ប្រធានផ្នែកគ្រប់គ្រងគយនៅព្រំដែនខេត្ត Nong Khai បាននិយាយថា មនុស្សឆ្លងកាត់ព្រំដែនបានកើនឡើងពី៣០០នាក់ក្នុងមួយថ្ងៃ ឡើងដល់ជាង២ពាន់នាក់ បើគេធៀបនឹងពេលមុនការរឹតបន្តឹងការធ្វើដំណើរចេញចូលព្រំដែន។ តួលេខផ្លូវការបង្ហាញថា ជនបរទេសសរុបចំនួន៣ម៉ឺននាក់ នាក់បានឆ្លងកាត់ច្រកព្រំដែន Nong Khai ចាប់ពីថ្ងៃទី០៩ដល់៣១ខែឧសភា ក្នុងនោះ មានជនជាតិថៃដល់ទៅជាង២ម៉ឺន៨ពាន់នាក់ បានធ្វើដំណើរចូលទៅប្រទេសឡាវ ហើយដែលភាគីច្រើននៃអ្នកទាំងនោះបានរត់ពន្ធប្រេងទៅលក់នៅក្នុងប្រទេសឡាវ។
ប្រភពព័ត៌មានបន្តថា ក្បួនរថយន្តជាច្រើនបានធ្វើដំណើរចេញពីប្រទេសឡាវ សំដៅទៅរកស្ថានីយ៍ប្រេងឥន្ធនៈក្នុងខេត្ត Nong Khai របស់ថៃ ដើម្បីព្យាយាមចាក់សាំងបំពេញធុងរបស់ពួកគេ មុនពេលធ្វើដំណើរត្រឡប់ទៅទីក្រុងវៀងចន្ទន៍ រដ្ឋធានីរបស់ឡាវវិញ។
អត្ថបទគួរអាន
សូមជម្រាបថា ស្ថានីយ៍ប្រេងឥន្ធនៈ PTT នៅខេត្ត Nong Khai ហាក់មានភាពមមាញឹកជាងគេ ដោយក្នុងនោះ ដោយសារតែតម្លៃសាំងស៊ុបពែរក្នុងមួយលីត្រគិតជាប្រាក់រៀលខ្មែរមានជាង៦២០០រៀល, រីឯសាំងធម្មតាតម្លៃ ៥៣០០រៀល និងម៉ាស៊ូតវិញមានតម្លៃ៣៧៥០រៀល ដែលតម្លៃប្រេងទាំងនេះ ជាតម្លៃថោកជាងប្រេងនៅប្រទេសឡាវឆ្ងាយណាស់។
ជាក់ស្តែង នៅប្រទេសឡាវប្រេងឥន្ធនៈស៊ុបពែរមានតម្លៃជាង៧០០០រៀលក្នុងមួយលីត្រ ប្រេងសាំងធម្មតាមានតម្លៃ ៥៥០០រៀល និងប្រេងម៉ាស៊ូតមានតម្លៃ ៥៣០០រៀលក្នុងមួយលីត។ មែនទែនទៅតម្លៃនេះ មិនសូវជាខុសគ្នាខ្លាំងនោះទេ បើគេធៀបប្រទេសទាំងពីរ ឬសូម្បីតែធៀបនឹងកម្ពុជាយើងក៏ដោយ បញ្ហានៅត្រង់ថា ប្រទេសឡាវ កំពុងខ្វះខាតប្រេងសាំងចាក់សម្រាប់ពលរដ្ឋរបស់ខ្លួន ហើយតម្លៃប្រេងឥន្ធនៈនៅឡាវរក្សបានតម្លៃប៉ុណ្ណេះ ក៏ដោយសារតែថ្មីៗនេះ រដ្ឋាភិបាលប្រទេសនេះ ក៏បានសម្រេចបន្ទាបតម្លៃពន្ធលើប្រេងឥន្ធនៈផងដែរ។
គួររំឭកថា រដ្ឋាភិបាលក្រុងវៀងចន្ទន៍ បានជំរុញនិងលើកទឹកចិត្តឲ្យប្រជាជនសន្សំសំចៃការប្រើប្រាស់ប្រេងឥន្ធនៈ តាមរយៈការកុំធ្វើដំណើរទៅណាផ្តេសផ្តាស បើសិនជាមិនមានករណីចាំបាច់ណាមួយ ស្របពេលដែលវិបត្តិខ្វះខាតប្រេងនៅឡាវក្បែរខាងកម្ពុជារបស់យើងនៅបន្តជាប់គាំងមិនទាន់អាចរកផ្លូវចេញបាននៅឡើយ។
កសិករឡាវត្អូញត្អែរថា ពួកគេមិនអាចបង្កបង្កើនផលបានក្នុងរបបកសិកម្មរបស់ពួកគេបានទេ ដោយសារតែកង្វះខាតប្រេងសាំង និងបានអំពាវនាវឱ្យភាគីពាក់ព័ន្ធចាត់វិធានការដោះស្រាយវិបត្តិនេះឱ្យបានឆាប់រហ័ស ពុំនោះទេ វានឹងប៉ះពាល់ដល់វិស័យកសិកម្ម និងស្បៀងអាហារក្នុងប្រទេស៕
None
