យោងតាមការវិភាគរបស់កម្មវិធីស្បៀងអាហារពិភពលោក (WFP) បានបង្ហាញថា ប្រជាជនរហូតដល់ទៅ ៣លាន៤សែននាក់ នឹងជួបប្រទះការលំបាកក្នុងការផ្គត់ផ្គង់ស្បៀងអាហារក្នុងរយៈពេល ៣ ទៅ ៦ ខែទៀត ដោយនៅក្នុងតំបន់ទីប្រជុំជននឹងត្រូវរងផលប៉ះពាល់ខ្លាំងបំផុតដោយសារតែការបាត់បង់ការងារកើនឡើងខ្លាំង ក្នុងវិស័យរោងចក្រសហគ្រាស វិស័យសំណង់ វិស័យសេវាកម្ម និង តម្លៃម្ហូបអាហារមានការកើនឡើងខ្លាំងផងដែរ។
នាយកប្រតិបត្តិអង្គការស្បៀងអាហារពិភពលោកប្រចាំនៅភូមា លោក ស្តេហ្វិន អានដឺសុន បានគូសបញ្ជាក់នៅក្នុងសេចក្តីថ្លៃងការណ៍មួយថា៖«ពលរដ្ឋក្រីក្រកាន់តែច្រើនឡើងៗហើយ បានបាត់បង់ការងារធ្វើ ហើយពួកគេគ្មានលទ្ធភាពទទួលបានការផ្គត់ផ្គង់ស្បៀងអាហារបាននោះទេ។»
អត្ថបទទាក់ទង!
លោកបន្តថា «វាទាមទារឲ្យមានការឆ្លើយតបសមស្របណាមួយ ដើម្បីកាត់បន្ថយផលប៉ះពាល់ជាបន្ទាន់ និងដើម្បីធានាឲ្យបានថាពលរដ្ឋភូមាក៏ដូចជា ប្រទេសជាតិទាំងមូលនឹងមិនជួបប្រទះបញ្ហាអសន្តិសុខស្បៀងអាហារធ្ងន់ធ្ងរនោះទេ។»
បើតាមអង្គការស្បៀងអាហារពិភពលោក តម្លៃម្ហូបអាហារនៅតាមទីផ្សារបានហក់ឡើងពី៥% ទៅ១៨% ចាប់ពីចុងខែកុម្ភៈមកម្ល៉េះ។ ពលរដ្ឋរស់នៅក្នុងទីក្រុងរ៉ង់ហ្គោន ដែលជាកន្លែងមានភាពវឹកវរជាងគេនោះ ត្រូវបានគេសង្កេតឃើញថា បានផ្តើមកាត់បន្ថយការហូបចុក និងពុំបានទទួលទានអាហារ ដែលមានជីវជាតិគ្រប់គ្រាន់នោះទេ ខណៈដែលគ្រួសារខ្លះកំពុងជំពាក់បំណុលគេផងដែរ។
អង្គការស្បៀងអាហារពិភពលោក ដែលស្ថិតនៅក្រោម អង្គការសហប្រជាជាតិមួយនេះ គ្រោងពង្រីកប្រតិបត្តិការជួយសង្គ្រោះពលរដ្ឋភូមាដែលកំពុងរងគ្រោះភាពអត់ឃ្លានឲ្យបានដល់ទៅជាង ៣លានបន្ថែមទៀត ជាមួយនឹងកញ្ចប់ទឹកប្រាក់ប្រមាណ ១០០លានដុល្លារ។
គួររំឭកថា ប្រទេសភូមាបានស្ថិតនៅក្នុងស្ថានភាពវឹកវរចាប់តាំងពីពួកយោធាបានបណ្តេញរដ្ឋាភិបាលជាប់ឆ្នោតដែលដឹកនាំដោយលោកស្រី អ៊ុងសាន ស៊ូជី ចេញពីអំណាចតាមរយៈការធ្វើរដ្ឋប្រហារដោយយោធា។ យោងតាមក្រុមអ្នកឃ្លាំមើលក្នុងតំបន់បានឲ្យដឹងថា មានជនស៊ីវិលយ៉ាងហោចជិត ៧៥០ នាក់ ត្រូវបានកងទ័ពភូមាសម្លាប់ ហើយមនុស្សជាង ៣.១០០ នាក់ផ្សេងទៀតត្រូវបានចាប់ខ្លួន។
សូមបញ្ជាក់ថា ថ្មីៗនេះ ធនាគារពិភពលោកបានព្យាករសេដ្ឋកិច្ចរបស់ប្រទេសភូមាថានឹងធ្លាក់ចុះដល់ -១០% នៅឆ្នាំ២០២១នេះ ដោយសារតែភាពចលាចលនៅក្នុងប្រទេស ចាប់តាំងពីមានរដ្ឋប្រហារកាលពីដើមខែកុម្ភៈមក ហើយប្រទេសមហាអំណាចធំៗបានបន្តទម្លាក់ទណ្ឌកម្មកាន់តែច្រើនឡើងមកលើក្រុមយោធា ដែលទោះចង់ ឬមិនចង់ វាអាចនឹងប៉ះពាល់ដលពលរដ្ឋភូមាផងដែរ៕
None
