បើតាមការអះអាងរបស់ធនាគារពិភពលោកបានឲ្យដឹងថា សេដ្ឋកិច្ច និងក្បាលម៉ាស៊ីនជំរុញកំណើនសេដ្ឋកិច្ចរបស់កម្ពុជា ពិសេសវិស័យសំណង់ ទេសចរណ៍ និងការនាំចេញទំនិញ គឺនៅតែបន្ដរងការប៉ះពាល់យ៉ាងធ្ងន់ធ្ងរពីវិបត្តិ ដែលបង្កឡើងដោយជំងឺកូវីដ-១៩។ ផ្អែកលើការធ្លាក់ចុះនៃក្បាលម៉ាស៊ីជំរុញកំណើនសេដ្ឋកិច្ចទាំងនេះ រួមជាមួយកត្តារួមផ្សំផ្សេងទៀត ធនាគារពិភពលោក បានព្យាករទុកថា សេដ្ឋកិច្ចកម្ពុជាសម្រាប់ឆ្នាំ២០២០ នឹងមាន-២% ដោយធនាគារនេះ បានចាត់ទុកថា វាគឺជាការធ្លាក់ចុះយ៉ាងគំហុកបំផុតមិនធ្លាប់មានក្នុងប្រវត្តិសាស្ត្រថ្មីៗនេះ របស់កម្ពុជា ហើយវាក៏អាចនឹងធ្វើឲ្យភាពក្រីក្រកើនឡើងខ្ពស់ជាងមុនផងដែរ។
អត្ថបទទាក់ទង!
លោក ច័ន្ទ សុផល ជាអ្នកសេដ្ឋកិច្ចឯករាជ្យ និងជានាយកមជ្ឈមណ្ឌលសិក្សាគោលនយោបាយ បានលើកឡើងដែរថា ដោយសារតែកូវីដ-១៩ បានធ្វើឲក្យ ការវិនិយោគពីសំណាក់ជនជាតិចិន មកកម្ពុជាដែលធ្លាប់មានយ៉ាងគំហុកនោះ បានធ្លាក់ចុះខ្លាំង ខណៈដែលវិស័យទេសចរណ៍ និងវិស័យកាត់ដេរក៏បាននិងកំពុងរងផលប៉ះពាល់យ៉ាងដំណំដែរ។ ផ្អែក តាមការតាមដាន និងអង្កេតរបស់លោកផ្ទាល់ សេដ្ឋកិច្ចកម្ពុជាយ៉ាងហោចណាស់ ក៏អាចនឹងធ្លាក់ចុះដល់ -៥% ដែរនៅឆ្នាំនេះ។
លោក ច័ន្ទ សុផល បានបន្ថែមទៀតថា ចំពោះវិធានការសង្គ្រោះចំនួន ៥ជុំដែលរាជរដ្ឋាភិបាលបានដាក់ចេញនោះ គឺបានជួយសម្រាលផលប៉ះពាល់បានខ្លះដែរ សម្រាប់កម្មករនិយោជិតដែលបាត់បង់ការងារព្រោះកូវីដ-១៩ និងការបន្ធូរបន្ថយពន្ធសម្រាប់វិស័យឯកជន។ ទោះយ៉ាងណា អ្នកជំនាញ រូបនេះ បានគូសបញ្ជាក់ថា ផលប៉ះពាល់នៃវិបត្តិកូវីដ-១៩ អាចនឹងមានកាន់តែខ្លាំងឡើងនៅចុងឆ្នាំនេះ និងបន្ដរហូតដល់ឆ្នាំ២០២១។
របាយការណ៍ធនាគារពិភពលោក បានគូសបញ្ជាក់ដែរថា ក្នុងកាលៈទេសៈទប់ទល់នឹងវិបត្តិជាសកលនេះ រាជរដ្ឋាភិបាលកម្ពុជា បានធ្វើអន្តរាគមន៍ផ្នែកហិរញ្ញវត្ថុក្នុងកម្រិតមួយដែលមិនធ្លាប់មាន ក្នុងទំហំ ៥ភាគរយនៃផលិតផលក្នុងស្រុកសរុប អមដោយគោលយោបាយផ្នែករូបិយវត្ថុសម្រាប់ជួយសម្រួលស្ថានភាព ទៀតផង។ ហើយពេលនេះសំខាន់ណាស់ដែលអាជ្ញាធរកម្ពុជា គប្បីត្រៀមរៀបចំយុទ្ធសាស្ត្រមានប្រសិទ្ធភាពមួយ សម្រាប់ស្តារសេដ្ឋកិច្ចឱ្យរើបឡើងវិញនៅក្រោយវិបត្តិកូវីដ-១៩។
