ការអនុម័តរបស់គណៈរដ្ឋមន្ត្រីថៃនេះ បន្ទាប់ពីក្រសួងក្រសួងពាណិជ្ជកម្មកាលពីថ្ងៃទី ០២ ខែឧសភា បានដាក់ស្នើទៅកាន់គណៈរដ្ឋមន្ត្រីឲ្យធ្វើការពិនិត្យ និងសម្រេច។ ក្រោយពីពិនិត្យរួចហើយ គណៈរដ្ឋមន្ត្រីថៃ នៅថ្ងៃទី ៣ ឧសភា បានសម្រេចអនុម័តលើសំណើនេះ ដោយអនុញ្ញាតឲ្យមានការនាំចូលផលិតផលដែលជាគ្រឿងផ្សំសម្រាប់ផលិតជាចំណីសត្វប្រហែល ១លាន២សែនតោន សម្រាប់រយៈពេល៣ខែ រួមមានដូចជា គ្រាប់ពោត និងស្រូវសាលីជាដើម។
ការដាក់ស្នើរបស់ក្រសួងពាណិជ្ជកម្មថៃលើការនាំចូលផលិតផលកែច្នៃជាចំណីសត្វនេះ គឺធ្វើឡើងនៅចំពេលដែលការផ្គត់ផ្គង់នៅក្នុងស្រុកកំពុងតែជួបបញ្ហា ព្រោះតែឥទ្ធិពលនៃវិបត្តិសង្គ្រាមនៅអ៊ុយក្រែន។
រោងម៉ាស៊ីនកែច្នៃចំណីសត្វក្នុងប្រទេសថៃ នៅប៉ុន្មានខែមកនេះ បានជួបនូវបញ្ហាខ្វះខាតវត្ថុធាតុដើម ដែលជាគ្រាប់ធញ្ញជាតិ ដើម្បីប្រើប្រាស់សម្រាប់ផ្សំកែច្នៃផលិតជាផលិតផលចំណីសត្វ ដូចជា ស្រូវសាលី និងគ្រាប់ពោតជាដើម ដូច្នេះហើយទើបជំរុញឲ្យមានការស្នើសុំរាជរដ្ឋាភិបាលកាត់បន្ថយការរឹតបន្ដឹងការនាំចូល។
អត្ថបទគួរអាន
ប្រទេសរុស្ស៊ី និងអ៊ុយក្រែន រួមគ្នា គឺមានប្រហែល ជិត៣០% នៃការនាំចេញស្រូវសាលីពិភពលោក និងមានប្រហែលជិត២០% នៃការនាំចេញគ្រាប់ពោត។ ប៉ុន្ដែ តាំងពីមានសង្គ្រាមផ្ទុះឡើង បានធ្វើឲ្យការផ្គត់ផ្គង់ជួបញ្ហាយ៉ាងខ្លាំង ហើយក្នុងនោះ ការផលិតចំណីសត្វក្នុងប្រទេសថៃក៏រងឥទ្ធិពលនេះដូចគ្នា។
បច្ចុប្បន្ន រោងចក្រកែច្នៃចំណីសត្វនៅក្នុងប្រទេសថៃ គឺត្រូវតែយកវត្ថុធាតុដើមគ្រាប់ពោតក្នុងស្រុកឲ្យបាន ៣ភាគ និងសល់១ភាគ គឺអាចនាំចូលស្រូវសាលីពីក្រៅប្រទេសនេះ ដើម្បីផ្សំជាការផលិតចំណីសត្វ។
តម្លៃគ្រាប់ពោតនៅក្នុងស្រុកថៃ នាពេលបច្ចុប្បន្ន ត្រូវបានគេចាត់ទុកថា កំពុងមានតម្លៃខ្ពស់ខ្លាំងមែនទែន ដោយមួយគីឡូក្រាមមានតម្លៃប្រហែលជាង ១១បាត ឬស្មើនឹងប្រហែល១ពាន់៣រយរៀល ខណៈដែលតម្លៃពីមុនធ្លាប់មានជាទូទៅត្រឹមតែប្រមាណ ៧រយ ទៅជាង៩រយរៀលប៉ុណ្ណោះក្នុងមួយគីឡូក្រាម។
សូមបញ្ជាក់ថា តម្រូវការគ្រាប់ពោតនៅក្នុងប្រទេសថៃសរុបនៅក្នុងមួយឆ្នាំមានប្រមាណ ៨លានតោន ខណៈដែលការផលិតក្នុងស្រុកមានប្រមាណតែ៥លានតោនប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
