ការទទួលបានប្រេងពីរុស្ស៊ីនេះ ត្រូវបានគេមើលឃើញថា ធ្វើឡើងនៅក្រោយពេលដែលមេដឹកនាំសំខាន់ៗនៃប្រទេសទាំងពីរ នៅមួយរយៈពេលចុងក្រោយនេះ បានជួបគ្នា និងបង្ហាញពីទំនាក់ទំនងកាន់តែស្អិតល្មួត ទោះបីជាបច្ចុប្ន្ន ពួកគេកំពុងរងសម្ពាធខ្លាំងក្លាពីសំណាក់ប្រទេសលោកខាងលិចក៏ដោយ។
ប្រទេសមីយ៉ាន់ម៉ា គឺជាប្រទេសចុងក្រោយគេ ដែលបានសម្រេចនាំចូលប្រេងពីរុស្សី ខណៈដែលប្រទេសទាំងពីរកំពុងខិតទៅរកជិតគ្នាកាន់តែខ្លាំងឡើងៗ នៅចំពោះមុខទណ្ឌកម្មដែលប្រទេសលោកខាងលិចបានដាក់ ពោលគឺក្រោយរបបសឹកផ្ដួលរលំរដ្ឋាភិបាលស៊ីវិលមីយ៉ាន់ម៉ាដោយការធ្វើរដ្ឋប្រហារ និងបន្ទាប់ពីទីក្រុងម៉ូស្គូចូលលុកលុយឈ្លានពានអ៊ុយក្រែន។
អ្នកនាំពាក្យរបបយោធាមីយ៉ាន់ម៉ា លោកហ្សរ មីន ទុន (Zaw Min Tun) បាននិយាយក្នុងសន្និសីទសារព័ត៌មានកាលពីថ្ងៃពុធ ទី១៧ សីហាថា «មីយ៉ាន់ម៉ាបានទទួលការអនុញ្ញាតឱ្យនាំចូលប្រេងឥន្ធនៈពីប្រទេសរុស្ស៊ី ព្រោះវាមានគុណភាព និងតម្លៃទាប»។
អ្នកនាំពាក្យរូបនេះ បានបន្ថែមថា មីយ៉ាន់ម៉ាក៏កំពុងពិភាក្សាលើការរុករកប្រេងរួមគ្នានៅក្នុងប្រទេសផ្ទាល់ ជាមួយប្រទេសចិន និងរុស្សីផងដែរ។
មែនទែនទៅ លោកហ្សរ មីន ទុន បានបង្ហើបថា ការនាំចូលប្រេង និងឧស្ម័នពីប្រទេសរុស្សីធ្វើឡើងក្រោយមេដឹកនាំរបបយោធា លោក Min Aung Hlaing បានពិភាក្សាអំពីរឿងនេះ ក្នុងអំឡុងពេលលោកធ្វើដំណើរទស្សនកិច្ចទៅរុស្សីកាលពីខែមុន។
យោងតាមប្រព័ន្ធផ្សព្វផ្សាយក្នុងស្រុកមីយ៉ាន់ម៉ា បានឲ្យដឹងថា ការដឹកជញ្ជូនប្រេងឥន្ធនៈនេះ នឹងត្រូវធ្វើឡើងនៅខែកញ្ញាខាងមុខ។
បើយោងតាមសេចក្តីថ្លែងការណ៍មួយ ដែលបានចេញផ្សាយនៅក្នុងកាសែតរដ្ឋ កាលពីថ្ងៃទី ១៧ខែសីហាបានចុះផ្សាយថា រដ្ឋាភិបាលយោធាមីយ៉ាន់ម៉ាបានបង្កើតគណៈកម្មាធិការមួយ ដើម្បីទិញប្រេងពីរុស្ស៊ី ដែលនឹងដឹកនាំដោយសម្ព័ន្ធមិត្តជិតស្និទ្ធរបស់លោក Min Aung Hlaing ក្នុងការត្រួតពិនិត្យការទិញ ការនាំចូល ព្រមទាំងការដឹកជញ្ជូនឥន្ធនៈក្នុងតម្លៃសមរម្យ ដោយផ្អែកលើតម្រូវការរបស់ប្រទេសមីយ៉ាន់ម៉ាបច្ចុប្បន្ន។
