យោងតាមរបាយការណ៍ដែលចេញផ្សាយដោយការិយាល័យស្ថិតិឡាវ កត្តារចម្បងៗដែលបណ្ដាលឲ្យអតិផរណាក្នុងប្រទេសនេះកើនឡើងគឺ ការកើនឡើងនៃតម្លៃប្រេងឥន្ធនៈ និងឧស្ម័ន តម្លៃទំនិញនាំចូលឡើងថ្លៃ រួមផ្សំនឹងដោយការធ្លាក់ចុះនៃប្រាក់គីបរបស់ឡាវផងដែរ។
របាយការណ៍ដដែលបានបង្ហាញថា តម្លៃនៃការដឹកជញ្ជូនក៏ជាចំណែកដែលបណ្ដាលឲ្យអតិផរណាកើនឡើងដូចគ្នា ពោលគឺតម្លៃដឹកជញ្ជូនបានកើនឡើងក្នុងរង្វង់៥០% ដែលបានជះឥទ្ធិពលដល់ផ្នែកផ្សេងទៀតនៃលំហូរសេដ្ឋកិច្ចក្នុងប្រទេស។ ដោយឡែក តម្លៃអាហារ និងភេសជ្ជៈគ្មានជាតិអាល់កុលបានកើនឡើងក្នុងរង្វង់ជាង ៤៧% ខណៈដែលតម្លៃនៃការថែទាំសុខភាព និងថ្នាំសង្កូវកើនឡើងជាង ៤២%។
គួរជម្រាបថា អតិផរណាប្រទេសឡាវបានចាប់កើនឡើងនៅក្នុងត្រីមាសទី២ នៃឆ្នាំ២០២២ នៅពេលដែលសេដ្ឋកិច្ចរបស់ប្រទេសនេះ បានរងផលប៉ះពាល់យ៉ាងធ្ងន់ធ្ងរ ដោយសារជំងឺរាតត្បាត COVID-19 បូករួមនឹងការកើនឡើងនៃតម្លៃប្រេង និងការធ្លាក់ចុះនៃតម្លៃរូបិយបណ្ណឡាវ ដែលបានធ្លាក់ចុះយ៉ាងខ្លាំងធៀបនឹងរូបិយបណ្ណ ថៃ វៀតណាម និងចិន ដែលជាមូលហេតុនៃការកើនឡើងនៃតម្លៃនៃការនាំចូលពីដៃគូពាណិជ្ជកម្មសំខាន់ៗទាំងបីប្រទេសនេះ។
យោងតាមរបាយការណ៍របស់វិទ្យុអាស៊ីសេរីជាភាសាអង់គ្លេស បានបង្ហាញថា សូម្បីតែបុគ្គលិករដ្ឋដែលមានជីវភាពធូរធារ ក៏រងផលប៉ះទង្គិចពីវិបត្តិអតិផរណានេះដែរ។ ជាក់ស្ដែង ក្រសួងការងារ និងសុខុមាលភាពសង្គមប្រទេសឡាវបានរាយការណ៍កាលពីចុងឆ្នាំ២០២២ថា មនុស្សប្រហែល ៥០ម៉ឺននាក់ ឬប្រហែល ២១% នៃកម្លាំងពលកម្មរបស់ប្រទេសទាំងមូល កំពុងជួបបញ្ហាគ្មានការងារធ្វើដោយសារតែវិបត្តសេដ្ឋកិច្ច។
អត្ថបទគួរអាន
សូមជម្រាបថា តួលេខអតិផរណាដែលគួរឱ្យព្រួយបារម្ភនេះ គឺជាការចង្អុលបង្ហាញចុងក្រោយបំផុត បន្ទាប់ពីប្រទេសនេះរងនូវព្យុះសេដ្ឋកិច្ចដោយសារគំនាបបំណុលយ៉ាងច្រើននាពេលកន្លងមក។ សរុបមក អតិផរណាជាមធ្យមរបស់ប្រទេសឡាវស្ថិតក្នុងរង្វង់ ២៣% សម្រាប់ឆ្នាំ២០២២ កើនឡើងពី ៣,៨%កាលពីឆ្នាំ២០២១ ដែលនេះជាអត្រាខ្ពស់បំផុតក្នុងចំណោមរដ្ឋសមាជិកទាំង១០ នៃសមាគមប្រជាជាតិអាស៊ីអាគ្នេយ៍ (អាស៊ាន)។
ទោះជាយ៉ាងណាក៏ដោយ ធនាគារអភិវឌ្ឍន៍អាស៊ី(ADB) ជឿថាតួលេខនេះនឹងធ្លាក់ចុះដល់ ១០% នៅឆ្នាំ ២០២៣នេះ ខណៈរដ្ឋាភិបាលទីក្រុងវៀងចន្ទន៍រំពឹងថា នឹងអាចទម្លាក់តួលេខនេះឲ្យដល់ក្រោម ៩% ប៉ុន្តែវានៅតែជាសម្ពាធសម្រាប់នាយករដ្ឋមន្ត្រីថ្មីរបស់ប្រទេសឡាវ គឺលោក Sonexay Siphandone ដែលទើបតែចូលកាន់តំណែងនៅដើមខែមករាកន្លងមកនេះ។
សូមជម្រាបថា កាលពីពេលឡើងកាន់ដំណែង លោក Sonexay បានសន្យាថានឹងលើកកំពស់ស្មារតីបដិវត្តន៍របស់ប្រទេសឲ្យដល់កម្រិតខ្ពស់បំផុត។ ចាប់តាំងពីពេលនោះមក រដ្ឋាភិបាលរបស់លោកបានចាត់វិធានការបន្ថែមមួយចំនួន ដើម្បីឲ្យអតិផរណាស្ថិតក្រោមការគ្រប់គ្រងបាន។ ជាក់ស្ដែង លោកបានបញ្ជាឱ្យអាជីវករបិទហាងប្តូរប្រាក់ទាំងអស់ និងហាមឃាត់ការនាំចូលសាច់ និងផលិតផលកសិកម្មណា ដែលមានស្រាប់នៅក្នុងស្រុក។ ប៉ុន្តែការធ្វើបែបនេះ បានបង្កើនបន្ទុកបំណុលរបស់ប្រទេសទៅវិញ៕
អត្ថបទ៖ សារៀម លក្ខិណា
