ក្រុមហ៊ុនជប៉ុន Panasonic ដែលលក់សម្ភារអគ្គិសនីសំខាន់ៗរបស់ខ្លួន រួមមានព្រីភ្លើង កុងតាក់ភ្លើង និងឌីហ្សង់ទ័រនៅប្រមាណ១០០ប្រទេស និងតំបន់ ហើយដើម្បីចាប់យកទីផ្សារអាស៊ីអាគ្នេយ៍ ដែលតម្រូវការប្រើប្រាស់អគ្គិសនីកំពុងកើនឡើង ក្រុមហ៊ុននេះបានសម្រេចឈានជើងចូលទីផ្សារកម្ពុជា នៅក្នុងឆ្នាំ២០២៥ នេះ ហើយបន្ទាប់មកប្រទេសឡាវ។
ទន្ទឹមនេះ ក្រុមហ៊ុននេះក៏នឹងពន្លឿនការវិនិយោគលើស្វ័យប្រវត្តិកម្ម និងបង្កើនផលិតកម្មនៅរោងចក្ររបស់ខ្លួនក្នុងខេត្តប៊ិញយឿង (Binh Duong) ប្រទេសវៀតណាម ភាគខាងត្បូងផងដែរ។ ក្រុមហ៊ុននេះគ្រោងបង្កើនអត្រាស្វ័យប្រវត្តិកម្មនៅរោងចក្រធំរបស់ខ្លួនក្នុងប្រទេសវៀតណាម ខាងលើនេះ ពី៤២% ដែលខ្លួនសម្រេចបានក្នុងឆ្នាំសារពើពន្ធ២០២២ ឱ្យឈានដល់៩០% ក្នុងសារពើពន្ធ២០២៥ ដើម្បីកបង្កើនការប្រកួតប្រជែងផ្នែកថ្លៃដើម។
ក្រុមហ៊ុន Panasonic បានដាក់គោលដៅបង្កើនសមត្ថភាពផលិតនៅរោងចក្រក្នុងប្រទេសវៀតណាមចំនួន៨០% ពី៩លានឯកតា ក្នុងមួយខែៗនាពេលបច្ចុប្បន្នឱ្យឈានដល់១៦លានឯកតានៅត្រឹមឆ្នាំសារពើពន្ធ២០៣០។
ខណៈដែលបណ្ដាក្រុមហ៊ុនសហគ្រាសផលិតរបស់ចិន ផ្តល់ជម្រើសដែលមានតម្លៃថោកជាង និងដណ្ដើមចំណែកទីផ្សារនៅអាស៊ីអាគ្នេយ៍ ក្រុមហ៊ុន Panasonic បានផ្លាស់ប្តូរការអភិវឌ្ឍផលិតផលពីប្រទេសជប៉ុន មកកាន់ប្រទេសវៀតណាម ដើម្បីពន្លឿនការអភិវឌ្ឍនវានុវត្តន៍ថ្មី។
សូមបញ្ជាក់ថា ក្រុមហ៊ុន Panasonic បានដាក់គោលដៅសម្រេចឱ្យបាននូវកំណើនរឹងមាំក្នុងអាជីវកម្មផលិតសម្ភារអគ្គិសនីរបស់ខ្លួន ដោយកំណត់គោលដៅលក់ឱ្យបានចំនួន១,៧ពាន់លានដុល្លារអាម៉េរិក និងកំណើនប្រចាំឆ្នាំ១០% ដោយក្នុងនោះប្រទេសវៀតណាម ឥណ្ឌា និងតួកគី មានចំណែកគ្របដណ្ដប់រហូតដល់ទៅជិត៨០% នៃប្រាក់ចំណូលរបស់ខ្លួន៕
ដោយ: តែម សុខុម
