អាជ្ញាធរគ្រប់គ្រងទីផ្សាយរថយន្តក្នុងប្រទេសចិន បានគូសបញ្ជាក់ថា រថយន្តតេស្លាម៉ូដែល៣ (Tesla Model 3) និង តេស្លាម៉ូដែលវ៉ាយ (Tesla Model Y) សរុបចំនួន ២៨ម៉ឺន៥ពាន់គ្រឿង ទាំងរថយន្តដែលផលិតក្នុងប្រទេសចិន និងទាំងរថយន្តដៃលបាននាំចូលបន្ថែម នឹងត្រួវប្រមូលចូលរោងចក្រ យកទៅពិនិត្យប្រព័ន្ធបច្ចេកវិទ្យាឡើងវិញ។ តម្លៃភាគហ៊ុនរបស់ក្រុមហ៊ុនតេស្លា ក៏បានដាំក្បាលចុះដល់ទៅ ៨%ភ្លាមៗដែរ ក្រោយពីបានប្រកាសប្រមូលរថយន្តចូលរោងចក្រវិញ ដោយសារបញ្ហាបច្ចេកទេសនេះ។
បើតាមអាជ្ញាធរចិនដដែល រថយន្តដ៏ច្រើនសន្ធឹកសន្ធាប់នេះ មានបញ្ហាបច្ចេកទេស សុះហ្វ៊ែរ(Software) និយាយឲ្យងាយយល់ គឺមានបញ្ហាលើប្រព័ន្ធកម្មវិធីផ្នែកខាងក្នុងនៃរថយន្ត ដែលបានធ្វើឲ្យមានដំណើរការមិនប្រក្រតី លើប្រព័ន្ធគ្រប់គ្រងល្បឿន ដោយស្វ័យប្រវត្តិ ដែលភ្ជាប់មកជាមួយនឹងរថយន្តតេស្លាទាំងពីរម៉ូដែលខាងលើ ខណៈម៉ូដែលផ្សេងៗទៀត ពុំមានការរាយការណ៍ថាមានបញ្ហាបច្ចេកទេសនេះនៅឡើយទេ។
អត្ថបទទាក់ទង
កន្លងមក ភាពមិនប្រក្រតីខាងលើត្រូវបានគេរាយការណ៍ថា ធ្វើឲ្យរថយន្តស្ទុះទៅមុខ បង្កើនល្បឿនលឿនខ្លាំងមួយរំពេច។ គេនៅចាំបានថា កាលពីប៉ុន្មានខែមុន មានអ្នកបើកបររថយន្ដតេស្លាជួបគ្រោះថ្នាក់ចរាចរណ៍បណ្តាលឲ្យមានស្លាប់បាត់បង់ជីវិត ដែលគេបានដាក់ការសង្ស័យថា បណ្តាលមកពីបញ្ហាបច្ចេកទេសនេះ។
គួររំឭកថា កាលពីខែមេសាកន្លងទៅថ្មីៗនេះបានផ្ទុះការភ្ញាក់ផ្អើលមួយ ក្នុងកម្មវិធីតាំងបង្ហាញរថយន្តតេស្លាក្នុងប្រទេសចិនដោយមានស្ត្រីជនជាតិចិនម្នាក់បានចូលទៅស្រែកតវ៉ាក្នុងពិធីដាក់បង្ហាញនោះ ថានាងបានជួបនឹងគ្រោះថ្នាក់ចរាចរណ៍ ដោយសាររថយន្តស្ទុះទៅមុខលឿន ប៉ុន្តែហ្វ្រាំងរបស់តេស្លាមិនដំណើរការ។
តេស្លាចាប់ផ្តើមធ្លាក់ចុះប្រជាប្រិយភាពនៅចិន ចាប់តាំងពីពេលនោះមក ដោយមានការត្អូរត្អែរជាច្រើនពីអ្នកប្រើប្រាស់អំពីបញ្ហាសុវត្ថិភាព និងគុណភាពនៃរថយន្តម៉ាកពីអាមេរិកមួយនេះ។ ជាក់ស្តែងនៅពេញមួយខែឧសភាកន្លងទៅ តេស្លាបញ្ចេញលក់រថយន្តក្នុងទីផ្សារប្រទេសចិន បានតែជាង៣ម៉ឺន៣ពាន់គ្រឿងប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
