សម្ដេចបានលើកឡើងបែបនេះក្នុងឱកាសសម្ដេចអញ្ជើញចូលរួមសម្ពោធដាក់ឲ្យប្រើប្រាស់ជាផ្លូវការនូវមន្ទីរពេទ្យមិត្តភាពកម្ពុជា-ចិនត្បូងឃ្មុំ នៅថ្ងៃទី៧ ខែមីនា ឆ្នាំ២០២២។
ថ្លែងនាឱកាសសម្ពោធដាក់ឲ្យប្រើប្រាស់ជាផ្លូវការនូវមន្ទីរពេទ្យមិត្តភាពកម្ពុជា-ចិនត្បូងឃ្មុំ សម្តេច ហ៊ុន សែន នាយករដ្ឋមន្ត្រីកម្ពុជា បានបង្ហាញនូវកត្តាមួយចំនួនដែលជាបញ្ហាប្រឈមនៃកិច្ចប្រជុំពិសេសអាស៊ាន-អាមេរិក។ សម្ដេចបន្តថា ជុំវិញកិច្ចប្រជុំនេះ ក្នុងនាមប្រទេសឥណ្ឌូនេស៊ី ជាអ្នកសម្របសម្រួល នៅមិនទាន់បានសម្របសម្រួលពេលវេលានៅឡើយទេ ហើយមេដឹកនាំអាស៊ានជាច្រើនទាមទារឲ្យមានការប្រជុំនៅថ្ងៃទី២៦-២៧ ខែមីនា ខណៈសហរដ្ឋអាមេរិក ឯណោះវិញ ចក៏មិនអាចទទួលយកពេលវេលានៃកិច្ចប្រជុំនាថ្ងៃទី២៦-២៧ ខែមីនាបានដែរ ដោយស្នើឲ្យរៀបចំនៅថ្ងៃទី ២៨-២៩ ខែមីនាវិញ ប៉ុន្ដែ នៅមិនទាន់ត្រូវរ៉ូវឯកភាពគ្នានៅឡើយពីខាងភាគីអាស៊ាន។
សម្ដេច ហ៊ុន សែន បានគូសបញ្ជាក់ថា បើសិនអាស៊ាន និងសហរដ្ឋអាមេរិក មិនអាចឯកភាពគ្នាចំពោះពេលវេលា ដូច្នេះកិច្ចប្រជុំកំពូលអាស៊ាន-អាមេរិក នឹងត្រូវលើកពេល។ ក្នុងនាមជាប្រធានអាស៊ានក្នុងឆ្នាំ២០២២នេះ សម្តេចតេជោ ហ៊ុន សែន បានសង្កត់ធ្ងន់ថា កិច្ចប្រជុំអាចធ្វើឡើងនៅពេលវេលាណាក៏បាន លើកលែងតែនៅចន្លោះពាក់កណ្តាល ខែឧសភា ដល់ពាក់កណ្តាល ខែមិថុនា ព្រោះតែពេលវេលានោះ ជាពេលកម្ពុជាត្រូវរៀបចំការបោះឆ្នោតក្រុមប្រឹក្សាឃុំ-សង្កាត់ ដែលជាពេលវេលា ដែលសម្តេចមិនអាចចាកចេញពីប្រទេសកម្ពុជានោះឡើយ។
អត្ថបទទាក់ទង
កិច្ចប្រជុំអាស៊ាននេះ គ្រោងធ្វើឡើងនៅទីក្រុងវ៉ាស៊ិនតោនសហរដ្ឋអាមេរិក ហើយកន្លងទៅនេះ មន្ត្រីជាន់ខ្ពស់អាមេរិកអះអាងថា មេដឹកនាំប្រទេសអាស៊ានតែចំនួន៩ប៉ុណ្ណោះដែលនឹងត្រូវចូលរួមក្នុងកិច្ចប្រជុំកំពូលនេះ ខណៈដែលមេដឹកនាំប្រទេសមីយ៉ាន់ម៉ាមិនត្រូវបានអញ្ជើញឲ្យចូលរួមនោះទេ ប៉ុន្ដែ អនុញ្ញាតឲ្យអ្នកដែលមិនមានជាអ្នកនយោបាយចូលរួមជំនួសវិញ។
រដ្ឋបាលអាមេរិកចាត់ទុកកិច្ចប្រជុំអាមេរិក ជាមួយនឹងមេដឹនាំអាស៊ាននេះ គឺជា "អាទិភាពកំពូល" ដើម្បីបម្រើជា "ដៃគូដ៏រឹងមាំ និងគួរឱ្យទុកចិត្តសម្រាប់អាស៊ាន និងធ្វើការរួមគ្នាដើម្បីដោះស្រាយបញ្ហាប្រឈមនានា។
គួររំឭកថា កាលពីឆ្នាំមុន លោកចូ បៃដិនប្រធានាធិបតីអាមេរិក បានចូលរួមកិច្ចប្រជុំកំពូលទាក់ទងនឹងអាស៊ាន ដែលធ្វើឡើងជាទម្រង់អនឡាញ ចំពេលមានការរីករាលដាលនៃមេរោគឆ្លងកូវីដ១៩។ នៅគ្រានោះ លោក ប៉ៃដិន បានសង្កត់ធ្ងន់លើសារៈសំខាន់នៃការបង្ហាញមុខរបស់អាមេរិកក្នុងកិច្ចប្រជុំអាស៊ាន ដែលផ្ទុយពីលោក ដូណាល់ ត្រាំ ដែលត្រូវបានរិះគន់ ដោយសម្ព័ន្ធមិត្តអាស៊ីប៉ាស៊ីហ្វិកចំពោះការមើលងាយកិច្ចប្រជុំសំខាន់ៗនៅក្នុងតំបន់នេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