តាមរបាយការណ៍របស់ធនាគារពិភពលោក វិស័យសំណង់ ទេសចរ និងផ្នែកនាំចេញទំនិញ គឺមានរួមចំណែកដល់ទៅ ៧០% ក្នុងកំណើនសរុប និងមាន៣៩% នៃការងារមានកម្រៃទាំងស់នៅឆ្នាំ២០១៩ ប៉ុន្ដែ នៅឆ្នាំ២០២០នេះ វិស័យទាំងនេះ កំពុងរងផលប៉ះពាល់យ៉ាងដំណំ។ ក្នុងនោះ វិស័យទេសចរណ៍ និងវិស័យកមន្ដកម្មរបស់កម្ពុជា មានការធ្លាក់ចុះខ្លាំង ខណៈដែលវិស័យសំណង់កំពុងស្ថិតនៅក្នុងសភាពទ្រឹង។
ការនាំចូលដែក និងស៊ីម៉ង់ត៍ក្នុងអំឡុង ៦ខែដំបូងនៃឆ្នាំ២០២០ បានធ្លាក់ចុះ ៤៥,១ភាគរយ និង៨,២ភាគរយ រៀងៗខ្លួន ប្រៀបធៀបទៅនឹងឆ្នាំមុន ដោយគម្រោងសាងសង់ធំៗមួយចំនួនត្រូវផ្អាកសកម្មភាព។ ដូចគ្នានេះដែរ ការរាលដាលជំងឺទាញវិស័យនាំចេញ ធំៗរបស់កម្ពុជាឱ្យធ្លាក់ចុះ។ វិស័យទេសចរណ៍ និងបដិសណ្ឋារកិច្ចរបស់កម្ពុជាបានដួលរលំ ដោយសារតែការរឹតត្បិតលើការធ្វើដំណើរ និងវិធានការរាំងខ្ទប់ឱ្យនៅមួយកន្លែង។ ចំនួនភ្ញៀវមកដល់បានធ្លាក់ចុះប្រហែល ៦៤,៦ភាគរយ ក្នុងអំឡុងពេល ៦ខែដំបូងនៃឆ្នាំ២០២០។ ការធ្លាក់ចុះយ៉ាងគំហុកនូវតម្រូវការលើសកលលោក បានបណ្តាលឱ្យវិស័យកមន្តកម្មរបស់កម្ពុជាចុះខ្សោយ។ ការនាំចេញផលិតផលកាត់ដេរ, សម្ភារធ្វើដំណើរ, និងស្បែកជើង បានធ្លាក់ចុះ ៧,២ភាគរយក្នុងអំឡុងពេល ៦ខែដំបូងនៃឆ្នាំ២០២០ ហើយទន្ទឹមគ្នានោះ ការនាំចូលក្រណាត់សម្រាប់យកមកកាត់ដេរ បានធ្លាក់ចុះ ៨៥,៤ភាគរយ។
យ៉ាងណាក្ដី ធនាគារពិភពលោក បានគូសបញ្ជាក់ថា សកម្មភាពសេដ្ឋកិច្ចផ្ទៃក្នុងរបស់កម្ពុជាបានចាប់ផ្តើមកម្រើកបណ្តើរៗឆ្ពោះទៅរកប្រក្រតីភាពឡើងវិញហើយ ក្រោយពីមានការសម្រាលលើវិធានការរក្សាគម្លាតសុវត្ថិភាពសង្គម។ តម្រូវការក្នុងស្រុក រួមមានការធ្វើដំណើរ និងសកម្មភាពទេសចរណ៍ក្នុងស្រុកផង កំពុងតែងើបឡើងវិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
