មេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យមានវិធានការស្តាស្ថានភាពខ្វះស្បៀងអាហារដ៏តានតឹងឲ្យបានឆាប់រហ័ស ដែលបង្កឡើងការបិទព្រំដែនទប់ស្កាត់ជំងឺរាតត្បាតកូវីត ១៩ និង គ្រោះធម្មជាតិ។ បញ្ហាគ្រោះធម្មជាតិធ្ងន់ធ្ងរបានធ្វើឲ្យសេដ្ឋកិច្ចរបស់កូរ៉េខាងជើងធ្លាក់ចុះជាខ្លាំង ចំពេលដែលកំពុងទទួលរងទណ្ឌកម្មអន្តជាតិយ៉ាងចាស់ដៃ ជុំវិញការបង្កើនការផលិត និង ការបាញ់មីស៊ីលសាកល្បងរបស់ខ្លួនកាន់តែច្រើននៅមួយរយៈចុងក្រោយនេះ។
ការដាក់ទណ្ឌកម្មអន្តរជាតិយ៉ាងតឹងរ៉ឹងបានហាមឃាត់លើការនាំចូល និង ការនាំចេញរបស់កូរ៉េខាងជើង ចំពេលដែលប្រទេសនេះបានបិទព្រំដែនរបស់ខ្លួនអស់រយៈពេលជាង២ឆ្នាំមកនេះ ដើម្បីការពារការផ្ទុះឡើងនៃការឆ្លងមេរោគកូវីដ១៩ គួបផ្សំនឹងការជួបនូវគ្រោះរាំងស្ងួតផងនោះ បាននិងកំពុងធ្វើឲ្យប្រទេសកូរ៉េខាងជើង បានជួបការលំបាកយ៉ាងខ្លាំង ទាក់ទងនឹងការប្រមូលផលដំណាំនៅក្នុងស្រុក និង អតិផរណាកើនឡើង បណ្ដាលឲ្យកើតមានបញ្ហាកង្វះស្បៀងអាហារកាន់តែធ្ងន់ធ្ងរ។
ទន្ទឹមនឹងនេះ នៅថ្ងៃទី ៣ ខែឧសភា ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថា សហរដ្ឋអាមេរិកចង់ឱ្យក្រុមប្រឹក្សាសន្តិសុខអង្គការសហប្រជាជាតិបោះឆ្នោតក្នុងខែឧសភានេះ ដើម្បីដាក់ទណ្ឌកម្មបន្ថែមលើប្រទេសកូរ៉េខាងជើង ជុំវិញការបាញ់មីស៊ីលផ្លោងជាថ្មីរបស់ខ្លួន។ សហរដ្ឋអាមេរិកបានផ្សព្វផ្សាយសេចក្តីព្រាងសេចក្តីសម្រេចដំបូងទៅកាន់ក្រុមប្រឹក្សាសន្ដិសុខអង្គការសហប្រជាជាតិ ដែលមានសមាជិក ១៥ ប្រទេស កាលពីខែមុន ដែលបានស្នើឱ្យមានការហាមឃាត់ថ្នាំជក់ និង កាត់បន្ថយការនាំចេញប្រេងពាក់កណ្តាលទៅកាន់ប្រទេសកូរ៉េខាងជើង និង ការដាក់ប្រទេសនេះចូលទៅក្នុងបញ្ជីខ្មៅ។
អត្ថបទគួរអាន
គួររំលឹកថា អង្គការសហប្រជាជាតិកាលពីខែមីនា បានជំរុញឱ្យទីក្រុងព្យុងយ៉ាងបើកព្រំដែនរបស់ខ្លួនឡើងវិញ ដើម្បីជួយដល់កម្មករ និងការនាំចូលស្បៀងអាហារឡើងវិញចូលទៅកាន់ប្រទេសកូរ៉េខាងជើង ដោយបានព្រមានថា ភាពឯកោកាន់តែខ្លាំងឡើង អាចបណ្តាលឱ្យប្រជាជនជាច្រើនប្រឈមនឹងការអត់ឃ្លាន។
គួរជម្រាបថា កម្មវិធីស្បៀងអាហារពិភពលោកបានប៉ាន់ប្រមាណថា ចាប់តាំងពីមុនពេលមានជំងឺរាតត្បាតកូវីដ១៩ មានមនុស្សយ៉ាងហោចណាស់ ១១ លាននាក់ ឬ ច្រើនជាង ៤០ ភាគរយនៃចំនួនប្រជាជនកូរ៉េខាងជើងគឺត្រូវការអាហារូបត្ថម្ភ និង ជំនួយមនុស្សធម៌។ យោងតាមទីភ្នាក់ងារព័ត៌មានរដ្ឋកូរ៉េខាងជើង KCNA បានឱ្យដឹងថា អាជ្ញាធរអាកាសធាតុរបស់ប្រទេសកូរ៉េខាងជើងកាលពីថ្ងៃអង្គារបានព្រមានពីគ្រោះរាំងស្ងួតអូសបន្លាយពេលយូរនៅទូទាំងប្រទេសនេះ។ ទីភ្នាក់ងារអាកាសធាតុបានអះអាងកាលពីសប្តាហ៍មុនថា សីតុណ្ហភាពជាមធ្យមសម្រាប់ខែមេសា គឺនឹងឡើងកម្តៅ ៣៦ អង្សាសេខ្ពស់ជាងធម្មតា ខណៈដែលនៅទូទាំងប្រទេសមានភ្លៀងធ្លាក់ជាមធ្យមត្រឹមតែ ៤៤%៕
អត្ថបទ៖ វ៉ាន់ ស្រីរ័ត្ន
None
