លទ្ធផលនៃការស្ទង់មតិរបស់វេទិកាគ្រឹះស្ថានរូបិយវត្ថុ និងហិរញ្ញវត្ថុផ្លូវការ (OMFIF) ដែលត្រូវបានចេញផ្សាយនៅថ្ងៃទី៤ ខែមិថុនា ជាការស្រាយចម្ងល់ជុំវិញមន្ទិលសង្ស័យ និងការលើកឡើងថា ប្រទេសនានាកំពុងធ្វើពិពិធកម្មរូបិយប័ណ្ណឈានទៅរកការធ្វើបដិដុល្លារនីយកម្ម ឬឈប់ប្រើប្រាស់ប្រាក់ដុល្លារ សម្រាប់ការទូទាត់ពាណិជ្ជកម្មអន្តរជាតិ។
១៨%នៃថ្នាក់ដឹកនាំធនាគារកណ្ដាលដែលត្រូវបានស្ទង់មតិនិយាយថា ពួកគេមានបំណងបង្កើនការកាន់កាប់ប្រាក់ដុល្លារអាម៉េរិក នៅរយៈពេល១ទៅ២ឆ្នាំខាងមុខច្រើនជាងរូបិយប័ណ្ណណាៗទាំងអស់។ ពួកគេបានផ្ដល់ហេតុផលសំខាន់ចំនួន២ សម្រាប់ការបង្កើនការកាន់កាប់ប្រាក់ដុល្លារអាម៉េរិក ហេតុផលទី១ គឺការរំពឹងទទួលបានផលចំណេញខ្ពស់ និងទី២ ដោយសារប្រាក់ដុល្លារអាម៉េរិក មានសារសំខាន់ និងឥទ្ធិពលខ្លាំងនៅក្នុងពាណិជ្ជកម្មទូទាំងពិភពលោក។
ទោះជាយ៉ាងណាក្នុងពេលជាមួយគ្នានេះតម្រូវការរូបិយប័ណ្ណយន់របស់ប្រទេសចិន ក្នុងចំណោមធនាគារកណ្ដាលនានា បានធ្លាក់ចុះទៅវិញ។ ១២%នៃថ្នាក់ដឹកនាំមកពីធនាគារកណ្ដាលចំនួន៧៣ ដែលត្រូវបានស្ទង់មតិនិយាយថា ពួកគេគ្រោងនឹងកាត់បន្ថយការកាន់កាប់ប្រាក់យន់របស់ចិនក្នុងរយៈពេល១ទៅ២ឆ្នាំខាងមុខ ខណៈ១៣%ទៀតនិយាយគ្រោងបង្កើនការកាន់កាប់ប្រាក់យន់៕
ដោយ: តែម សុខុម
