សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ស្ថានភាពសេដ្ឋកិច្ចកម្ពុជា នៅឆ្នាំ២០២៤ នឹងបន្តនិន្នាការកើនឡើងជាមួយក្តីរំពឹងអាចសម្រេចបានកំណើនក្នុងរង្វង់៦,៦% ដែលជួយជំរុញឱ្យផលិតផលក្នុងស្រុកសរុបរបស់កម្ពុជាមានតម្លៃ១៤ម៉ឺនប៊ីលានរៀល ឬជាង៣ម៉ឺន៥ពាន់លានដុល្លារអាម៉េរិក។
ជាមួយគ្នាននេះផលិតផលក្នុងសរុបសម្រាប់មនុស្សម្នាក់នៅឆ្នាំ២០២៤ ត្រូវបានរំពឹងថា នឹងកើនឡើងដល់២ពាន់៧១ដុល្លារអាម៉េរិក មានការកើនឡើងជាង១៥០ដុល្លារ បើធៀបនឹងឆ្នាំ២០២៣ ដែលមានប្រមាណ១ពាន់៩១៧ដុល្លារអាម៉េរិក។
កំណើនសេដ្ឋកិច្ច៦,៦% នៅឆ្នាំ២០២៤ ត្រូវបានក្រសួងសេដ្ឋកិច្ចរំពឹងជួយជំរុញគាំទ្រដោយវិស័យសំខាន់ៗមួយចំនួនរួមមានវិស័យឧស្សាហកម្ម សេវាកម្ម និងកសិកម្ម។ ក្នុងនោះវិស័យឧស្សាហកម្មត្រូវបានរំពឹងថានឹងមានកំណើន៨,៥%នៅឆ្នាំក្រោយពីប្រមាណ៥% ក្នុងឆ្នាំ២០២៣ ដោយសារការរំពឹងទុកការងើបឡើងវិញនៃអនុវិស័យកាត់ដេរ ស្របពេលដែលអនុវិស័យកម្មន្តសាលមិនមែនកាត់ដេរនៅបន្តរក្សាបានកំណើនរឹងមាំ ខណៈដែលអនុវិស័យសំណង់នៅបន្តមានកំណើនទាប។
ជាមួយគ្នានេះ វិស័យសេវាកម្ម ដែលជាវិស័យគាទ្រសំខាន់ទី២ ក្នុងការជំរុញកំណើនសេដ្ឋកិច្ចឆ្នាំ២០២៤ ត្រូវបានព្យាករថានឹងបន្តនិន្នាការល្អក្នុងអត្រាកំណើន៦,៩% ក្នុងឆ្នាំ២០២៤ ពីមូលដ្ឋានល្អក្នុងរង្វង់៨,១% ក្នុងឆ្នាំ២០២៣ ក្រោយការបន្តងើបឡើងវិញនៃសកម្មភាពសេដ្ឋកិច្ចក្នុងស្រុក ជាពិសេសអនុវិស័យសណ្ឋាគារ និងភោជនីយដ្ឋាន ដែលនឹងមានផលជះជាវិជ្ជមានដល់វិស័យ-អនុវិស័យគាំទ្រផ្សេងៗទៀត រួមមានអនុវិស័យលក់ដុំ-រាយ និងដឹកជញ្ជូនជាដើម។
ដោយឡែកវិស័យកសិកម្ម ដែលវិស័យគាំទ្រសំខាន់ទី៣ ត្រូវបានរំពឹងថា នឹងបន្តសម្រេចបានកំណើនល្អក្នុងរង្វង់១,១% ក្នុងឆ្នាំ២០២៤ ធៀបនឹង០,៩% ក្នុងឆ្នាំ២០២៣ ដោយសារការបន្តនិន្នាការល្អនៃអនុវិស័យដំណាំ និងការបន្តងើបឡើងវិញនៃអនុវិស័យនេសាទ ខណៈដែលអនុវិស័យចិញ្ចឹមសត្វនៅបន្តមានស្ថិរភាព។
អនុវិស័យដំណាំបន្តនិន្នាការល្អ ដោយសារការរំពឹងទុកនូវកំណើននៃផលិតកម្ម ដែលជំរុញដោយកិច្ចព្រមព្រៀងពាណិជ្ជកម្មសេរីផ្សេងៗ គួបផ្សំនឹងការបង្កើនការវិនិយោគរបស់រាជរដ្ឋាភិបាលតាម រយៈការបន្ដផ្ដល់ការលើកទឹកចិត្តផ្នែកពន្ធ សម្រាប់ការនាំចូលវត្ថុធាតុដើមកសិកម្ម និងការផ្តល់ហិរញ្ញប្បទានក្នុងការជំរុញផលិតកម្មក្នុងស្រុក។
អត្ថបទគួរអាន
យ៉ាងណាក៏ដោយក្រសួងសេដ្ឋកិច្ច និងហិរញ្ញវត្ថុអះអាងថា បើទោះបីជាសេដ្ឋកិច្ចកម្ពុជា ក្នុងឆ្នាំ២០២៤ ត្រូវបានរំពឹងថា នឹងបន្តងើបឡើងវិញក្នុងអត្រាកំណើន៦,៦% យ៉ាងណាក្តី កម្ពុជាក៏នឹងនៅបន្តជួបប្រទះនូវហានិភ័យ និងបញ្ហាប្រឈមចម្បងៗ ជាពិសេសពីកត្តាខាងក្រៅដែលអាចធ្វើឱ្យកំណើនខាងលើនេះ មិនអាចសម្រេចបានតាមការគ្រោងទុកផងដែរ។
ទន្ទឹមនឹងនេះ កម្ពុជាក៏នៅតែបន្តប្រឈមនឹងបញ្ហាជារចនាសម្ព័ន្ធខាងក្នុងប្រទេសមួយចំនួន ដូចជាភាពប្រកួតប្រជែងនៅមានកម្រិត និងល្បឿនទាបនៃការធ្វើពិពិធកម្មសេដ្ឋកិច្ច ព្រមទាំងការបន្តពឹងផ្អែកខ្លាំងលើតម្រូវការខាងក្រៅ។
សម្រាប់ស្ថានភាពអតិផរណាវិញ អត្រាអតិផរណាជាមធ្យមប្រចាំឆ្នាំ ត្រូវបានរំពឹងថា នឹងរក្សាបានក្នុងរង្វង់២,៥%នៅឆ្នាំ២០២៤ ដោយសារការរំពឹងទុកនូវការវិលត្រលប់ទៅរកប្រក្រតីភាពវិញ នៃថ្លៃប្រេងអន្តរជាតិ។
ជាមួយគ្នានេះ អត្រាប្តូរប្រាក់ត្រូវបានរំពឹងថា នឹងនៅបន្តមានស្ថិរភាពក្នុងរង្វង់៤០៦៥រៀលក្នុងមួយដុល្លារអាម៉េរិកក្នុងឆ្នាំ២០២៤ ដោយសារការបន្តអនុវត្តវិធានការលើកកម្ពស់ប្រាក់រៀលរបស់ធនាគារជាតិនៃកម្ពុជា និងការបន្តពង្រឹងគោលនយោបាយគ្រប់គ្រងសាច់ប្រាក់ក្នុងវិស័យហិរញ្ញវត្ថុ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