អត្ថបទគួរអាន
ជាមួយគ្នានេះដែរ មេដឹកនាំរបបសឹកមីយ៉ាន់ម៉ាកាលពីថ្ងៃពុធ បានចេញមុខរិះគន់ចំៗលើក្រុមប្រទេសអាស៊ាន ក្រោយក្រុមមេដឹកនាំតំបន់មួយនេះ មិនបានរាប់បញ្ចូលមេដឹកនាំរបស់ខ្លួន ឲ្យចូលរួមកិច្ចប្រជុំអាស៊ានថ្នាក់រដ្ឋមន្ត្រីការបរទេសនាពេលកន្លងទៅ ដោយមីយ៉ាន់ម៉ាក៏ជាសមាជិកមួយផងដែរនោះ។
ការលើកឡើងនេះធ្វើឡើង ដោយអ្នកនាំពាក្យរបបយោធា លោក Zaw Min Tun បានប្រាប់សន្និសីទសារព័ត៌មានមួយថា អាស៊ានកំពុងរំលោភលើគោលនយោបាយ «មិនជ្រៀតជ្រែកកិច្ចការផ្ទៃក្នុង»របស់ប្រទេសមួយរបស់ខ្លួនហើយ ស្របពេលដែលមីយ៉ាន់ម៉ាកំពុងប្រឈមមុខនឹង «សម្ពាធពីខាងក្រៅ»។
លោកបានសង្កត់ធ្ងន់ថា «ប្រសិនបើកៅអីនៃតំណាងប្រទេសមួយនៅទំនេរ នោះអាស៊ានមិនគួរដាក់ស្លាកថា កិច្ចប្រជុំកំពូលអាស៊ាននោះទេ»។
ទោះបីជាយ៉ាងណាក៏ដោយចុះ សមាគមប្រជាជាតិអាស៊ីអាគ្នេយ៍ (ASEAN) បានរារាំងមេដឹកនាំរបបយោធាមីយ៉ាន់ម៉ាមិនឲ្យចូលរួមកិច្ចប្រជុំកំពូលនាថ្មីៗនេះទេ ក្រោយពីបានមើលឃើញថា របបយោធាមិនបានគោរពតាមគោលការណ៍ឯកច្ឆន្ទកុងសង់ស៊ីសទាំងប្រាំចំណុច ដែលបានព្រមព្រៀងគ្នាកាលពីមុនមកនោះទេ។
បន្ថែមពីលើភាពចលាចលផ្នែកនយោបាយ និងសង្គម មីយ៉ាន់ម៉ាក៏បានរងផលប៉ះពាល់មិនតិចដែរពីការឡើងតម្លៃប្រេងឥន្ធនៈខ្ពស់ និងការដាច់ចរន្តអគ្គិសនី ដែលជំរុញឱ្យមេដឹកនាំយោធាងាកទៅរកការនាំចូលប្រេងឥន្ធនៈដែលអាចប្រើប្រាស់ក្នុងរោងចក្រថាមពលវិញ។
គួរជម្រាបថា តម្លៃប្រេងសាំងបានកើនឡើងប្រហែល ៣៥០% ចាប់តាំងពីរដ្ឋប្រហារកាលពីខែកុម្ភៈឆ្នាំមុន ទៅដល់ជាង ១ ដុល្លារក្នុងមួយលីត្រ។ ហើយយោងតាមរបាយការណ៍របស់ប្រព័ន្ធផ្សព្វផ្សាយរដ្ឋបានឲ្យដឹងថា កាលពីសប្តាហ៍មុន ស្ថានីយ៍ប្រេងឥន្ធនៈ បានបិទនៅតាមតំបន់ផ្សេងៗនៃប្រទេស ដោយសារកង្វះខាតផងដែរ៕
