លោក ដូណាល់ ត្រាំ បានបង្ហាញការគាំទ្រដល់ ការជជែកអំពីកិច្ចព្រមព្រៀងទិញលក់ កម្មវិធី Tik Tok រវាងក្រុមហ៊ុនចិន ByteDance ដែលជាក្រុមហ៊ុនមេរបស់កម្មវិធី Tik Tok និងក្រុមហ៊ុនអាមេរិកចំនួន ៣ រួមមានក្រុមហ៊ុន Microsoft, Oracle និង Walmart ដែលគ្រោងនឹងចរចារបង្កើតក្រុមហ៊ុនថ្មីឈ្មោះថា Tik Tok Global ដែលពុំមានជនជាតិចិន គ្រប់គ្រងផ្តាច់មុខនោះទេ។
លោក បន្តថា ក្រុមហ៊ុនដ៏ល្បីល្បាញទាំងអស់នោះ គួរតែរួមបញ្ចូលគ្នា ដែលជាជម្រើសល្អបំផុត សម្រាប់ទាំងអស់គ្នា ជាពិសេសការចរចារវាង ក្រុមហ៊ុន Oracle និងក្រុមហ៊ុន ByteDance ដែលរំពឹងនឹងអាចបញ្ចប់ឆាប់ៗនេះ។
អត្ថបទទាក់ទង!
កាលពីថ្ងៃទី ២០ ខែកញ្ញាកន្លងទៅ នាយកដ្ឋានពាណិជ្ជកម្មអាមេរិក ក៏បានដាក់ចេញនូវបញ្ជា ហាមឃាត់ប្រជាពលរដ្ឋអាមេរិក ក្នុងការទាញយក និងប្រើប្រាស់កម្មវិធី WeChat និង Tik Tok របស់ប្រទេសចិនផងដែរ ដោយសំអាងលើ ការការពារសុវត្ថិភាពទិន្នន័យ និងហានិភ័យប៉ះពាល់ដល់ សុវត្ថិភាពជាតិ។
ទោះបីជាយ៉ាងណា អ្នកនាំពាក្យក្រសួងការបរទេសចិន ក៏បានប្រកាសដែរថា ចិន ស្នើឲ្យ ថ្នាក់ដឹកនាំអាមេរិក ផ្តល់បរិយាកាសយុត្តិធម៌ សម្រាប់ក្រុមហ៊ុនបរទេស ដែលចូលទៅវិនិយោគក្នុងប្រទេសរបស់ខ្លួន ហើយអាមេរិក គួរតែគោរពគោលការណ៍សេដ្ឋកិច្ចទីផ្សារ និងការប្រកួតប្រជែងដោយយុត្តិធម៌ និងបើកទូលាយនូវ បរិយាកាសវិនិយោគ ដោយគ្មានការរើសអើងចំពោះក្រុមហ៊ុនបរទេស ដែលកំពុងដំណើរការ និងវិនិយោគក្នុងប្រទេសអាមេរិក។
គួរជម្រាបដែរថា លោក ដូណាល់ ត្រាំ គាំទ្រដល់ ការវិនិយោគរបស់ក្រុមហ៊ុន ByteDance នៅក្នុងសហរដ្ឋអាមេរិក លុះត្រាតែ ក្រុមហ៊ុនអាមេរិក ជាអ្នកកាន់កាប់ចំណែកសេវាកម្មរបស់ កម្មវិធី Tik Tok មិនមែនក្រុមហ៊ុនចិន ជាអ្នកគ្រប់គ្រងលើសេវាកម្មនោះទេ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
