ធនាគារធំៗនៅថៃត្រៀមសាច់ប្រាក់បម្រុងប្រមាណ៣ពាន់លានដុល្លារអាម៉េរិក សម្រាប់បំពេញកំណើនតម្រូវការសាច់ប្រាក់ក្នុងឱកាសបុណ្យចូលឆ្នាំចិន

ស្របពេលពិធីបុណ្យចូលឆ្នាំថ្មីប្រពៃណីចិន កាន់តែខិតចូលជិតមកដល់ ធនាគារកណ្តាលថៃ និងធនាគារពាណិជ្ជធំៗនៅប្រទេសថៃ រួមមានធនាគារក្រុងថៃ (Krungthai Bank) ធនាគារ TMB Thanachart ធនាគារកសិករ (Kasikornbank) ធនាគារបាងកក (Bangkok Bank) ធនាគារកសិកម្ម និងសហករណ៍កសិកម្ម BAAC ធនាគារក្រុងស្រ៊ី (Krungsri Bank) និងធនាគារពាណិជ្ជសាយ៉ាម (Siam Commercial Bank) បានត្រៀមសាច់ប្រាក់បម្រុងជាង១០០ពាន់លានបាត ឬប្រមាណ៣ពាន់លានដុល្លារអាម៉េរិក សម្រាប់បំពេញកំណើនតម្រូវការសាច់ប្រាក់ក្នុងឱកាសបុណ្យចូលឆ្នាំចិនរយៈពេល៦ថ្ងៃគិតចាប់ពីថ្ងៃទី២៦ ដល់ថ្ងៃទី៣១ ខែមករា ឆ្នាំ២០២៥។

លោកស្រី ប៊ុតសាកន ធីរ៉ាពុនយ៉ាឆៃ (Budsakorn Teerapunyachai) ឧបការីទេសាភិបាលនៃធនាគារកណ្ដាលថៃ ទទួលបន្ទុកផ្នែកប្រព័ន្ធទូទាត់ និងហេដ្ឋារចនាសម្ព័ន្ធហិរញ្ញវត្ថុថៃ បានប៉ាន់ប្រមាណថា ធនាគារនានានឹងដកសាច់ប្រាក់ក្នុងទំហំប្រមាណ១,១ពាន់លានដុល្លារអាម៉េរិកក្នុងអំឡុងរដូវកាលបុណ្យចូលឆ្នាំចិនដ៏ខ្លីខាងមុខនេះ។

ធនាគារកណ្តាលថៃ បានសង្កត់ធ្ងន់ថា ធនាគារពាណិជ្ជនានាត្រូវធានាចែកចាយ និងបែងចែកក្រដាសប្រាក់ទៅដល់សាធារណជនឱ្យបានសមស្រប គ្រប់គ្រាន់ និងទាន់ពេលវេលា ទន្ទឹមនឹងការជំរុញការទូទាត់តាមប្រព័ន្ធឌីជីថល និងកំណើនសេដ្ឋកិច្ចជាតិ។

គួររំឭកថា ធនាគារកំពូលទាំង៥របស់ថៃ ក៏ធ្លាប់បានត្រៀមទុកសាច់ប្រាក់បម្រុងរហូតដល់ទៅប្រមាណ៤,៥ពាន់លានដុល្លារអាម៉េរិក សម្រាប់បំពេញតម្រូវការដកប្រាក់ និងការចាយវាយក្នុងឱកាសបុណ្យចូលឆ្នាំសកល២០២៥ កន្លងទៅថ្មីៗនេះផងដែរ ខណៈដែលធនាគារកណ្តាលថៃ ក៏បានត្រៀមទុកសាច់ប្រាក់បម្រុងជាង២,៣ពាន់លានដុល្លារអាម៉េរិកបន្ថែមផងដែរ ដើម្បីបំពេញកំណើនតម្រូវការសាច់ប្រាក់ក្នុងឱកាសបុណ្យចូលចូលឆ្នាំសកលនោះ៕

ដោយ: តែម សុខុម