ប្រធានក្រុមសេដ្ឋកិច្ចវិទូរបស់ផ្សារហ៊ុន គាតណាគិន ផាត្រា គឺលោក ភីផាត លឿងណារឿមីតឆៃ (Pipat Luengnaruemitchai) បានសម្តែងការព្រួយបារម្ភអំពីទស្សនវិស័យសារពើពន្ធរបស់ប្រទេសថៃ ប្រសិនបើអ្នកនយោបាយ និងរដ្ឋាភិបាល បែងចែកការចំណាយច្រើនលើសលប់។ ប្រសិនបើគ្មានផែនការហិរញ្ញប្បទានច្បាស់លាស់ទេ ប្រការនេះអាចបណ្តាលឱ្យមានអស្ថិរភាពហិរញ្ញវត្ថុសាធារណៈក្នុងរយៈពេលវែង។
លោក ភីផាត បានសរសេរនៅលើទំព័រ Facebook របស់លោកថា ប្រទេសថៃជិតនឹងមានរដ្ឋាភិបាលថ្មីហើយ ដោយគណបក្សនយោបាយមួយចំនួនបានស្នើសុំបង្កើតគោលនយោបាយដែលប្រើប្រាស់ថវិកាយ៉ាងច្រើន។ លោកបានបន្ថែមថា ប៉ុន្តែគេមិនអាចជជែកពីការចំណាយថវិកា ដោយគ្មានការរៀបរាប់ពីប្រភពនៃការផ្ដល់មូលនិធិបានឡើយ។
គណបក្សឆ្ពោះទៅមុខ (MFP) ដែលគ្រោងនឹងដឹកនាំរដ្ឋាភិបាលចម្រុះ បានផ្តោតលើគោលនយោបាយផ្ដល់ជំនួយទៅលើវិស័យអប់រំ កុមារ ជនពិការ និងអ្នកចូលនិវត្តន៍ ហើយគោលនយោបាយមួយចំនួនត្រូវបានគេប៉ាន់ប្រមាណថានឹងត្រូវការចំណាយបន្ថែមចំនួន ៦៥០ ពាន់លានបាត ឬប្រហែលជិត ២០ ពាន់លានដុល្លារ។ ប៉ុន្តែលោក ពីផាត បានចោទជាសំណួរថា តើចំនួនប្រាក់ទាំងនេះបានមកពីណា?
អត្ថបទគួរអាន
ផែនការរបស់គណបក្សឆ្ពោះទៅមុខ មានបំណងកាត់បន្ថយចំណាយផ្នែកយោធា និងថវិកាផ្សេងៗទៀត ដែលត្រូវបានចាត់ទុកថា មានទំហំធំមិនសមហេតុផល ហើយគណបក្សនេះក៏ចង់បង្កើនប្រាក់ចំណូលតាមរយៈពន្ធលើទ្រព្យសម្បត្តិ និងដីធ្លី ព្រមទាំងតាមរយៈការដំឡើងពន្ធលើប្រាក់ចំណេញចំពោះក្រុមហ៊ុនធំៗផងដែរ។ ឥទ្ធិពលទូទៅនៃការកាត់បន្ថយការចំណាយទាំងនោះនឹងអាចកាត់បន្ថយការចំណាយរបស់រដ្ឋាភិបាលបានចំនួនជិត ២០ពាន់លានដុល្លារក្នុងមួយឆ្នាំ។ នេះបើយោងតាមគណបក្សឆ្ពោះទៅមុខ។
អ្នកជំនាញនៅក្នុងទីផ្សារភាគហ៊ុនរូបនេះ បាននិយាយទៀតថា ប្រសិនបើផែនការនេះបានដំណើរការមែន ហើយឱនភាពថវិកាមិនកើនឡើងទេនោះ វានឹងផ្តល់អត្ថប្រយោជន៍ដល់សេដ្ឋកិច្ចជាងវិធានការជំរុញសេដ្ឋកិច្ចផ្សេងៗទៀត។
ប្រជាសាស្រ្តរបស់ប្រទេសថៃកំពុងមានការប្រែប្រួល ហើយចំនួនមនុស្សចាស់កំពុងតែកើនឡើង ជាហេតុបណ្តាលឱ្យមានតម្រូវការប្រាក់កាន់តែច្រើនសម្រាប់ទ្រទ្រង់ប្រព័ន្ធសុខុមាលភាពរបស់ប្រទេសនេះ ខណៈដែលចំនួនមនុស្សបង់ពន្ធកំពុងតែធ្លាក់ចុះ។
លោក ភីផាត បាននិយាយថា មនុស្សជាច្រើនចាប់អារម្មណ៍លើសូចនាករសំខាន់មួយ គឺផលធៀបរវាងបំណុលសាធារណៈនិងផលិតផលក្នុងស្រុកសរុប ហើយប្រសិនបើផលធៀបនេះត្រូវបានគេរំពឹងថានឹងកើនឡើងមិនអាចគ្រប់គ្រងបាននោះ ទីផ្សារនិងអ្នកវិនិយោគនឹងមានការព្រួយបារម្ភអំពីស្ថានភាពរបស់រដ្ឋាភិបាលថ្មីនេះជាមិនខាន។
ផលធៀបរវាងបំណុលសាធារណៈ នឹងផលិតផលក្នុងស្រុកសរុបរបស់ប្រទេសថៃនឹងកើនឡើងបន្តិចម្តងៗពីប្រហែល ៦១% គិតត្រឹមទី៣១ ខែឧសភា រហូតដល់ ៦៨% នៅក្នុងរយៈពេលមួយទសវត្សរ៍ទៀត។
ប៉ុន្ដែ អ្នកជំនាញបានព្រមានថា ប្រសិនបើប្រទេសថៃមានឱនភាពថវិកាកាន់តែខ្ពស់នៅពេលដែលអត្រាការប្រាក់កើនឡើងនោះ វានឹងមានឱកាសដែលបំណុលសាធារណៈកើនឡើងយ៉ាងខ្លាំង ហើយគេកាន់តែពិបាកកាត់បន្ថយ៕
