លោកវេជ្ជបណ្ឌិត ស៊ូប៉ាគីត ស៊ីរីឡាក់ (SUpakit Sirilak) ដែលជាអគ្គនាយក វិទ្យាសាស្ត្រវេជ្ជសាស្ត្រថៃ បាននិយាយថា មេរោគបំប្លែងថ្មី ឌែលតា ដែលត្រូវបានកំណត់អត្តសញ្ញាណដំបូងនៅប្រទេសឥណ្ឌាបានចូលវាយលុកលុយពាសពេញប្រទេសថៃចំនួន ៧៦ខេត្ត ក្នុងចំណោម ៧៧ខេត្តរបស់ប្រទេសថៃ។ លោកបានបញ្ជាក់ថា អាជ្ញាធរថៃបាននឹងកំពុងសិក្សាពីការឆ្លងថ្មីរៀងរាល់សប្តាហ៍ ហើយក្នុងចំណោមសំណាកជាង ១ពាន់ ៦រយសំណាក ដែលត្រូវបានស្ទង់មតិកាលពីសប្តាហ៍មុន មានចំនួន ១ពាន់ ៥០០ សំណាក ឬ ស្មើនឹងជិត ៩២% បានឆ្លងមេរោគបម្លែងថ្មី ឌែលតា ខណៈ សំណាកចំនួន ១២៩ ផ្សេងទៀត ឬ ជិត៨% ជាករណីឆ្លងមេរោគកូវីដ-១៩ប្រភេទ អាល់ហ្វា និង ៤សំណាកផ្សេងទៀត ឬស្មើ ០,២% ជាប្រភេទ បែលតា។
ករណីឆ្លងកូវីដក្នុងប្រទេសថៃ បានបង្ហាញថា មេរោគបំប្លែងថ្មី ឌែលតា មានសន្ទុះឆ្លងលឿនរហ័សជាងគេ ហើយលើសពីនេះវាត្រូវបានរកឃើញនៅគ្រប់ខេត្តទាំងអស់ក្នុងប្រទេសថៃ។ ស្របពេលដែល មេរោគ បែលតា នៅតែបន្តរកឃើញនៅខេត្តភាគខាងត្បូងប្រទេស ចំណែកឯ វត្តមាន មេរោគប្រភេទ អាល់ហ្វា អាចនឹងមិនត្រូវបានរកឃើញតទៅទៀតនោះទេ។
អត្ថបទគួរអាន
យ៉ាងណាមិញ បច្ចុប្បន្ននេះ មានអ្នកជំងឺ ៣៥៤ នាក់ នៅខេត្ត ណារ៉ាធីវ៉ាត់ និង ៤នាក់ នៅភូកេត និង ម្នាក់ទៀត នៅផាត់ថាលុង ត្រូវបានឆ្លងមេរោគប្រភេទបែលតា ។ បើតាមអ្នកជំនាញអះអាងថា មេរោគបំប្លែងថ្មី ប្រភេទ បែលតា គឺវាមានលក្ខណៈខុសពីមេរោគប្រភេទ ឌែលតា ដោយសារតែ វាមានល្បឿនឆ្លងយឺតជាងប្រភេទឌែលតា ដូច្នេះគឺគេងាយស្រួលក្នុងការគ្រប់គ្រងមេរោគប្រភេទនេះ។
សូមបញ្ជាក់ថា ប្រទេសថៃបានក្លាយជាប្រទេសដែលជាប់ចំណាត់ថ្នាក់ទី ៣៥ ក្នុងចំណោមប្រទេស ១៨៤ ប្រទេសក្នុងពិភពលោក ដែលមានការឆ្លងរីករាលដាលកូវីដ-១៩ ច្រើនជាងគេ។
ជាក់ស្តែង កាលពីថ្ងៃពុធ ទី១១ខែសីហា ប្រទេសថៃបានកត់ត្រាករណីឆ្លងថ្មីនៃជំងឺកូវីដ ១៩ ចំនួនជាង ២ម៉ឺន នាក់ និង អ្នកស្លាប់ចំនួនប្រមាណ ២០០ នាក់ដែលធ្វើឱ្យចំនួនអ្នកឆ្លងសរុបនៅក្នុងប្រទេសថៃ កើនដល់ជាង ៨សែននាក់ និង ស្លាប់ចំនួនជិត ៦ពាន់ ៨០០នាក់។ ខណៈពលរដ្ឋថៃទទួលបានវ៉ាក់សាំងមួយដូសមានចំនួនប្រមាណ ១៦លាននាក់ និង ពលរដ្ឋទទួលបានពីរដូសមានចំនួនប្រមាណជាង ៤លាន ៥សែននាក់៕
អត្ថបទ៖ ស៊ើង និមល់
None
