នៅក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និង គរុនិស្សិតបច្ចេកទេស ជ័យលាភីនៃវិទ្យាស្ថានជាតិបណ្តុះបណ្តាលបច្ចេកទេស (NTTI) នាថ្ងៃទី២៧ ខែកុម្ភៈ ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានគូសបញ្ជាក់ថា កម្ពុជាកំពុងតែទាក់ទាញនូវអ្នកវិនិយោគ ដែលចូលមកកាន់ប្រទេសកម្ពុជា ដោយសម្តេចតែងតែប្រាប់ទៅដល់អ្នកវិនិយោគបរទេស អំពីគោលនយោបាយឧស្សាហកម្មរបស់កម្ពុជា ឱ្យផ្តោតការយកចិត្តទុកដាក់សម្រាប់ការមកវិនិយោគនៅកម្ពុជាទៅលើគោលដៅសំខាន់ គឺកម្ពុជាចង់ទាក់ទាញអ្នកវិនិយោគមកវិនិយោគលើឧស្សាហកម្មកែច្នៃ ដោយប្រើប្រាស់នូវវត្ថុធាតុដើមក្នុងស្រុកដែលកម្ពុជាមានស្រាប់។
យ៉ាងណាមិញ សម្តេចតេជោ បានអះអាងថា នៅពេលខាងមុខបើកម្ពុជាមានលទ្ធភាព កម្ពុជាអាចនឹងក្លាយទៅជាប្រទេសដែលចែកចាយផលិតផលគ្រាប់ស្វាយចន្ទីដ៏ខ្លាំងមួយផងដែរ នៅចំណោមប្រទេសខ្លាំងៗដទៃទៀត ពីព្រោះថាក្នុង១ឆ្នាំៗ កម្ពុជាអាចនាំចេញគ្រាប់ស្វាយចន្ទីដែលមិនទាន់កែច្នៃបានប្រមាណ ១លានតោន ប៉ុន្ដែគ្រាប់ស្វាយចន្ទីដែលកែច្នៃរួចគឺមានចំនួនតិចតួចប៉ុណ្ណោះ។
សម្ដេចតេជោ ហ៊ុន សែន ក៏បានគូសបញ្ជាក់ឱ្យដឹងដែរថា គោលនយោបាយជាតិស្តីពីស្វាយចន្ទី ដែលកម្ពុជាបានដាក់ចេញកាលពីពេលថ្មីៗនេះ គឺសម្រាប់សំដៅទាក់ទាញឱ្យមានការកែច្នៃគ្រាប់ស្វាយចន្ទី នៅក្នុងស្រុកឱ្យបានច្រើន ដោយសារកន្លងមក ភាគច្រើនកម្ពុជាធ្វើការនាំចេញគ្រាប់ស្វាយចន្ទីដែលមិនទាន់កែច្នៃរួចទៅកាន់ប្រទេសវៀតណាម ខណៈកម្ពុជា គឺមានវត្ថុធាតុដើមហើយ ក៏ប៉ុន្តែការកែច្នៃនៅមិនទាន់មានច្រើននៅឡើយ។
អត្ថបទគួរអាន
សម្តេច ក៏បានសង្កត់ធ្ងន់ដែរថា ការវិនិយោគលើឧស្សាហកម្មកែច្នៃនេះ គឺជាចំណុចសំខាន់មួយដែលអាចកែច្នៃវត្ថុធាតុដើមក្នុងស្រុក ដែលមានស្រាប់ផង និងអាចបង្កើតឱកាសការងារដល់ប្រជាពលរដ្ឋ ក៏ដូចជាការបង្កើតបាននូវតម្លៃបន្ថែមសម្រាប់ខ្សែចង្វាក់ផលិតកម្មរបស់កម្ពុជាផងដែរ ពីព្រោះកម្ពុជាមានវត្ថុធាតុដើមជាច្រើន ដូចជា ស្រួវអង្ករ គ្រាប់ស្វាយចន្ទី កៅស៊ូ និង ដំឡូងមីជាដើម។
ពាក់ព័ន្ធនឹងខ្សែចង្វាក់ផលិតកម្មស្វាយចន្ទីនេះដែរ សមាគមស្វាយចន្ទីកម្ពុជា បានដឹកនាំប្រតិភូចូលរួមក្នុងពិធីបុណ្យចន្ទីប្រចាំឆ្នាំនៅប្រទេសវៀតណាមលើកទី១២ កាលពីថ្ងៃទី២៦ ខែកុម្ភៈនេះ ដោយក្នុងឱកាសនោះ ថ្នាក់ដឹកនាំសមាគមស្វាយចន្ទីកម្ពុជា ក៏បានដឹកនាំក្រុមហ៊ុនលក់ទិញគ្រាប់ឆៅ និងក្រុមហ៊ុនកែច្នៃ ដើម្បីចុះអនុស្សារណៈយោគយល់រវាង សមាគមស្វាយចន្ទីកម្ពុជា និង សមាគមស្វាយចន្ទីវៀតណាម ក្នុងការទិញលក់គ្រាប់ឆៅត្រង់ទៅក្រុមហ៊ុនកែច្នៃរបស់វៀតណាម ដើម្បីកាត់បន្ថយការទិញតាមរយៈឈ្មួញកណ្តាលផងដែរ ដោយសារតែកម្ពុជាមានរោងចក្រកែច្នៃតិច ទើបត្រូវការការបញ្ជាទិញគ្រាប់ស្វាយចន្ទីឆៅពីវៀតណាមយ៉ាងដូច្នេះ៕
