កម្មករនិយោជិតជាង២ពាន់នាក់កំពុងប្រឈមនឹងបញ្ហាការងារ ក្រោយរោងចក្រត្រូវបានភ្លើងឆេះ ខណៈក្រសួងការងារ និងភាគីពាក់ព័ន្ធកំពុងរកដំណោះស្រាយ

រោងចក្រស្បែកជើងយីហោ អរ ជី ហ្វ៊ូតវែរ ត្រូវបានអគ្គីភ័យលេបត្របាក់ស្ទើរទាំងស្រុងកាលពីថ្ងៃទី១៨ ខែមីនា ឆ្នាំ២០២៤ បើទោះបីមានការជួយអន្តរាគមន៍ពន្លត់ពីកងកម្លាំង និងអ្នកពន្លត់អគ្គីភ័យមកពីក្រសួងស្ថាប័នផ្សេងៗជាច្រើនក៏ដោយ។ បញ្ហាអគ្គីភ័យនេះមិនបានបង្កឱ្យកម្មករ និយោជិតប្រមាណ២ពាន់នាក់ ដែលកំពុងធ្វើការនៅក្នុងរោងចក្រនេះណាម្នាក់រងរបួសធ្ងន់ធ្ងរនោះទេ។ ប៉ុន្តែបញ្ហានេះបានធ្វើឱ្យកម្មករ និយោជិតទាំងនោះ កំពុងប្រឈមនឹងធ្លាក់ចុះប្រាក់ចំណូល និងការអត់ការងារធ្វើក្នុងរយៈពេលអន្តរកាលណាមួយ។

ពាក់ព័ន្ធបញ្ហាអគ្គីភ័យនេះដែរ ឯកឧត្តម កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានគូសបញ្ជាក់ប្រាប់ខេមបូណូមីសថា ក្រោយកើតហេតុ ថ្នាក់ដឹកនាំក្រសួងការងារ និងមន្រ្តីពាក់ព័ន្ធ ក្រោមកិច្ចសហការជាមួយសមត្ថកិច្ចបានចុះដល់ទីតាំងកើតហេតុ ដើម្បីពិនិត្យមើលស្ថានភាពជាក់ស្ដែង​។ បើតាមអ្នកនាំពាក្យរូបនេះ ករណីអគ្គិភ័យនេះពុំបានបង្កផលប៉ះពាល់ដល់កម្មករណាម្នាក់នោះឡើយ ហើយមកទល់ពេលនេះ ហើយសមត្ថកិច្ចកំពុងស៊ើបអង្កេតរកមូលហេតុពិតប្រាកដ។

ជាមួយគ្នានេះនៅថ្ងៃទី១៩ ខែមីនា ឆ្នាំ២០២៤ ថ្នាក់ដឹកនាំក្រសួងការងារបានជួបប្រជុំគ្នាជាមួយភាគីថៅកែរោងចក្រ តំណាងកម្មករ និយោជិត ដើម្បីការពារអត្ថប្រយោជន៍ផ្សេងៗជូនដល់កម្មករនិយោជិត។ បើតាមការអះអាងរបស់មន្ត្រីជាន់ខ្ពស់រូបនេះ ក្នុងអំឡុងពេលនេះកម្មករនិយោជិត នៅតែអាចបន្តប្រើប្រាស់ប័ណ្ណ ប.ស.ស ក្នុងការថែទាំសុខភាព អត្ថប្រយោជន៍ពេលសម្រាលកូន និងការពិនិត្យផ្ទៃពោះបានដូចធម្មតា។

​ជាមួយគ្នានេះ លោក អាត់ ធន់ ប្រធានសហជីពកម្មករកាត់ដេរនៅកម្ពុជា បានគូសបញ្ជាក់ថា ករណីឆេះរោងចក្រផលិតស្បែកជើងយីហោ អរ ជី ហ្វ៊ូតវែរ នេះ មិនមែនជាកំហុសរបស់កម្មករនោះទេ ហើយក្នុងករណីដែលក្រុមហ៊ុនចំណាយពេល ដើម្បីដំណើរការខ្សែច្រវាក់ផលិតឡើងវិញ ក៏ត្រូវតែគិតគូរក្នុងការផ្ដល់អត្ថប្រយោជន៍ដល់កម្មករដដែល។ បើតាមប្រធានសហជីពរូបនេះ ប្រសិនបើក្រុមហ៊ុននៅតែមិនអាចដំណើរការបាន គឺត្រូវទូទាត់អត្ថប្រយោជន៍ដល់កម្មករតាមច្បាប់ដែលបានចែង។

​ការឆាបឆេះរោងចក្រផលិតស្បែកជើងយីហោ អរ ជី ហ្វ៊ូតវែរ ត្រូវបានគេសង្ស័យថា អាចបណ្ដាលមកពីឆ្លងចរន្តអគ្គិសនី។ បច្ចុប្បន្នមានក្រុមកម្មករ កម្មការិនី ធ្វើការនៅក្នុងរោងចក្រដែលរងការខូចខាតនេះ ប្រមាណ២០០០នាក់ កំពុងប្រឈមនឹងបញ្ហាការងារ៕

អត្ថបទ៖ បូ ដូឡា​