-កម្មារនីមួយចំនួនមិនចង់ធ្វើការនៅទីតាំងឆ្ងាយៗពីលំនៅឋានរបស់ពួកគេ។ យ៉ាងណាមិញអ្នកជំនាញរូបនេះ លើកទឹកចិត្តឱ្យអ្នកវិនិយោគលើវិស័យឧស្សាហកម្មកាត់ដេរគួរគិតគូរលើទីតាំងសាងសង់រោងចក្រនៅក្បែរទីតាំងដែលកម្មកររស់នៅច្រើន។ បន្ថែមលើនេះលោកស្នើឱ្យម្ចាស់រោងចក្រសហគ្រាសគួរដំឡើងថវិកាមួយចំនួនដល់កម្មករដែលមានទីតាំងរស់នៅឆ្ងាយៗ ដើម្បីលើកទឹកចិត្តដល់កម្មករ ក៏ដូចជាជួយដោះស្រាយបញ្ហាខ្វះកម្លាំងពលកម្មក្នុងវិស័យនេះ។
អត្ថបទគួរអាន
ជាមួយគ្នានេះ ឯកឧត្តម កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានវាយតម្លៃខ្ពស់ចំពោះការរីកចម្រើនរបស់វិស័យឧស្សាហកម្មកម្ពុជា នាពេលចប្ចុប្បន្ននេះ ពិសេសឧស្សាហកម្មកាត់ដេរ ដែលទទួលបានការបញ្ជាទិញខ្ពស់ពីទីផ្សារអន្តរជាតិ នៅដើមឆ្នាំនេះ។ ឯកឧត្តម បានបន្ថែមថា ដើម្បីឆ្លើយតបនឹងការរីកចម្រើនរបស់វិស័យឧស្សាហកម្មនេះ រាជរដ្ឋាភិបាលកម្ពុជា បានដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងហានិភ័យចំនួន១លាន៥សែននាក់ កាលពីចុងឆ្នាំ២០២៣ ហើយមកទល់ពេលនេះ មានអ្នកចុះឈ្មោះក្នុងកម្មវិធីនេះជាង៩ម៉ឺន២ពាន់នាក់។
បើតាមការបញ្ជាក់របស់ឯកឧត្តម កត្តា អ៊ន នៅក្នុងរយៈពេល១ខែដំបូង ឆ្នាំ២០២៥ ការនាំចេញ ផលិតផលក្នុងវិស័យកាត់ដេររបស់កម្ពុជា ដូចជាសម្លៀកបំពាក់ ស្បែកជីង ការបូប និងផលិតផលធ្វើដំណើរជាដើម សម្រេចបានទំហំប្រមាណ១,៣ពាន់លានដុល្លារ កើនឡើងជាង៣៨% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះការនាំចេញទៅអាម៉េរិក កើនឡើង៤៥,៩% អឺរ៉ុប កើនឡើង៤១,៩% ជប៉ុន កើនឡើង២៩,៦% អង់គ្លេស កើនឡើង៣៧% និងបណ្តាប្រទេសអាស៊ាន មានការកើនឡើង២៦,៩%។ គិតត្រឹមខែមករា ឆ្នាំ២០២៥ កម្ពុជា មានរោងចក្រសហគ្រាសក្នុងវិស័យកាត់ដេរសរុបចំនួន ១៥៤៨ មានកម្មករសរុបជាង៩២ម៉ឺននាក់ ក្នុងនោះកម្មករជាស្ត្រីមានជាង៨០%៕
