ពលរដ្ឋអាម៉េរិកកាន់តែច្រើនយល់ថា លោក ត្រាំ ធ្វើជ្រុលហួសហេតុលើគោលនយោបាយអន្តោប្រវេសន៍

ការស្ទង់មតិរបស់ Associated Press-NORC បានរកឃើញថា មានតែ៣៩%ប៉ុណ្ណោះនៃពលរដ្ឋអាម៉េរិក ដែលពេញចិត្តការដោះស្រាយបញ្ហាអន្តោប្រវេសន៍របស់លោក ត្រាំ ដោយធ្លាក់ចុះពី៤៩% នៅដើមអាណត្តិទី២របស់លោក។ ប្រមាណពាក់កណ្តាលនៃអ្នកឆ្លើយនៅក្នុងការស្ទង់មតិយល់ថា លោក ត្រាំ បានធ្វើជ្រុលពេកក្នុងការនិរទេសជនអន្តោប្រវេសន៍ខុសច្បាប់ និងការរឹតបន្តឹងអន្តោប្រវេសន៍ស្របច្បាប់។ ពលរដ្ឋអាម៉េរិកជាច្រើនក៏យល់ដែរថា ការប្រើប្រាស់ការត្រួតពិនិត្យចរាចរណ៍ ដើម្បីចាប់ខ្លួនជនអន្តោប្រវេសន៍ និងការបញ្ជូនភ្នាក់ងារអន្តោប្រវេសន៍សហព័ន្ធចូលទៅទីក្រុងនានា គឺជាវិធានការជ្រុលហួសហេតុ។
ទោះបីការគាំទ្ររបស់សាធារណជនធ្លាក់ចុះយ៉ាងណាក្ដី ក៏ប្រមាណ៨០% នៃអ្នកគាំទ្រគណបក្សសាធារណរដ្ឋនៅតែគាំទ្រគោលនយោបាយអន្តោប្រវេសន៍របស់លោក ត្រាំ ដែលធ្វើឱ្យបញ្ហានេះនៅតែជាចំណុចខ្លាំងបំផុតរបស់លោក បើធៀបការគ្រប់គ្រងសេដ្ឋកិច្ច និងសង្គ្រាមជាមួយអ៊ីរ៉ង់។ ការស្ទង់មតិនេះ ក៏បង្ហាញដែរថា អត្រាពេញចិត្តចំពោះការគ្រប់គ្រងសេដ្ឋកិច្ចរបស់លោក ត្រាំ បានធ្លាក់មកនៅត្រឹម ៣២% ខណៈមានតែប្រមាណ៣០%ប៉ុណ្ណោះ ដែលពេញចិត្តការដោះស្រាយវិស័យសុខាភិបាល។ ពលរដ្ឋអាម៉េរិកភាគច្រើននៅតែវាយតម្លៃថា ស្ថានភាពសេដ្ឋកិច្ចរបស់ប្រទេសកំពុងស្ថិតក្នុងសភាពមិនល្អ។
លទ្ធផលនេះបានបង្ហាញថា ទោះបីជាគោលនយោបាយអន្តោប្រវេសន៍ដ៏តឹងរ៉ឹងរបស់លោក ត្រាំ នៅតែទទួលបានការគាំទ្រពីមូលដ្ឋានអ្នកគាំទ្ររបស់លោកយ៉ាងណាក្ដី ក៏ពលរដ្ឋអាម៉េរិកកាន់តែច្រើនកំពុងបង្ហាញក្តីបារម្ភថា វិធានការបង្ក្រាបអន្តោប្រវេសន៍របស់លោកមានភាពហួសហេតុពេក ខណៈប្រទេសនេះកំពុងខិតជិតការបោះឆ្នោតពាក់កណ្តាលអាណត្តិនៅឆ្នាំ២០២៦ នេះ៕
ដោយ: តែម សុខុម