ដោយឡែក ការនាំចេញអង្ករសរីរាង្គរបស់កម្ពុជាវិញ ត្រូវបានលោក សម វិទូ ប្រធានមជ្ឈមណ្ឌលសិក្សានិងអភិវឌ្ឍន៍កសិកម្ម ហៅកាត់ថា CEDAC អះអាងថា ក្នុងមួយឆ្នាំ អង្ករសរីរាង្គខ្មែរ បានចរាចរលក់ទៅក្រៅប្រទេសមានប្រមាណ ១ម៉ឺនតោន ដោយក្នុងនោះ មានក្រុមហ៊ុន Amru Rice និងក្រុមហ៊ុន Cambodia Organic Farm Enterprise និងក្រុមហ៊ុនផ្សេងទៀត ធ្វើការនាំចេញ។
ថ្លែងប្រាប់សារព័ត៌មាន ខេមបូណូមីស នៅកណ្តាលវាលស្រែក្នុងទិវាស្រូវ ស្ថិតក្នុងឃុំត្រពាំងធំ ស្រុកត្រាំកក់ ខេត្តតាកែវ ប្រធានអង្គការសេដាករូបនេះ ថ្លែងយ៉ាងដូច្នេះថា៖ «បច្ចុប្បន្ន សេដាក មានក្រុមកសិករផលិតស្រូវសរីរាង្គ (ស្រូវបែបប្រពលវប្បកម្ម) គិតជាផ្ទៃដីប្រមាណ ៦ ទៅ ៧ពាន់ហិកតា សម្រាប់ទូទាំងប្រទេស។ សេដាក មិនប្រមូលទិញនោះទេ តែយើងរៀបចំក្រុមកសិករឲ្យច្បាស់លាស់ដើម្បីផលិតស្រូវសរីរាង្គ ហើយ យើងបានធ្វើការជាមួយក្រុមហ៊ុនឯកជន ដើម្បីរកទីផ្សារជូនកសិករ»។
លោក សម វិទូ បានពន្យល់ថា ការធ្វើស្រែតាមបែបប្រពលវប្បកម្ម គឺតម្រូវឲ្យកសិករជ្រើសរើសពូជស្រូវល្អ ស្ទូងស្រូវមួយដើមៗ មិនប្រើប្រាស់ជីគីមី ពោល គឺអនុវត្តតាមគោលការណ៍ធម្មជាតិ។ បើតាមប្រធានអង្គការសេដាករូបនេះ ការធ្វើស្រែតាមបែបប្រពលវប្បកម្ម ធ្វើឲ្យកសិករមានចំណូលកើនឡើង ៤ដង បើប្រៀបធៀបនឹងការធ្វើស្រែធម្មតា និងមានតម្រូវការខ្ពស់ ទាំងទីផ្សារក្នុងស្រុក និងទីផ្សារអន្តរជាតិ។
លោក សម វិទូ ប្រធានអង្គការ សេដាក។
អត្ថបទគួរអាន!
