សម្រាប់សំណង់អគារសំខាន់ៗដែលបានសាងសង់រួចរាល់នៅក្នុងខណ្ឌសែនសុខ មានដូចជា បុរីពិភពថ្មី អគារខ្ពស់របស់ក្រុមហ៊ុន Tela ចំនួន២ អគារពាណិជ្ជកម្មអ៊ែតវូដ សកលវិទ្យាល័យមេគង្គកម្ពុជា សាកលវិទ្យាល័យនិងមន្ទីរពេទ្យសែនសុខ សកលវិទ្យាល័យអន្តរជាតិ (IU) មន្ទីរពេទ្យរ៉ូយាល់ភ្នំពេញ និងផ្សារទំនើបរតនាផ្លាហ្សារ ជាដើម។
រីឯគម្រោងសំណង់ធំៗក្នុងខណ្ឌនេះ រួមមាន៖ អគារពាណិជ្ជកម្ម សណ្ឋាគារ ការិយាល័យ និងខុនដូ របស់គម្រោង Star City ដែលសាងសង់មានផ្ទៃដី១៨ម៉ឺនម៉ែត្រការ៉េ នៅជាប់ស្ពានអាកាសដីហុយដែលកំពុងសាងសង់ គម្រោងផ្សារទំនើបអ៊ីអនទី២ (AEON) របស់ជប៉ុន គម្រោងសាងសង់ប៊ូយ៉ុង ថោន របស់កូរ៉េ គម្រោងខុនដូតម្លៃសមរម្យក្រុមហ៊ុន Arakawa របស់ជប៉ុន និងមានគម្រោងធំៗជាច្រើនទៀត។
លោក សន សៀប អគ្គនាយកក្រុមហ៊ុនអចលនទ្រព្យ Key Real Estate បានអះអាងថា ខណ្ឌសែនសុខបានក្លាយជាតំបន់ពេញនិយមសម្រាប់វិនិយោគិនក្នុងការសាងសង់អគារពាណិជ្ជកម្ម និងលំនៅដ្ឋាន។
លោកបញ្ជាក់យ៉ាងដូច្នេះថា៖ «ខណ្ឌសែនសុខ ជាពិសេស ម្តុំជាប់ខណ្ឌទួលគោក ជាតំបន់រកស៊ី និងអភិវឌ្ឍន៍លំនៅដ្ឋាន។ ក្នុងនោះ មានបុរី ប៉េងហួត បុរីពិភពថ្មី ផ្សារអ៊ីអនទី២ ផ្សារម៉ាក្រូ និងកាំកូស៊ីធី ជាដើម។ វាជាតំបន់សក្តានុពលខ្លាំងនៅពេលបច្ចុប្បន្ន និងទៅថ្ងៃអនាគត»។
ផ្សារទំនើបលក់បោះដុំទំនិញជាង ១ម៉ឺន ៥ពាន់មុខ ឈ្មោះ Makro នៅក្នុងទឹកដីនៃខណ្ឌសែនសុខ។
តើអ្នកបានអានអត្ថបទនេះ ឬនៅ?
ដូចគ្នាដែរ លោក ង៉ែត ជូ អ្នកជំនាញសេដ្ឋកិច្ច បានអត្ថាធិប្បាយថា ខណ្ឌសែនសុខជាតំបន់ជិតខណ្ឌទួលគោក ដែលមានការរីកចម្រើន និងត្រូវតែពង្រីកបន្ថែមទៀត។ លោកយល់ថា តំបន់នេះ មានភាពអំណោយផល ព្រោះកន្លងមក អាជ្ញាធរបានចេញគោលការណ៍១០០ម៉ែត្រ មានផ្លូវមួយ ដែលវាជារឿងល្អសម្រាប់អ្នកចង់រស់នៅកន្លែងដែលមានសណ្តាប់ធ្នាប់ល្អ។
បើតាមអ្នកជំនាញសេដ្ឋកិច្ចរូបនេះ ខណ្ឌសែនសុខ សម្បូរបុរីច្រើន ប៉ុន្តែ អគារពាណិជ្ជកម្ម នៅខណ្ឌសែនសុខ នៅមានចំនួនតិចនៅឡើយ បើប្រៀបធៀបជាមួយខណ្ឌចំការមន។
លោកបញ្ជាក់យ៉ាងដូច្នេះថា៖ «ខណ្ឌសែនសុខ បានបុរីភ្នំពេញថ្មី ជាប៊្រេនមួយ។ ខណ្ឌនេះសម្បូរបុរី ដែលជំរុញឲ្យគម្រោងជាច្រើន ដូចជា ផ្សារ E-MART ដ៏ធំរបស់កូរ៉េ នឹងចូលមកវិនិយោគនៅតំបន់នេះ ផ្សារទំនើប អ៊ីអនទី២ របស់ជប៉ុន និងផ្សារទំនើបម៉ាក្រូ ជាដើម»។
លោក ង៉ែត ជូ បានបញ្ជាក់បន្ថែមថា និន្នាការថ្មីនេះនឹងធ្វើឲ្យខណ្ឌសែនសុខក្លាយជាទីក្រុងរណបថ្មីមួយនៅថ្ងៃអនាគត ប៉ុន្តែ លោកបារម្ភថា តំបន់នេះនឹងរងនូវជំនន់ទឹកភ្លៀង ពីព្រោះ ហេដ្ឋារចនាសម្ព័ន្ធ ដូចជា លូ ជាដើម មិនទាន់រៀបចំបានត្រឹមត្រូវ និងគ្រប់គ្រាន់នោះទេ។ លោកបន្ថែមថា តំបន់នេះនៅកៀកនឹងទំនប់កប់ស្រូវ ដែលជាទំនប់ដ៏សំខាន់ក្នុងការរំដោះទឹកចេញពីភ្នំពេញ ហើយវាអាចនឹងមានហានិភ័យ ព្រោះ បច្ចុប្បន្ន បឹងនេះត្រូវបានគេលប់ជាបន្តបន្ទាប់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
