លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ បានប្រាប់សារព័ត៌មានខេមបូណូមីស ថា ប្រជាកសិករប្រមាណជាង៣០០គ្រួសារក្នុងភូមិចំនួន៣ ស្ថិតក្នុងឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ បានប្តូរពីការដាំដំណាំផ្សេងមកដាំម្នាស់នៅលើផ្ទៃដីជិត៤០០ហិកតា។ បើតាមមន្រ្តីជំនាញកសិកម្មរូបនេះ ទីផ្សារម្នាស់របស់កសិករនៅប៉ុន្មានឆ្នាំចុងក្រោយនេះមិនមានអ្វីចោទជាបញ្ហានោះទេ ដោយមានឈ្មួញចុះទិញដល់ចម្ការ និងផ្តល់តម្លៃសមរម្យ។ បើតាមការអះអាងរបស់ប្រធានមន្ទីររូបនេះ ផ្ទៃដីមួយហិកតា គេអាចដាំម្នាស់បានចន្លោះពី៦ម៉ឺនកូនទៅ៧ម៉ឺនកូន ខណៈផ្លែម្នាស់លេខ១អាចលក់បានតម្លៃចន្លោះពី១ម៉ឺន២ពាន់រៀលទៅ១ម៉ឺន៤ពាន់រៀលក្នុង១ឡូ និងម្នាស់លេខ២អាចលក់បានចន្លោះពី៨ពាន់រៀលទៅ១ម៉ឺនរៀលក្នុង១ឡូ។
ជាមួយគ្នានេះលោក ធឿន ប៊ុនធីម កសិករដាំម្នាស់ម្នាក់លើផ្ទៃដីទំហំជាង៣ហិកតា ក្នុងឃុំទន្លេបិទ បានឱ្យដឹងថា ជាមធ្យមនៅក្នុងផ្ទៃដីទំហំ១ហិកតា កសិករអាចប្រមូលផលផ្លែម្នាស់បានប្រមាណ៥០តោន ដោយអាចរកចំណូលបានប្រមាណ១ម៉ឺនដុល្លារ និងអាចអាចផ្តល់ប្រាក់ចំណេញប្រមាណ៥ពាន់ដុល្លារ។ កសិកររូបនេះកត់សម្គាល់ឃើញថា នៅពីរឆ្នាំចុងក្រោយនេះ ទីផ្សារផ្លែម្នាស់ហាក់មានស្ថិរភាពទីផ្សារល្អប្រសើរ។ ទោះបីនៅឆ្នាំនេះ ផ្លែម្នាស់មានទីផ្សារល្អក៏ពិតមែន ប៉ុន្តែលោក ធឿន ប៊ុនធីម បារម្ភថា ផ្លែម្នាស់អាចនឹងមានបញ្ហាប្រឈមនៅឆ្នាំខាងមុខ ដោយសារលោកសង្កេតឃើញមានកសិករចាប់ផ្ដើមបង្កើនផ្ទៃដីដាំដុះកើនឡើងជាងមុន។
ពាក់ព័ន្ធនឹងទីផ្សារនេះដែរលោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានណែនាំដល់កសិករឱ្យប្រមូលផ្ដុំគ្នាចងក្រងជាសហគមន៍កសិកម្ម ព្រោះការចងក្រងនេះនឹងរក្សាបាននូវស្ថិរភាពតម្លៃជាមួយកិច្ចសន្យាទីផ្សារជាក់លាក់នៅមុនការដាំដុះ៕
អត្ថបទ៖ បូ ដូឡា,រូបភាព ឯកសារ