ទាក់ទងនឹងទីផ្សារអង្ករសរីរាង្គនេះ លោក យ៉ង ភារម្យ អ្នកគ្រប់គ្រងក្រុមហ៊ុន Cambodia Organic Farm Enterprise ដែលប្រមូលទិញស្រូវសរីរាង្គពីកសិកររបស់អង្កការ សេដាក ទៅលក់លើទីផ្សារអន្តរជាតិ បានប្រាប់ ខេមបូណូមីស ក្នុងទិវាស្រូវខាងលើថា ក្នុងរដូវប្រមូលផលពីឆ្នាំ២០១៦-២០១៧ ក្រុមហ៊ុនរបស់លោកបាននាំចេញអង្ករសរីរាង្គទៅកាន់ទីផ្សារសហរដ្ឋអាមេរិក អឺរ៉ុប និងហុងកុង បានចំនួនជាង១ពាន់តោន ហើយនៅក្នុងរដូវប្រមូលផល ២០១៧-២០១៨នេះ ក្រុមហ៊ុនគ្រោងនាំចេញអង្ករសរីរាង្គប្រភេទបាយរឹង (អង្ករនាងក្រហម) ជាង៣ពាន់តោន និងអង្ករក្រអូបជាង ១ពាន់តោន ទៅផ្សារអាមេរិក អឺរ៉ុប និងហុងកុង។
បើតាមលោក យ៉ង ភារម្យ ក្រុមហ៊ុនរបស់លោកទិញស្រូវក្រអូបសរីរាង្គពីកសិករក្នុងតម្លៃ ១៤៥០រៀលក្នុងមួយគីឡូក្រាម ខណៈស្រូវនាងក្រហម (បាយរឹង) ទិញក្នុងតម្លៃ ១១៥០រៀល ដោយនាំទៅសហគមន៍អឺរ៉ុប អាមេរិក និងហុងកុង ក្នុងតម្លៃអង្ករមួយគីឡូក្រាមពី ៣ ទៅ ៧ដុល្លារ។ ស្រូវដែលក្រុមហ៊ុនប្រមូលទិញមានច្រើនជាងគេនៅស្រុកត្រាំកក់ ខេត្តតាកែវ និងបន្តបន្ទាប់ មាននៅខេត្តកំពង់ស្ពឺ កំពត កំពង់ឆ្នាំង ព្រៃវែង និងបាត់ដំបង ជាដើម។
អ្នកជំនាញថា ការធ្វើស្រែសរីរាង្គតាមបែបប្រពលវប្បកម្ម ធ្វើឲ្យកសិករបានចំណូលខ្ពស់ជាងស្រែធម្មតា ដល់ទៅ ៤ដង។
តើអ្នកបានអានអត្ថបទនេះឬនៅ?
ដូចគ្នាដែរ កន្លងមក លោកឧកញ៉ា សុង សារ៉ន អគ្គនាយកក្រុមហ៊ុន Amru Rice បានថ្លែងប្រាប់ ខេមបូណូមីស ថា ក្រុមហ៊ុន Amru Rice បានជំរុញកសិករជិត ៣ពាន់នាក់ ប្រមាណ ១៩សហគមន៍ នៅក្នុងខេត្តព្រះវិហារ ឲ្យផលិតស្រូវសរីរាង្គ។ លោកឧកញ៉ា បានបញ្ជាក់ថា ក្រុមហ៊ុនបាននាំអង្ករសរីរាង្គទៅកាន់តែទីផ្សារអន្តរជាតិ បានពី ២៥០០ ទៅ ៣០០០តោន។
លោកឧកញ៉ាបញ្ជាក់យ៉ាងដូច្នេះថា៖ «ក្រុមហ៊ុនបានផ្តល់ពូជសុទ្ធល្អដែលតម្រូវការទីផ្សារមាន បណ្តុះបណ្តាលបច្ចេកទេស វិធីមើលគុណភាពស្រូវ និងទុកដាក់ស្រូវឲ្យបានល្អ ពង្រឹងសហគមន៍ និងផ្តល់វិញ្ញាបនបត្រជូនកសិករ។ បើកសិករចូលក្រុមធ្វើស្រែសរីរាង្គ គឺទទួលបានផលខុសគ្នា ១តោនរហូត ៨០ ទៅ ១០០ដុល្លារ បើធៀបនឹងកសិករដែលធ្វើស្រូវធម្មតា»។
បើតាម លោកឧកញ៉ា សុង សារ៉ុន គិតចាប់ពីខែមករា ដល់ខែតុលា ឆ្នាំ២០១៧ ក្រុមហ៊ុន Amru Rice នាំអង្ករចេញទៅក្រៅប្រទេសសរុបបានប្រមាណជិត ៣ម៉ឺនតោន ក្នុងនោះ ២ម៉ឺន៥ពាន់តោន គឺនាំចេញទៅប្រទេសជិត ២០ប្រទេស នៅក្នុងអឺរ៉ុប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
