យោងតាមសេចក្ដីប្រកាសព័ត៌មានរបស់រាជរដ្ឋាភិបាលកម្ពុជា បានបញ្ជាក់ឲ្យដឹងថា ស្ថិតក្នុងបរិការណ៍នេះ ដោយពិនិត្យ និងថ្លឹងថ្លែងលើទិដ្ឋភាពនៃការវិវឌ្ឍនៃស្ថានភាពសេដ្ឋកិច្ច ពាណិជ្ជកម្ម និងសង្គម រាជរដ្ឋាភិបាលបានសម្រេចចេញនូវវិធានការបន្ថែមជុំទី៦ ក្នុងគោលបំណង បន្តទ្រទ្រង់ និងស្ដារអាជីវកម្ម និងធុរកិច្ច ឲ្យងើបឡើងវិញ ដើម្បីចូលរួមជំរុញកំណើនសេដ្ឋកិច្ច នៅក្នុងបរិការណ៍ក្រោយវិបត្តិ និងបន្តទំនុកបម្រុងដល់ ជីវភាពប្រចាំថ្ងៃរបស់គ្រួសារក្រីក្រ និងងាយរងគ្រោះ។
ក្នុងវិធានការជុំទី៦នេះ សម្រាប់កម្មករនិយោជិត ក្នុងវិស័យកាត់ដេរ និងទេសចរណ៍ ដែលបានត្រូវបានព្យួរការងារ នៅតែទទួលបានថវិកាឧបត្ថម្ភចំនួន ៤០ដុល្លារ ក្នុងមួយខែ សម្រាប់រយៈពេល ៣ខែបន្ថែមទៀត រហូតដល់ដំណាច់ខែធ្នូឆ្នាំ២០២០។ បន្ថែមពីនេះ សម្រាប់កម្មករនិយោជិតក្នុងវិស័យកាត់ដេរ ក៏នៅតែទទួលបានប្រាក់ឧបត្ថម្ភប្រចាំខែពីថៅកែរោងចក្រចំនួន ៣០ដុល្លារ ក្នុងមួយខែ រហូតដល់ដំណាច់ខែធ្នូឆ្នាំ២០២០ផងដែរ។
អត្ថបទទាក់ទង!
សម្រាប់សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីនៅនាយកដ្ឋានពន្ធដារ និងមានសកម្មភាពអាជីវកម្មនៅក្នុងរាជធានីភ្នំពេញ សៀមរាប ព្រះសីហនុ កែប កំពត បាវិត និងប៉ោយប៉ែត ក៏នៅតែទទួលបានការលើកលែងការបង់ពន្ធប្រចាំខែគ្រប់ប្រភេទ ចាប់ពីខែតុលា ដល់ខែធ្នូឆ្នាំ២០២០ និងមានការលើកលែងមួយចំនួនទៀត។
ចំពោះវិស័យអាកាសចរណ៍វិញ នៅតែបន្ដលើកលែងការបង់ពន្ធអប្បបរមា សម្រាប់រយៈពេល ៣ខែទៀត ចាប់ពីខែតុលា ដល់ខែធ្នូ ឆ្នាំ២០២០ ជូនដល់ក្រុមហ៊ុនអាកាសចរណ៍ដែលបានចុះបញ្ជីនៅកម្ពុជា។ បន្ថែមពីនេះ ក៏បន្ដពន្យារការបង់ប្រាក់ជំពាក់កម្រៃ អាកាសចរស៊ីវិល សម្រាប់រយៈពេល២ខែ បន្ថែមទៀត រហូតដល់ដំណាច់ខែធ្នូឆ្នាំ២០២០។
ដោយឡែក សម្រាប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ នៅតែបន្ដ អនុវត្តសម្រាប់រយៈពេល ៣ខែ បន្ថែមទៀត គឺចាប់ពីខែតុលា ដល់ខែធ្នូឆ្នាំ២០២០។
សូមបញ្ជាក់ថា បើតាមការអះអាងរបស់សម្តេច ហ៊ុន សែន កាលពីពេលកន្លងទៅបានឲ្យដឹងថា រាជរដ្ឋាភិបាលកម្ពុជាបានត្រៀមថវិកាប្រមាណ ៨០០លាន ទៅ ២ ពាន់លានដុល្លារអាមេរិក ដើម្បីប្រយុទ្ធប្រឆាំងនឹងកូវីដ-១៩ និងដើម្បីស្ដារ និងជំរុញកំណើនសេដ្ឋកិច្ចឡើងវិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
