ធនាគារធំៗនៅអាមេរិកបញ្ចេញទុនជួយសង្គ្រោះធនាគារ First Republic Bank ដើម្បីបញ្ជៀសការដួលរលំ

ទូរទស្សន៍CNN បានរាយការណ៍កាលពីល្ងាចថ្ងៃទី ១៦ ខែ មីនា ឆ្នាំ២០២៣ ថា ធនាគារធំៗដែលមានមូលដ្ឋាននៅលើទឹកដីមហាអំណាយសេដ្ឋកិច្ចពិភពលោកទី១នៅលើពិភពលោក ចំនួន ១១ បានកំពុងតែផ្តល់ជំនួយផ្នែកហិរញ្ញវត្ថុតាមរយៈការយកសាច់ប្រាក់សរុបដល់ទៅ ៣០ ពាន់លានដុល្លារយកទៅដាក់ជាប្រាក់បញ្ញើនៅធនាគារ First Republic Bank ដែលកំពុងស្ថិតនៅមាត់ជ្រោះនៃការដួលរលំ ដោយសារកង្វះសាច់ប្រាក់ទូទាត់ជូនអតិថិជន។
ប្រភពដដែលបានអះអាងថា ធនាគារ First Republic Bank ដែលកំពុងប្រឈមមុខនឹងវិបត្តិទំនុកចិត្តពីអ្នកវិនិយោគ និងអតិថិជន នឹងទទួលបានប្រាក់បញ្ញើ សរុប ៣០ ពាន់លានដុល្លារពីក្រុមធនាគារធំៗចំនួន ១១ ដែលរួមមាន ធនាគារ JP Morgan Chase, ធនាគារ Bank of America, ធនាគារ Wells Fargo, ធនាគារ Citigroup និង ធនាគារ Truist Bank ជាដើម ។
បន្ទាប់ពីទទួលបានព័ត៌មានដ៏វិជ្ជមាននេះ អតិថិជនរបស់ធនាគារ First Republic Bank មានមូលដ្ឋាននៅ រដ្ឋសាន់ហ្វ្រាន់ស៊ីស្កូ ដែលកំពុងជួបការលំបាកនៅក្នុងការទទួលបានសាច់ប្រាក់សម្រាប់បំពេញ តម្រូវការដកប្រាក់របស់អតិថិជន និងទំនុកចិត្តលើប្រព័ន្ធធនាគាររបស់សហរដ្ឋអាមេរិកក្នុងអំឡុងពេលដ៏ច្របូកច្របល់ហាក់មានលំនឹងបន្ដិចឡើងវិញហើយ។
ដោយឡែក នៅលើទីផ្សារភាគហ៊ុនអាមេរិក សន្ទស្សន៍ភាគហ៊ុនរបស់ធនាគារ First Republic Bank ដែលដាំក្បាលចុះជាបន្តបន្ទាប់តាំងពីបើកការជូញដូរនៅសប្តាហ៍នេះ បានទទួលកំណើនឡើងវិញ ដោយពេលដែលបិទទីផ្សារជួញដូ កាលពីថ្ងៃព្រហស្បតិ៍ តម្លៃភាគហ៊ុន បានកើនឡើង ១០% ។
កាលពីឆ្នាំ២០២២ ធនាគារ First Republic Bank ត្រូវបានគេដឹងថា គឺជាធនាគារពាណិជ្ជមួយនៅសហរដ្ឋអាមេរិក ដែលមានទ្រព្យសរុបដល់ទៅ ២១២ ពាន់លានដុល្លារ ហើយធនាគារនេះ មានប្រាក់ចំណេញរហូតដល់ជិត ១,៥ ពាន់លានដុល្លារ ប៉ុន្តែសភាពការណ៍ហិរញ្ញវត្ថុនៅដើមឆ្នាំ២០២៣ នេះ បានធ្វើឲ្យធនាគារស្ថិតនៅក្នុងហានិភ័យ នៃកង្វះសាច់ប្រាក់បើកជូនអតិថិជនរបស់ខ្លួន៕