តើមានកត្តាអ្វីជំរុញឱ្យអ្នកជំនាញប្រាប់ធនាគារនានានៅវៀតណាម ឱ្យរឹតបន្តឹងការអនុម័តកម្ចីប្រើប្រាស់ផ្ទាល់ខ្លួន?

ក្រុមអ្នកបង្កើតគោលនយោបាយ និងអ្នកជំនាញក្នុងវិស័យធនាគារនៅវៀតណាម បានលើកឡើងថា ទោះបីជាលក្ខខណ្ឌតម្រូវសម្រាប់កម្ចីប្រើប្រាស់ផ្ទាល់ខ្លួនក្រោម៤ពាន់ដុល្លារអាម៉េរិក ត្រូវបានកាត់បន្ថយយ៉ាងណាក្ដី តែធានាគារនានាគួរតែរឹតបន្តឹងការអនុម័តកម្ចីប្រើប្រាស់ផ្ទាល់ខ្លួន ដើម្បីកាត់បន្ថយហានិភ័យ ដោយសារកម្ចីប្រភេទនេះពិបាកប្រមូលត្រលប់មកវិញ បើទោះបីជាមានអន្តរាគមន៍ពីអាជ្ញាធរក្នុងករណីខ្លះយ៉ាងណាក្ដី។

លោក ដាវ មិញ ទូ (Dao Minh Tu) ទេសាភិបាលរងនៃធនាគារកណ្ដាលវៀតណាម (SBV) បានលើកឡើងថា ការកាត់បន្ថយលក្ខខណ្ឌតម្រូវសម្រាប់កម្ចីប្រើប្រាស់ផ្ទាល់ខ្លួន គឺដើម្បីជំរុញការចាយវាយរបស់ពលរដ្ឋទូទាំងប្រទេស តែទោះជាយ៉ាងណា ការអនុម័តកម្ចីប្រភេទនេះនៅតែតឹងរ៉ឹង។ លោកយល់ថា ធនាគារនានាគួរផ្ដោតអាទិភាពសំខាន់លើការធានានូវការសងត្រលប់ ដើម្បីការពារកុំឱ្យបាត់បង់ប្រាក់របស់អ្នកដាក់ប្រាក់បញ្ញើ។

សមាគមធនាគារវៀតណាម (VNBA) បានរាយការណ៍ថា កម្ចីប្រើប្រាស់ផ្ទាល់ខ្លួនបានកើនឡើងខ្លាំងគួរឱ្យកត់សម្គាល់ ដែលនេះគឺជាហានិភ័យដែលមិនគួរមើលរំលង៕

ដោយ: តែម សុខុម