បើសិនជាកោះតៃវ៉ាន់ ពិតជាត្រូវបានវាយប្រហារដោយចិន តើប្រទេសណាមួយដែលអាចនឹងលើកទ័ពជួយតៃវ៉ាន់? នេះគឺជាប្រធានបទមួយ ដែលត្រូវបាន អង្គការមូលនិធិមតិសារធារណៈរបស់តៃវ៉ាន់ ធ្វើការស្ទង់មតិទៅលើប្រជាជនតៃវ៉ាន់ ហើយជាលទ្ធផល មានប្រហែល ៤០% នៃអ្នកត្រូវបានសាកសួរសំណួរនេះឆ្លើយថា ពួកគេជឿជាក់ប្រទេសជប៉ុន នឹងជាអ្នកបញ្ជូនកងទ័ព ដើម្បីចូលជួយការពារកោះតៃវ៉ាន់ ប្រសិនបើចិនដីគោកបើកការវាយប្រហារ ខណៈដែលចំនួនអ្នកដែលឆ្លើយជឿជាក់លើប្រទេសជប៉ុននេះ គឺមានច្រើនជាងអ្នកឆ្លើយថាសហរដ្ឋអាមេរិកនឹងជាអ្នកមកជួយកោះតៃវ៉ាន់ទៅទៀត។
ការស្ទង់មតិរយៈពេលពីរថ្ងៃ ដែលធ្វើឡើងចាប់តាំងពីថ្ងៃទី ១៤ ខែមីនា ដោយអង្គការមូលនិធិមតិសាធារណៈតៃវ៉ាន់បានរកឃើញថា ៤៣ ភាគរយនៃអ្នកឆ្លើយសំណួរ គឺបានជឿថា ជប៉ុននឹងមកជួយតៃវ៉ាន់ តាមរយៈផ្នែកយោធា ប្រសិនបើទីក្រុងប៉េកាំងបើកការវាយប្រហារលើក្រុងតៃប៉ិមែននោះ ខណៈអ្នកដែលនិយាយថា សហរដ្ឋអាមេរិកនឹងបញ្ជូនកងទ័ពមកជួយតៃវ៉ាន់គឺមានត្រឹមតែ ៣៥%ប៉ុណ្ណោះ ខណៈដែលអាមេរិក ត្រូវបានគេមើលឃើញថា គឺជាបងធំ ជាខ្នងបង្អែកដ៏ធំរបស់តៃវ៉ាន់។
អត្ថបទគួរអាន
លោក You Ying-lung ប្រធានមូលនិធិ អង្គការមូលនិធិមតិសាធារណៈបាននិយាយដែរថា ជម្លោះរវាងអ៊ុយក្រែន និងរុស្ស៊ីបានជះឥទ្ធិពលយ៉ាងខ្លាំងដល់មតិសាធារណជនតៃវ៉ាន់។
សូមជម្រាថា ការឈ្លានពានរបស់រុស្ស៊ីលើអ៊ុយក្រែនដែលបានចាប់ផ្តើមកាលពីចុងខែកុម្ភៈ បានបង្កឱ្យមានការរិះគន់ជាអន្តរជាតិ ដោយក្នុងនោះ សហរដ្ឋអាមេរិក សហភាពអឺរ៉ុប និងសម្ព័ន្ធមិត្តផ្សេងទៀត ក៏បានដាក់សម្ពាធប្រឆាំងនឹងការឈ្លានពានរបស់រុស្ស៊ី ទៅលើអ៊ុយក្រែនផងដែរ។
មែនទែនទៅ អង្គការមូលនិធិមតិសាធារណៈរបស់តៃវ៉ាន់នេះ មិនមែនទើបតែធ្វើការស្ទង់មតិនេះជាលើកទី១នោះទេ កន្លងមកអង្គការនេះ ក៏បានធ្វើការស្ទង់មតិលើប្រធានបទដូចគ្នានេះកាលពីខែវិច្ឆិកាឆ្នាំមុនម្ដងរួចហើយដែរ ដោយលទ្ធផលនៃការស្ទង់មតិបង្ហាញថា មាន ៥៨% នៃប្រជាជនតៃវ៉ាន់ បាននិយាយថា ពួកគេគិតថាជប៉ុននឹងបញ្ជូនទាហានសម្រាប់ការពារតៃវ៉ាន់ ខណៈ ៦៥%ទៀត ជឿលើអាមេរិក។
ស្ថានភាពកោះតៃវ៉ាន់ ជាមួយនឹងចិនដីគោកបានកើនកម្ដៅកាន់តែខ្លាំងឡើងៗ នៅប៉ុន្មាឆ្នាំចុងក្រោយនេះ ខណៈដែលការគំរាមកំហែងដោយសកម្មភាពយោធារបស់ចិន ទៅលើកោះតៃវ៉ាន់ក៏បានកើតឡើងកាន់តែច្រើនដែរ។ ទោះយ៉ាងណា ទីក្រុងប៉េកាំង តែងតែអះអាង តៃវ៉ាន់ជាខេត្តមួយរបស់ខ្លួន និងគ្មានថ្ងៃអាចកាត់ផ្ដាច់ពីចិនបានឡើយ ហើយចិនប្ដេជ្ញានឹងបង្រួបបង្រួមតៃវ៉ាន់ដោយសន្ដិវិធី៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
