ដ្បិតថា បច្ចុប្បន្ន កសិផលសរីរាង្គនៅមានការផលិតតិចតួចនៅឡើយក្ដី ប៉ុន្ដែ អ្នកជំនាញអះអាងថា វាជាប្រភេទផលិតផលកសិកម្មមួយ ដែលកំពុងមានទីផ្សារនិងសក្ដានុពលក្នុងការប្រកួតប្រជែង។
លោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាលស្ដីពីកម្ពុជា បានលើកឡើងថា បច្ចុប្បន្ន កសិផលសរីរាង្គកំពុងត្រូវបានការគាំទ្រគួរឲ្យកត់សម្គាល់ពីសំណាក់ប្រជាពលរដ្ឋក្នុងស្រុក ទោះបីជាកសិផលនេះ ហាក់បីមានតម្លៃថ្លៃជាងកសិផលដែលដាំដុះ ឬនាំចូលដែលមានប្រើសារជាតិគីមីក៏ដោយ។ តែយ៉ាងណា លោកថា ការចងក្រងជាសមាគមអ្នកផលិត និងផ្សារភ្ជាប់ពួកគាត់ទៅនឹងទីផ្សារ ដូចជា ផ្សារទំនើបនិងសណ្ឋាគារ គឺជារឿងមួយដែលរាជរដ្ឋាភិបាល ក៏ដូចជាភាគីពាក់ព័ន្ធទាំងអស់ត្រូវយកចិត្តទុកដាក់ជួយសម្របសម្រួល។
លោកថា កសិផលសរីរាង្គរបស់កម្ពុជា ជាផលិតផលកសិកម្មមួយដែលនឹងអាចមានទីផ្សារល្អ ពិសេសគឺអាចប្រកួតប្រជែងជាមួយនឹងផលិតផលកសិកម្មដែលបាននាំចូល ខណៈដែលកេរ្តិ៍ឈ្មោះរបស់កសិផលសរីរាង្គរបស់កម្ពុជា ក៏ល្អប្រសើរជាងប្រទេសជិតខាងផងដែរ។
លោក សម វិទូ នាយកប្រតិបត្តិអង្គការសេដាក បានលើកឡើងដែរថា បច្ចុប្បន្ន ការនាំចូលផលិតផលកសិកម្មពីបណ្ដាប្រទេសជិតខាងមានរហូតដល់ជាង ៥៥%។ ដោយឡែក សម្រាប់ការផ្គត់ផ្គង់ផលិតផលសរីរាង្គនៅលើទីផ្សារបច្ចុប្បន្នមានតែប្រមាណ ១% នៃទីផ្សារទាំងមូល។ យ៉ាងណាក៏ដោយ លោកថា ខាងអង្គការសេដាកបាននិងកំពុងខិតខំជំរុញការងារនេះ ដូចជា ការចងក្រងសមាគមអ្នកផលិតកសិផលសរីរាង្គនៅតាម១២ខេត្តផ្សេងគ្នា ដោយក្នុងនោះ មានការផលិតកសិផលសរីរាង្គជាច្រើនមុខ ដូចជា ស្រូវ មានប្រមាណ ៧០០០តោនក្នុងមួយឆ្នាំ ព្រមជាមួយនឹងប្រភេទបន្លែ ផ្លែឈើផ្សេងៗទៀតផងដែរ។
តើអ្នកបានអានអត្ថបទនេះ ឬនៅ?
លោក សម វិទូ បានគូសបញ្ជាក់ទៀតថា នៅថ្ងៃអនាគត កសិផលសរីរាង្គនឹងក្លាយជាប្រភេទផលិតផលកសិកម្មមួយដែលមានសក្ដានុពលខ្លាំងក្នុងការប្រកួតប្រជែងទីផ្សារ ហើយខាងអង្គការសេដាក នឹងនៅតែបន្តជួយកសិករក្នុងការផលិត និងផ្សារភ្ជាប់ទីផ្សារសំខាន់ៗបន្ថែមទៀត។
លោកបានលើកឡើងថា បើតាមអ្នកជំនាញសេដ្ឋកិច្ចធ្លាប់បានលើកឡើងថា បើសិនកម្ពុជាចង់ប្រកួតប្រជែងផលិតផលកសិកម្មជាមួយបណ្ដាប្រទេសជិតខាង កម្ពុជាគួរតែផ្ដោតលើការពង្រឹងនិងពង្រីកបន្ថែមនូវសមត្ថភាពដាំដុះនិងផ្គត់ផ្គង់កសិផលសរីរាង្គរបស់ខ្លួន។
លោកបន្ថែមទៀតថា អង្គការ សេដាក បានជំរុញឲ្យមានការដាំដុះដំណាំសរីរាង្គនេះ តាំងពីឆ្នាំ២០០៣មកម្ល៉េះ ដូច្នេះ យើងអាចថា ដើរបានមុនមួយជំហានក្នុងការអភិវឌ្ឍការដាំដុះដំណាំសរីរាង្គនេះ ប៉ុន្ដែ បរិមាណផលិតរបស់កសិករនៅមានកម្រិតនៅឡើយ។ ដូច្នេះហើយ ទើបអង្គការ សេដាក ខិតខំចងក្រងជាសមាគមកសិករ និងជួយផ្សារភ្ជាប់ទៅនឹងទីផ្សារបន្ថែមទៀត ដើម្បីឈានទៅពង្រីកការដាំដុះ។
យ៉ាងណាក៏ដោយចុះ នាយកប្រតិបត្តិអង្គការ សេដាក លោក សម វិទូ បានគូសបញ្ជាក់ដែរថា បញ្ហាទឹក ទុន និងទីផ្សារ ក្នុងការធ្វើកសិធុរកិច្ចរបស់ប្រជាកសិករ នៅតែជារនាំងមួយចំពោះការផលិតកសិផលសរីរាង្គ។ តួយ៉ាង ការខ្វះខាតនូវប្រព័ន្ធធារាសាស្ត្រពេញលេញក្នុងការផលិត ការប្រាក់កម្ចីពីធនាគារ និងគ្រឹះស្ថានមីក្រូហិរញ្ញវត្ថុនៅតែខ្ពស់ និងបញ្ហាខ្វះការសម្របសម្រួលក្នុងការនាំកសិផលចូលទៅកាន់ទីផ្សារ ដូចជា បរិមាណផលិតមិនទាន់ឆ្លើយតបទាន់ពេលតាមតម្រូវការទីផ្សារ និងការវេចខ្ចប់រក្សាគុណភាពនៅមានកម្រិតជាដើម៕
None
