យោងតាមសេចក្ដីប្រកាសព័ត៌មានដដែលនេះ បានឲ្យដឹងថា សម្រាប់ខែទី៤ នៃការបើកប្រាក់ឧបត្ថម្ភជូនដល់ពលរដ្ឋក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងនឹងកូវីដី-១៩ គឺបានចាប់ផ្ដើមបើកផ្ដល់ជូននៅទី ២៥ ខែកញ្ញា ឆ្នាំ២០២០មកម្ល៉េះ។ សម្រាប់ខែទី៤នេះ រាជរដ្ឋាភិបាលគ្រោងនឹងចំណាយថវិកាប្រមាណ ៣០លានដុល្លារអាមេរិក សម្រាប់បើកជូនគ្រួសារក្រីក្រ និងងាយរងគ្រោះប្រមាណជិត៧០ម៉ឺនគ្រួសារ។
ចំនួនពលរដ្ឋក្រីក្រ និងងាយរងគ្រោះ ដែលរដ្ឋបើកប្រាក់ឧបត្ថម្ភផ្ដល់ជូននេះ គេសង្កេតឃើញថា មានចំនួនកើនឡើងជាបន្ដបន្ទាប់ ពោលគឺនៅខែដំបូងការផ្ដល់ជូននេះ មានចំនួនគ្រួសារក្រីក្រ តែជាង៥៣ម៉ឺនគ្រួសារប៉ុណ្ណោះ បន្ទាប់មកនៅខែទី២ បានកើនឡើងដល់ជិត៦០ម៉ឺនគ្រួសារ និងខែទី៣ កើនដល់ជាង៦៤ ម៉ឺនគ្រួសារ ខណៈដែលនៅខែទី៤នេះ កើនដល់ ៧០ម៉ឺនគ្រួសារ។
អត្ថបទទាក់ទង!
ប្រមុខរាជរដ្ឋាភិបាលកម្ពុជា សម្តេច ហ៊ុន សែន ធ្លាប់បានអះអាងថា រាជរដ្ឋាភិបាលនឹងចំណាយ២៥ លានដុល្លារក្នុងមួយខែ ដើម្បីឧបត្ថម្ភដល់គ្រួសារក្រីក្រ និងងាយរងគ្រោះទាំងនេះ បើទោះបីជាចំណូលប្រចាំខែរបស់រដ្ឋមានការធ្លាក់ចុះបន្ដិចក្ដី។
ធនាគារពិភពលោក ថ្មីៗនេះ ក៏បានព្យាករពីសេដ្ឋកិច្ចរបស់កម្ពុជាដែរថា អាចនឹងមាន -២% នៅឆ្នាំ ២០២០នេះ ដោយសារតែបញ្ហាចម្បង គឺបណ្ដាលមកពីការរីករាលដាលនៃកូវី-១៩ ហើយបញ្ហានេះ ក៏បានធ្វើឲ្យប៉ះពាល់ដល់សុខមាលភាពគ្រួសារ និងធ្វើឲ្យភាពក្រីក្រកាន់តែមានការកើនឡើងផងដែរ។
បើតាមក្រសួងសេដ្ឋកិច្ច និងហិរញ្ញវត្ថុ កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងកូវីដ-១៩ នេះ គឺបានដាក់ចេញឲ្យអនុវត្តជាផ្លូវការ កាលពីថ្ងៃទី ២៤ ខែមិថុនា ឆ្នាំ២០២០ មកម្ល៉េះ។ ក្រសួងសេដ្ឋកិច្ច បន្ថែមថា កម្មវិធីនេះ គឺជាការយកចិត្តទុកដាក់ចំពោះជីវភាព និងការលំបាករបស់គ្រួសារក្រីក្រ និងងាយរងគ្រោះ ដោយបានចូលរួមចំណែកជំរុញឲ្យមានការកែសម្រួលឲ្យកាន់តែប្រសើរឡើង នូវការកំណត់អត្តសញ្ញាណគ្រួសារក្រីក្រ និងជំរុញឲ្យក្រសួង-ស្ថាប័នពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិ ធ្វើការជាមួយគ្នាកាន់តែជិតស្និទ្ធថែមទៀត ក្នុងការអនុវត្តកម្មវិធីនេះ៕
None
