លោក បៃដិន កំណត់ជួបលោក ស៊ី ជិនពីង លើទឹកដីអាមេរិក នៅខែក្រោយ

លោក ចូ បៃដិន ​បានប្រាប់អ្នកកាសែតថា អំឡុងកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលនឹងរៀបចំឡើងនៅលើទឹកដីអាមេរិក ក្នុងទីក្រុងសានហ្វ្រេនស៊ីស្កូ នៅខែវិច្ឆិកា ក្រោយនេះ លោកបានកំណត់ជាមួយក្តីសង្ឃឹមខ្ពស់ថា នឹងជួបជាមួយលោក ស៊ី ជិនពីង មេដឹកនាំកំពូលចិន។ យ៉ាងណា លោក បៃដិន បានបញ្ជាក់ថា មិនទាន់មានកាលវិភាគណាមួយត្រូវបានកំណត់ច្បាស់លាស់នៅឡើយទេ។

គួរជម្រាបថា កិច្ចប្រជុំកំពូលកិច្ចសហប្រតិបត្តិការសេដ្ឋកិច្ច អាស៊ី-ប៉ាស៊ីហ្វិក (APEC) ដែលសហរដ្ឋអាមេរិក ជាម្ចាស់ផ្ទះនៅឆ្នាំនេះ នឹងរៀបចំឡើងរយៈពីរថ្ងៃ គឺពីថ្ងៃទី១៦ ដល់១៧ ខែវិច្ឆិកា ក្នុងទីក្រុងសានហ្វ្រេនស៊ីស្កូ រដ្ឋកាលីហ្វ័រញ៉ា ដែលមានប្រទេសសមាជិកប្រមាណ២១ប្រទេស។

យោងតាមការចុះផ្សាយដោយកាសែត Washington Post ដោយស្រង់សំដីមន្ត្រីអាមេរិក មុនការលើកឡើងរបស់លោក បៃដិន នេះថា សេតវិមានបានរៀបចំគម្រោងសម្រាប់ជំនួបនេះតាំងពីយូរ គឺដើម្បីសម្រួលឡើងវិញនូវទំនាក់ទំនងចិន-អាមេរិក។

ក្នុងនោះ រដ្ឋមន្ត្រីការបរទេសចិន លោក វ៉ាង យី ត្រូវបានគេរំពឹងថា នឹងធ្វើដំណើរមកទីក្រុងវ៉ាស៊ីនតោនមុនកិច្ចប្រជុំ APEC ក្នុងការបើកផ្លូវសម្រាប់ជំនួបលោក បៃដិន ជាមួយលោក ស៊ី ជិនពីង។

យ៉ាងណាមិញ ទីក្រុងប៉េកាំង មិនទាន់មានការបញ្ជាក់ផ្លូវការថា លោក ស៊ី ជិនពីង នឹងមកចូលរួមផ្ទាល់ក្នុងកិច្ចប្រជុំ APEC ឬជួបសមភាគីសហរដ្ឋអាមេរិកនោះទេ។ ទន្ទឹមគ្នានេះ សេតវិមានក៏មិនបានបញ្ជាក់ច្បាស់ពីជំនួបមេដឹកនាំទាំងពីរដែរ។

មែនទែនទៅ លោក ចូ បៃដិន និងលោក ស៊ី ជិនពីង មានជំនួបចុងក្រោយបង្អស់ក្នុងខែវិច្ឆិកា ឆ្នាំមុន នៅឯជំនួប G20 នៅកោះបាលី ប្រទេសឥណ្ឌូណេស៊ី។ នៅកាលនោះ មេដឹកនាំទាំងពីរបានបង្ហាញពីភាពស្និទស្នាល ហើយទំនាក់ទំនងប្រទេសទាំងពីរ ក៏ចុះត្រជាក់មកវិញ។

ប៉ុន្តែ ចាប់តាំងពីពេលនោះមក ទំនាក់ទំនងចិន-អាមេរិក ហាក់ប្រែមានភាពតានតឹងឡើងវិញ ហើយលោក ចូ បៃដិន និងលោក ស៊ី ក៏លែងមានជំនួបនឹងគ្នាតទៅទៀត សូម្បីតែជំនួបតាមទូរសព្ទដែលមេដឹកនាំទាំងពីរធ្លាប់ធ្វើកាលពីពេលមុនៗមក។

បើគេមើលឱ្យមែនទែនទៅ មានបញ្ហាចាក់ស្រេះជាច្រើនក្នុងទំនាក់ទំនងរវាងមហាអំណាចគូប្រជែងទាំងពីរ ដែលមិនងាយនឹងដោះស្រាយបានឡើយ។ ជាអាទិ៍ដូចជា សំណុំរឿងកោះតៃវ៉ាន់ ការអាងយ៉ាងយោធាចិន នៅក្នុងតំបន់ ក៏ដូចជាពិភពលោក រឿងបាឡុងចារកម្មចិន និងជាពិសេសការប្រណាំងប្រជែងឥទ្ធិពលគ្នាខ្លាំងក្នុងពិភពលោកតាមរយៈរូបភាពការទូត យោធា សេដ្ឋកិច្ចរយៈមួយឆ្នាំចុងក្រោយមកនេះ។

កាលពីជំនួប G20 ដែលធ្វើឡើងក្នុងប្រទេសឥណ្ឌា កាលពីខែមុន លោក ស៊ី ជិនពីង មិនបានមកចូលរួមឡើយ ដែលធ្វើឱ្យលោក ចូ បៃដិន មានការសោកស្តាយបំផុត ក្រោយរំពឹងថា នឹងបានជួបនៅក្នុងឱកាសនោះ។

ទោះជាយ៉ាងណា ក្នុងជំនួប APEC ខាងមុខនេះ គេដាក់ក្តីសង្ឃឹមខ្ពស់ថា មេដឹកនាំទាំងពីរនឹងអាចជួបគ្នា ដ្បិតថា ក្របខណ្ឌសេដ្ឋកិច្ចអាស៊ីប៉ាស៊ីហ្វិកផ្តោតសំខាន់ទៅលើកិច្ចសហប្រតិបត្តិការសេដ្ឋកិច្ចក្នុងតំបន់ ហើយដែលប្រទេសមហាអំណាចចិន និងអាមេរិក កំពុងប្រជែងគ្នាខ្លាំងក្នុងតំបន់យុទ្ធសាស្ត្រនេះ៕