កូរ៉េខាងត្បូង នឹងបណ្តុះបណ្តាលអ្នកចម្បាំងដ្រូនកន្លះលាននាក់ ត្រៀមសម្រាប់សង្គ្រាមសម័យថ្មី

កូរ៉េខាងត្បូង នឹងបណ្តុះបណ្តាលអ្នកចម្បាំងដ្រូន​កន្លះលាននាក់ ត្រៀមសម្រាប់សង្គ្រាមសម័យថ្មី ដោយ​ក្រសួង​ការពារជាតិ​កូរ៉េខាងត្បូង និយាយ​ថា ដ្រូននឹងលែងប្រើសម្រាប់តែអង្គភាពពិសេសដូចមុន​ទៀត​ហើយ ប៉ុន្តែវានឹងក្លាយជាឧបករណ៍ស្តង់ដារសម្រាប់កងទ័ពជើងគោក កងទ័ពជើងទឹក កងទ័ពអាកាស និងកងម៉ារីនទាំងមូល។
រដ្ឋមន្ត្រីការពារជាតិ លោក អាន គ្យូបាក់ (Ahn Gyu-back) បាន​សង្កត់ធ្ងន់​​ថា ទាហានគ្រប់រូប​ត្រូវ​តែ​មាន​សមត្ថភាពប្រើដ្រូនជាអាវុធផ្ទាល់ខ្លួនទី២ ដូចការប្រើកាំភ្លើងដែរ ហើយកូរ៉េខាងត្បូង គ្រោង​​ផលិត​ដ្រូន​យោធា​ឱ្យ​បាន ១១០,០០០ គ្រឿងនៅត្រឹមឆ្នាំ២០២៩។
ក្រៅពីការបណ្តុះបណ្តាលអ្នកប្រើដ្រូន កូរ៉េខាងត្បូង ក៏មានផែនការទិញដ្រូនវាយប្រហារ និងដ្រូនឈ្លប​យកការណ៍តម្លៃទាបជាង ២០,០០០ គ្រឿងព្រមទាំងអភិវឌ្ឍហ្វូងដ្រូន​ដែលប្រើបច្ចេកវិទ្យា​បញ្ញាសិប្បនិម្មិត AI និងពង្រឹងប្រព័ន្ធការពារប្រឆាំងដ្រូន ដោយប្រើអាវុធឡាស៊ែរ និងអាវុធកាំរស្មី​ថាមពលខ្ពស់​ផងដែរ។
រដ្ឋាភិបាលកូរ៉េខាងត្បូង ក៏បានបញ្ជាក់​ថា ដ្រូនយោធាថ្មីទាំងអស់នឹងប្រើគ្រឿងបន្លាស់ផលិតក្នុងស្រុក ១០០% ដោយមិនប្រើគ្រឿងបន្លាស់ពីប្រទេសចិន នោះឡើយ ដើម្បីការពារសន្តិសុខជាតិ។
ការប្រកាសនេះធ្វើឡើង ខណៈកូរ៉េខាងត្បូង និងកូរ៉េខាងជើង កំពុងប្រជែង​គ្នាពង្រឹងសមត្ថភាព​ដ្រូនយ៉ាងឆាប់រហ័ស ដោយសិក្សាបទពិសោធន៍ពីសង្គ្រាម​ពិតជាក់ស្ដែង​នៅអ៊ុយក្រែន និងតំបន់​មជ្ឈិមបូព៌ា ដែលបានបង្ហាញថា ដ្រូនកំពុងផ្លាស់ប្តូររបៀបធ្វើសង្គ្រាមសម័យទំនើប។
លើសពីនេះ ការពង្រីកការប្រើប្រាស់ដ្រូនក៏ជាផ្នែកមួយនៃយុទ្ធសាស្ត្ររបស់កូរ៉េខាងត្បូង ក្នុងការដោះស្រាយបញ្ហាចំនួនប្រជាជនមានវ័យចូល​បម្រើយោធាដែលកំពុងថយចុះ ដោយពឹងផ្អែក​កាន់តែច្រើនលើបច្ចេកវិទ្យា និងប្រព័ន្ធស្វ័យប្រវត្តិនាពេលអនាគត៕

ដោយ: តែម សុខុម