អាកាសយានដ្ឋានអន្តរជាតិភ្នំពេញថ្មីត្រូវពន្យារពេលបញ្ចប់ការសាងសង់ដល់ឆ្នាំ២០២៤

ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ថា គម្រោងអភិវឌ្ឍន៍អាកាសយានដ្ឋានអន្តរជាតិភ្នំពេញថ្មី នឹងត្រូវយឺតជាងផែនការ ដែលបានគ្រោងទុក។ បើតាមការអះអាងរបស់មន្ត្រីជាន់ខ្ពស់រូបនេះ ការបញ្ចប់ការសាងសង់អាកាសយានដ្ឋានអន្តរជាតិភ្នំពេញថ្មីដំណាក់កាលទី១ អាចពន្យារពេលរហូតដល់ឆ្នាំ២០២៤ ខណៈតាមផែនការគ្រោងបញ្ចប់នៅអំឡុងឆ្នាំ២០២៣។ បច្ចុប្បន្នគម្រោងអភិវឌ្ឍន៍ព្រលានយន្តហោះនេះ ទើបសម្រេចបានការសាងសង់បានជាង៣០% ប៉ុណ្ណោះ បន្ទាប់ពី​បើកការសាងសង់កាលពីអំឡុងឆ្នាំ២០១៩។

បើតាមការគូសបញ្ជាក់របស់អ្នកនាំពាក្យរដ្ឋលេខាធិការដ្ឋាន​អាកាសចរស៊ីវិល​រូបនេះ ការអូសបន្លាយ​នៃការបញ្ចប់ការសាងសង់នេះ គឺដោយសារមានការរំខានពីការឆ្លងរាតត្បាតនៃជំងឺកូវីដ-១៩ និងការអនុវត្តវិធានការគ្មានកូវីដ-១៩ ដ៏តឹងរឹងរបស់ចិន។ ព្រោះការអនុវត្តវិធានការគ្មានកូវីដ​ដ៏តឹងរឹងរបស់ចិនបានធ្វើឲ្យរាំងស្ទះ​ដល់ការដឹកជញ្ជូនសម្ភារៈមួយចំនួន និងបានរារាំង​ដល់ការធ្វើដំណើររបស់អ្នក​ជំនាញ​ជនជាតិចិ​ន ដែលក្រុមហ៊ុនជួល ដើម្បីចូលរួមសាងសង់​គម្រោងអាកាសយានដ្ឋានអន្តរជាតិនេះ។

បើតាមការអះអាងរបស់ឯកឧត្តម ស៊ីន ចាន់សិរីវុត្ថា វិបត្តិនៃការឆ្លងរាតត្បាតនៃជំងឺកូវីដ-១៩ ជាសកលនេះក៏បានធ្វើឲ្យរាំងស្ទះដល់ការបើកដំណើរការសាកល្បង​អាកាសយានដ្ឋានអន្តរជាតិតារា​សាគរខេត្តកោះ​កុងផងដែរ។ តាមគម្រោង ព្រលានយន្តហោះនេះ គ្រោងបើកទ្វារឲ្យហោះហើរសាកល្បង​នៅអំឡុងខែកក្កដា ខាងមុខនេះ តែក្រុមហ៊ុនអភិវឌ្ឍន៍របស់ចិន សុំពន្យារពេលដល់ចុងឆ្នាំនេះ ឬអាចដើមឆ្នាំ២០២៣។

គួររំលឹកថា អាកាសយានដ្ឋានអន្តរជាតិតេជោ ឬអាកាសយានដ្ឋានអន្តរជាតិ​ភ្នំពេញថ្មី សាងសង់លើផ្ទៃដីប្រមាណ២ពាន់៦រយហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ។ ព្រលានយន្តហោះដែលមានតម្លៃវិនិយោគជាង ១ពាន់៥រយលានដុល្លារអាមេរិកនេះ ជាប្រភេទ 4F ដែលមានសមត្ថភាពអាចឲ្យប្រភេទយន្តហោះហោះធុនយក្ស​ដូចជា Airbus A380-800 និង Boeing 747-800 អាចចុះចតបាន៕