សម្តេច តេជោ ហ៊ុន សែន បានថ្លែងនៅក្នុងសន្និសីទសារព័ត៌មានក្រោយពេលសម្តេចទទួលចាក់វ៉ាក់សាំង AstraZeneca នាព្រឹកថ្ងៃទី ០៤ ខែមីនា ឆ្នាំ២០២១ថា«នៅក្នុងឱកាសនៃការទទួលចាក់វ៉ាក់សាំងនៅថ្ងៃនេះ អនុញ្ញាតឲ្យខ្ញុំយកឱកាសនេះថ្លែងអំណរគុណជាថ្មីដល់សាធារណរដ្ឋប្រជាមានិតចិន ដែលបានផ្តល់ឲ្យយើងនូវជំនួយវ៉ាក់សាំង សម្រាប់ការចាក់ក្នុងជំហានដំបូងចំនួន៦០ម៉ឺនដូស ហើយនឹងមកបន្តទៀតនៅមុនចូលឆ្នាំខ្មែរចំនួន៤០ម៉ឺនដូស ទាំងអស់១លានដូស។ តែខ្ញុំកំពុងតែរំពឹងគិតទុកថា នឹងមានលើសពី ១លានដូស ដែលនឹងត្រូវមកដល់កម្ពុជា»។
ប្រសិនបើវ៉ាក់សាំងកូវីដ-១៩ ស៊ីណូហ្វាមចំនួន ៤០ម៉ឺនដូសខាងលើមកដល់កម្ពុជាដូចការគ្រោងទុក បានន័យថា ក្នុងរយៈពេល៣ខែ កម្ពុជាទទួលបានជំនួយវ៉ាក់សាំងពីក្រៅប្រទេសសរុបជាង ១លាន៣២ម៉ឺនដូស។ បន្ទាប់ពីវ៉ាក់សាំងចំនួន ៣២៤,០០០ដូស ដែលជាជំនួយរបស់មជ្ឈមណ្ឌលកូវ៉ាក់ ត្រូវបានដឹកមកដល់កម្ពុជាកាលពីយប់ថ្ងៃទី២ ខែមីនា ឆ្នាំ២០២១។
អត្ថបទទាក់ទង!
បើតាមសម្តេចនាយករដ្ឋមន្ត្រី ហ៊ុន សែន វ៉ាក់សាំងកូវីដ-១៩ AstraZeneca ទាំង៣២៤,០០០ដូសនឹងត្រូវបែងចែកឲ្យប្រើប្រាស់ក្នុងរាជធានីខេត្តចំនួន៣រួមមានរាជធានីភ្នំពេញ កណ្តាល និងខេត្តព្រះសីហនុ ព្រោះ សម្តេច យល់ថា ខេត្តទាំងបីនេះជាទីតាំង ដែលមានការប្រឈមខ្ពស់ក្នុងការឆ្លងរីករាលដាលនៃជំងឺកូវីដ-១៩។
ជាមួយគ្នានេះ សម្តេចស្នើឲ្យក្រសួងសុខាភិបាលរៀបចំកម្មវិធីចាក់សាំងកូវីដ-១៩ ជូនប្រជាពលរដ្ឋ ដែលមានអាយុលើស៦០ឆ្នាំនៅតាមមូលដ្ឋានខេត្ត ដែលមានហានិភ័យឆ្លងជំងឺកូវីដ-១៩ ខ្ពស់៕
None
