ក្នុងលិខិតដដែលនោះ បានឲ្យដឹងទៀតថា ក្រៅតែពីការស្នើឲ្យគ្រប់គ្រឹះស្ថានធនាគារ និងហិរញ្ញវត្ថុផ្អាកការបែងចែកភាគលាភនៅឆ្នាំ២០២០ហើយនោះ ធនាគារជាតិក៏បានស្នើឲ្យគ្រឹះស្ថានធនាគារ និងហិរញ្ញវត្ថុទាំងអស់ មានការរៀបចំយុទ្ធសាស្ត្រចាកចេញ (Exit Strategy) សមសម្រប បន្ទាប់ពីមានការអនុគ្រោះនានាពីធនាគារជាតិត្រូវបានបញ្ចប់។
ខេមបូណូមីស បានទំនាក់ទំនងទៅប្រធានសមាគមធនាគារកម្ពុជា លោកបណ្ឌិត អ៊ិន ចាន់នី ប៉ុន្ដែលោកសូមមិនធ្វើអធ្ថាធិប្បាយចំពោះលិខិតរបស់ធនាគារជាតិខាងលើនេះទេ។ ដោយឡែក ប្រធានសមាគមមីក្រូហិរញ្ញវត្ថុកម្ពុជា លោក គា បូរាណ ឯណោះវិញ ក្រុមការងារយើងបានទូរស័ព្ទចូលជាច្រើនសារតែមិនលើកទូរស័ព្ទនោះទេ។ ក្រុមការងារយើងក៏បានបន្ដទូរសព្ទទៅកាន់លោកជំទាវ ជា សិរី អគ្គនាយិកាឧបការីទេសាភិបាល និងជាអគ្គនាយិការបច្ចេកទេស នៃធនាគារជាតិនៃកម្ពុជាដែរ ប៉ុន្ដែ ជំនួយការរបស់លោកជំទាវជាអ្នកលើកទូរសព្ទ និងបានប្រាប់ថាលោកជំទាវ ជា សិរីកំពុងប្រជុំ។អត្ថបទគួរអាន
ជុំវិញនឹងបញ្ហានេះ ឯកឧត្តម ហុង សុហូរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានលើកឡើងថា សំណើរបស់ធនាគារជាតិនៃកម្ពុជា ដែលបានស្នើឲ្យផ្អាកការបែងចែកភាគលាភនេះ គឺជាជម្រើសរបស់ខាងធនាគារជាតិក្នុងការចេញគោលការណ៍បែបនេះ ព្រោះធនាគារជាតិជាអាជ្ញាធរអាណាព្យាបាល។ ប៉ុន្ដែ ក្រុមហ៊ុនដែលជាគ្រឹះស្ថានធនាគារ និងមីក្រូហិរញ្ញវត្ថុ ពួកគេប្រហែលជាស្គាល់ស្ថានភាពហិរញ្ញវត្ថុខ្លួនឯងច្បាស់ជាងយើងជាអ្នកក្រៅ។ ដូច្នេះ ទោះបីជា ធនាគារជាតិ មិនចេញគោលការណ៍បែបនេះ ក៏ក្រុមហ៊ុនគួរតែដឹងខ្លួនឯងហើយថា គួរចែក ឬមិណគួរចែកភាគលាភនេះ។
យ៉ាងណាក៏ដោយចុះ បើតាមធនាគារជាតិនៃកម្ពុជា
បានគូសបញ្ជាក់ថា ចាប់តាំងពីអំឡុងពេលផលប៉ះពាល់ពីការរីករាលដាលកូវីដ-១៩
រហូតមកដល់បច្ចុប្បន្ន ធនាគារជាតិ បានដាក់ចេញនូវវិធានការជាច្រើនដើម្បីបន្ធូរបន្ថយលើការអនុវត្តបទប្បញ្ញត្តិរបស់គ្រឹះស្ថានធនាគារ
និងហិរញ្ញវត្ថុ ស្របតាមគោលនយោបាយរបស់រាជរដ្ឋាភិបាល
ហើយវិស័យធនាគារនៅតែមានភាពរឹងមាំ
និងបន្ដមានប្រាក់ចំណេញក្នុងបរិបទសេដ្ឋកិច្ចបច្ចុប្បន្ន។
តាមតួលេខពីធនាគារជាតិនៃកម្ពុជា បានប៉ាន់ស្មានថា នៅឆ្នាំ២០២០ ឥណទានអតិថិជននៅក្នុងវិស័យធនាគារសម្រេចបានដល់ទៅជាង ៣៧ពាន់លានដុល្លារ កើនឡើងជិត១៥% ធៀបនឹងឆ្នាំ២០១៩ ខណៈដែលប្រាក់បញ្ញើអតិថិជនវិញ មានប្រមាណជិត ៣៤ពាន់លានដុល្លារអាមេរិក កើនជាង១៥%។ ដោយឡែក ទ្រព្យសកម្មរបស់ប្រព័ន្ធធនាគារនៅឆ្នាំ២០២០វិញ មានដល់ទៅជាង ៥៩ពាន់លានដុល្លារ កើនជិត១៦%។ តាមតួលេខនេះ បង្ហាញថា ទ្រព្យសកម្មរស់ប្រព័ន្ធធនាគារ មានប្រមាណជាង ២០០% នៃផលិតផលក្នុងស្រុកសរុបរបស់កម្ពុជា៕
សូមទស្សនាសេចក្តីរាយការណ៍បន្ថែមខាងក្រោម៖
None
