ការស្នើសុំនេះ ធ្វើឡើងនៅក្នុងជំនួបរវាងឯកឧត្តមរដ្ឋមន្ត្រីក្រសួងពាណិជ្ជកម្មកម្ពុជា និងអនុរដ្ឋមន្ត្រីពាណិជ្ជកម្មចិន នៅឯប្រទេសសាំងហ្គាពួរកាលពីថ្ងៃទី១២ វិច្ឆិកា ឆ្នាំ២០១៨។
ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាគណៈប្រតិភូកម្ពុជា បានជួបពិភាក្សាការងារទ្វេភាគីជាមួយឯកឧត្តម Wang Shouwen អនុរដ្ឋមន្រ្តីពាណិជ្ជកម្មចិន ដោយក្នុងជំនួបនោះ កម្ពុជា បានស្នើដល់ភាគីចិន ដើម្បីធ្វើយ៉ាងណាជំរុញឲ្យអង្ករកម្ពុជាអាចនាំចេញទៅចិនបានដល់ ៣០ម៉ឺន តោនក្នុង១ឆ្នាំ ដូចដែលបានឯកភាពគ្នា និងបង្កើនបន្ថែមទៀតនាពេលអនាគត។ មិនតែប៉ុណ្ណោះ ឯកឧត្តម ប៉ាន សូរស័ក្ដិ ក៏បានស្នើឲ្យភាគីចិន មកវិនិយោគនៅកម្ពុជា និងនាំចេញទៅចិនវិញ ដែលជាគោលនយោបាយឈ្នះ-ឈ្នះ សម្រាប់ភាគីទាំងពីរផងដែរ។
អត្ថបទទាក់ទង!
ជាការឆ្លើយតប ឯកឧត្តម Wang Shouwen អនុរដ្ឋមន្រ្តីចិន បានថ្លែងថា ចិនតែងតែលើកទឹកចិត្ត និងគាំទ្រដល់វិនិយោគិនចិនមកវិនិយោគនៅកម្ពុជា ហើយចំពោះករណីអង្ករនាំចូលពីកម្ពុជានេះ ភាគីចិននឹងឆ្លើយតបក្រោយពីពិភាក្សាផ្ទៃក្នុងរួច តែជាទូទៅនឹងខិតខំនាំចូលឲ្យបានដល់ ៣០ម៉ឺនតោន ដែលជាកូតាឆ្នាំ២០១៨។
ទោះយ៉ាងណា របាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងរយៈពេល ៩ខែ ឆ្នាំ២០១៨នេះ ការនាំចេញអង្កររបស់កម្ពុជា សម្រេចបានប្រមាណ ៣៩ម៉ឺនតោន។ ដែលក្នុងនោះ ការនាំចេញអង្ករទៅប្រទេសចិន គឺឈរក្នុងលំដាប់នាំមុខគេ មានប្រមាណជាង ៩,៧ ម៉ឺនតោន ខណៈដែលកម្ពុជានិងចិន ធ្លាប់ឯកភាពគ្នា លើកូតានាំអង្ករពីកម្ពុជាទៅចិននៅឆ្នាំ២០១៨នេះ ប្រមាណ ៣០ម៉ឺនតោន។
លោក កាន់ គន្ធី នាយករងក្រុមហ៊ុននាំចេញអង្ករ Amru Rice បានលើកឡើងថា ការនាំចេញអង្ករកម្ពុជាទៅកាន់ប្រទេសចិន នៅមានចំនួនតិចនេះ គឺមិនមានដោយសារតែភាគីកម្ពុជានោះទេ ប៉ុន្ដែ វាដោយសារតែចិនខ្លួនឯងទៅវិញទេ ព្រោះចិនកំពុងមានជម្លោះពាណិជ្ជកម្មជាមួយអាមេរិក ដែលបានធ្វើឲ្យប្រាក់យ័នរបស់ចិនបានហើមឡើងប្រមាណ ១០% ខណៈដែលការនាំចេញរបស់កម្ពុជា គឺផ្អែកលើប្រាក់ដុល្លារអាមេរិក ដូច្នេះ វាធ្វើឲ្យការនាំចេញទៅចិនមានតម្លៃខ្ពស់ជាងមុន។
លោក កាន់ គន្ធី បានបន្ថែមទៀតថា មួយរយៈចុងក្រោយនេះ ដោយសារតែមានផ្ទុះសង្គ្រាមពាណិជ្ជកម្មជាមួយសហរដ្ឋអាមេរិក ចិនក៏បានបង្វែរការទិញអង្ករសពីប្រទេសកម្ពុជា ទៅទិញអង្ករសពីប្រទេសឥណ្ឌាផងដែរ ដើម្បីជាការចងសម្ព័ន្ធមិត្តជាមួយឥណ្ឌា។
បើតាមការគូសបញ្ជាក់ពី នាយករងក្រុមហ៊ុន Amru Rice រូបនេះ តាមការប៉ាន់ស្មាន នៅឆ្នាំនេះ ការនាំចេញអង្ករទៅចិន អាចមានក្នុងរង្វង់តែ ២០ម៉ឺនតោនប៉ុណ្ណោះ ដោយសារតែក្រុមហ៊ុនចិនមិនសូវបញ្ជាទិញអង្ករច្រើនពីកម្ពុជា។
សូមជម្រាបថា ក្នុងឆ្នាំ២០១៧កន្លងទៅនេះ ការនាំចេញអង្ករទៅបរទេសរបស់កម្ពុជា សម្រេចបានជាង ៦៣,៥ម៉ឺនតោន កើនឡើងជិត ១០ម៉ឺនតោន ស្មើនឹងប្រមាណ ១៧% បើធៀបនឹងឆ្នាំ ២០១៦ ។ នេះបើយោងតាមរបាយការណ៍របស់លេខាធិការដ្ឋានច្រកចេញ ចូលតែមួយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
