អត្ថបទរបស់ Share America បានសរសេរថា ការស៊ើបអង្កេតនេះ ដែលនឹងសម្របសម្រួលដោយអង្គការសុខភាពពិភពលោក (WHO) នឹងជា"ការវាយតម្លៃដោយឯករាជ្យ មិនលម្អៀង និងគ្រប់ជ្រុងជ្រោយ"ទៅលើការឆ្លើយតបរបស់អន្តរជាតិចំពោះការផ្ទុះឡើងនូវវីរុសកូវីដ១៩។
ការស្នើឲ្យមានការស៊ើបអង្កេតនេះ បានទទួលការអនុម័តយល់ព្រម នៅក្នុងអំឡុងពេលសន្និបាតសុខភាពពិភពលោករបស់ WHO ដែលបានធ្វើឡើងកាលពីខែឧសភា ឆ្នាំ២០២០ នៅទីក្រុងហ្សឺណែវ ប្រទេសស្វ៊ីស។
រដ្ឋមន្ត្រីការបរទេសអាមេរិក លោក Mike Pompeo ធ្លាប់បានលើកឡើងនៅឯសន្និសីទសារព័ត៌មានមួយ កាលពីថ្ងៃទី២០ ខែឧសភា នៅទីក្រុងវ៉ាស៊ីងតុន ថា "យើងនៅជាមួយអូស្ត្រាលី និងប្រទេសជាង ១២០ទៀត ដែលបានគាំទ្រការអំពាវនាវរបស់សហរដ្ឋអាមេរិក ឲ្យមានការស៊ើបអង្កេតទៅលើប្រភពដើមនៃវីរុសកូវីដ១៩ ដើម្បីយើងអាចយល់ថាតើអ្វីដែលបានខុស និងអាចសង្គ្រោះជីវិតមនុស្ស ទាំងនៅពេលបច្ចុប្បន្ន និងទាំងទៅអនាគត" ។
អត្ថបទទាក់ទង
មកទល់នឹងពេលនេះ អ្នកវិទ្យាសាស្ត្រនៅតែមិនទាន់ដឹងអំពីប្រភពដើមនៃវីរុសកូរ៉ូណា (កូវីដ១៩) បើទោះបីជាដើមឡើយ មន្ត្រីចិនអះអាងថា វាបានចាប់ផ្ដើមនៅឯផ្សារលក់សាច់សត្វព្រៃមួយកន្លែង នៅក្នុងទីក្រុងវូហាន ប្រទេសចិនក្ដី។
បើទោះបីជារដ្ឋាភិបាលចិន នៅទីបំផុតទៅ បានយល់ព្រមចុះហត្ថលេខាលើសេចក្ដីថ្លែងការណ៍របស់សន្និបាតសុខភាពពិភពលោកក្ដី បក្សកុំម្មុយនិស្តចិនបានឆ្លើយតបយ៉ាងគឃ្លើនចំពោះការអំពាវនាវឲ្យមានការស៊ើបអង្កេត។
នៅពេលប្រទេសអូស្ត្រាលីអំពាវនាវឲ្យមានការស៊ើបអង្កេតរកប្រភពដើមនៃវីរុសកូវីដ១៩ ឯកអគ្គរដ្ឋទូតចិនបានគំរាមធ្វើពហិកាទំនិញអូស្ត្រាលី ដោយនិយាយថា ប្រសិនបើទំនាក់ទំនងកាន់តែធ្លាក់ចុះ ប្រជាជនសាមញ្ញនឹងគិតអំពីថា តើហេតុអ្វីបានជាពួកគេគួរតែផឹកស្រាក្រហមអូស្ត្រាលី ឬបរិភោគសាច់គោអូស្ត្រាលី?
រដ្ឋមន្ត្រីការបរទេសអាមេរិក លោក Pompeo បានហៅទង្វើបែបនេះ ថាជា"ការសងសឹកផ្នែកសេដ្ឋកិច្ច" ចំពោះការគ្រាន់តែស្នើសុំឲ្យមានការស៊ើបអង្កេតដោយឯករាជ្យ។
លោក Pompeo បាននិយាយថា "ចិននៅតែបដិសេធមិនចែករំលែកព័ត៌មានសំខាន់ៗ ។ ក្រុងប៉េកាំងនៅតែបន្តមិនអនុញ្ញាតឲ្យអ្នកស៊ើបអង្កេតចូលទីកន្លែងពាក់ព័ន្ធនានា មិនផ្ដល់សំណាកវីរុសរស់ និងចាប់ពិរុទ្ធការពិភាក្សាអំពីជំងឺឆ្លងនេះ នៅក្នុងប្រទេសចិន និងមានរឿងជាច្រើនទៀត" ៕
