ក្រុមហ៊ុនល្បែងកាស៊ីណូដ៏ធំ Nagacorp ប្រកាសប្រាក់ចំណេញសុទ្ធជាង១០០លាននៅឆ្នាំ២០២០ ទោះបីមានវិបត្តិកូវីដ-១៩កើតឡើងក្ដី

តាមរបាយការណ៍ប្រចាំឆ្នាំរបស់ក្រុមហ៊ុន Nagacorp បានឲ្យដឹងទៀតថា នៅឆ្នាំ២០២០ ប្រាក់ចំណូលរបស់ក្រុមហ៊ុនសម្រេចបានជាង៨៧៨លានដុល្លារមានការធ្លាក់ចុះ៥០% ធៀបនឹងឆ្នាំ២០១៩។

ក្នុងនោះដែរ ចំពោះប្រាក់ចំណូលពីវិស័យល្បែងរបស់កាស៊ីណូណាហ្គាវើលនៅឆ្នាំ២០២០ មានប្រមាណ៨៧០លានដុល្លារ ពោលគឺមានការធ្លាក់ចុះដល់ទៅជាង៤៩%។

ការស្ទុះងើបឡើងវិញនៃអាជីវកម្មល្បែងបានធ្វើឲ្យចំណូល Nagacorp មានការកើនឡើងនៅក្នុងឆមាសទី២នៅឆ្នាំ២០២០ ហើយអ្នកដែលបានចូលមកលេងល្បែងនៅកាស៊ីណូច្រើនជាងគេ គឺភ្ញៀវមកពីតំបន់អាស៊ីខាងកើត រួមមានមកពីប្រទេសចិន កូរ៉េខាងត្បូង និងកោះតៃវ៉ាន់ជាដើម។

ថ្មីនេះដែរ ក្រុមហ៊ុន Nagacorp ក៏បានបង្ហាញពីសំណើរសុំគម្រោងអភិវឌ្ឍរបស់ខ្លួនតម្លៃ ៣៥០លានដុល្លារលើការអភិវឌ្ឍរមណីដ្ឋានមិនមានសេវាល្បែង នៅក្បែរតំបន់ប្រសាទអង្គរវត្ត ខេត្តសៀមរាបផងដែរ។

គួរបញ្ជាក់ថា កាលពីដើមខែមីនា កាស៊ីណូណាហ្គាវើលក៏ទើបតែត្រូវបានផ្អាកបណ្ដោះអាសន្ន ដោយសារតែជាប់ពាក់ព័ន្ធព្រឹត្តិការណ៍សហគមន៍២០កុម្ភៈ ក្រោយពីបុគ្គលិកបម្រើការនៅកាស៊ីណូនេះត្រូវបានរកឃើញថាមានឆ្លងកូវីដ-១៩ ជាបន្ដបន្ទាប់រហូតដល់១១នាក់ ហើយក្រុមហ៊ុនក៏មិនទាន់ប្រកាសពីថ្ងៃដែលនឹងការបើកកាស៊ីណូឡើងវិញនៅឡើយដែរ។

ក្រុមហ៊ុនសេវាកម្មវិនិយោគMoody បានបញ្ជាក់នាពេលថ្មីៗនេះដែរ ការផ្អាកបណ្ដោះអាសន្ននូវអាជីវកម្មកាស៊ីណូណាហ្គាវើល នឹងធ្វើឲ្យមានបញ្ហាអវិជ្ជមានដល់សាច់ប្រាក់របស់ក្រុមហ៊ុន Nagacorp៕