ការសម្រុកធ្វើដំណើរទៅលេងស្រុកប្រចាំឆ្នាំ ដើម្បីអបអរបុណ្យចូលឆ្នាំថ្មីប្រពៃណីចិន ២០២៥ ដ៏ខ្លីខាងមុខនេះជាមួយក្រុមគ្រួសារសាច់ញាតិជិតឆ្ងាយ បានចាប់ផ្ដើមជាផ្លូវការហើយកាលពីថ្ងៃទី១៤ ខែមករា ដោយពួកគេទុកការងារចោលមួយឡែក និងបំភ្លេចទុក្ខកង្វល់មួយគ្រាសិន ដើម្បីមានឱកាសបានជួបជុំក្រុមគ្រួសារ ឬសម្រាកវិស្សមកាល។
រដូវកាលដែលមានមនុស្សសម្រុកធ្វើដំណើរច្រើនបំផុតនៅក្នុងប្រទេសចិន ដែលមានសេដ្ឋកិច្ចធំទី២របស់ពិភពលោកបានចាប់ផ្តើមហើយ ដោយរថភ្លើងមួយខ្សែបានចេញដំណើរពីទីក្រុងប៉េកាំង នៅប៉ុន្មាននាទីក្រោយរំលងអធ្រាត្រ ដើម្បីដឹកអ្នកធ្វើដំណើរពីក្រុងប៉េកាំង ទៅកាន់ទីក្រុងហឺហ្វី ក្នុងខេត្តអានហួយ ភាគខាងកើត។
អ្នកសម្រុកធ្វើដំណើរភាគច្រើន គឺដើម្បីទៅលេងស្រុក និងមានឱកាសហូបអាហារពេលល្ងាចជុំគ្រួសារសាច់ញាតិជិតឆ្ងាយតាមប្រពៃណីនៅថ្ងៃទី២៨ មករា មុននឹងបុណ្យចូលឆ្នាំចិនមកដល់នៅថ្ងៃទី២៩ ខែមករា ឆ្នាំនេះ។
រដូវកាលសម្រុកធ្វើដំណើរដែលមានរយៈពេល៤០ថ្ងៃនេះ នឹងបន្តរហូតដល់ថ្ងៃទី២២ ខែកុម្ភៈ ដែលអាជ្ញាធរចិន បានប៉ាន់ប្រមាណថា អំឡុងរយៈពេល៤០ថ្ងៃនេះ នឹងមានការធ្វើដំណើរទៅមកក្នុងស្រុកចំនួន៩ពាន់លានជើង បើធៀបនឹងការធ្វើដំណើរ៨,៤លានជើងក្នុងរដូវកាលនេះក្នុងឆ្នាំ២០២៤។
តាមការព្យាករ អ្នកធ្វើដំណើរតាមផ្លូវដែក ឬរថភ្លើងនឹងមានចំនួនលើសពី៥១០លាននាក់ ខណៈដែលអ្នកដំណើរតាមជើងហោះហើរនឹងមានចំនួនជាង៩០លាននាក់ ដែលសរុបបញ្ចូលគ្នាមានចំនួនមិនក្រោម៦០០លាននាក់ឡើយក្នុងចំណោមពលរដ្ឋសរុបជាង១,៤ពាន់លាននាក់។ ទោះជាយ៉ាងណា ចំនួននៃការធ្វើដំណើរតាមយានយន្តនឹងមានចំនួន៧,២ពាន់លានជើងដែលស្មើប្រមាណ៨០%នៃការធ្វើដំណើរសរុបនៅក្នុងស្រុក៕
ដោយ: តែម សុខុម
