នៅក្នុងបទសម្ភាសន៍ផ្ដាច់មុខមួយជាមួយនឹងសារព័ត៌មានខេមបូណូមីស កាលពីចុងខែមករាកន្លងទៅនេះ លោក កេន លូ អគ្គលេខាធិការសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានអះអាងថា កត្តាដែលធ្វើឲ្យការបញ្ជាទិញផលិតផក្នុងវិស័យកាត់ដេរ និងវាយនភណ្ឌបន្តធ្លាក់ចុះ គឺដោយសារក្រុមហ៊ុនបញ្ជាទិញមិនទាន់បញ្ចេញស្តុកចាស់អស់ ក្រោយតម្រូវការប្រើប្រាស់របស់ប្រជាពលរដ្ឋនៅតាមប្រទេសបញ្ជាទិញមានការធ្លាក់បន្ទាប់ពីពួកគេប្រឈមនឹងវិបត្តិអតិផរណា ដែលបង្កឡើងដោយសង្គ្រាមរវាងរុស្ស៊ី និងអ៊ុយក្រែន។ ក្នុងន័យនេះ លោក កេ លូ បញ្ជាក់កម្មករអាចប្រឈមនឹងការកាត់បន្ថយម៉ោងការងារយ៉ាងហោចណាស់នៅរយៈពេល៦ខែ ទើបអាចស្ថានភាពប្រសើរឡើងវិញ។
ការបញ្ជាទិញផលិតផលវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរមានការធ្លាក់ចុះបានជំរុញម្ចាស់រោងចក្រភាគច្រើននៅកម្ពុជាបានកាត់បន្ថយការថែមម៉ោង ឬថ្ងៃធ្វើការ និងមានរោងចក្រខ្លះទៀតបានជម្រុះកម្មករ ដែលផុតកិច្ចសន្យាការងារនៅប៉ុន្មានខែកន្លងមកនេះ។ ការកាត់បន្ថយថ្ងៃធ្វើការ និងការថែមម៉ោងនេះ កំពុងក្លាយជាបញ្ហាប្រឈមសម្រាប់កម្មករកម្មការិនីនៅតាមរោងចក្រទាំងនេះ ដ្បិតវាបានធ្វើឲ្យប៉ះពាល់ដល់ការចំណាយ និងជីវភាពរស់នៅប្រចាំថ្ងៃរបស់ពួកគេ ស្របពេលតម្លៃទំនិញមួយចំនួនបច្ចុប្បន្នមានការកើនឡើង។
អត្ថបទគួរអាន
ជុំវិញបញ្ហានេះលោក កេន លូ បានវាយតម្លៃថា ការបញ្ជាទិញផលិតទាំងនេះ ពីកម្ពុជាអាចនឹងវិលមករកភាពល្អប្រសើរឡើងវិញនៅក្នុងរយៈពេល៦ខែខាងមុខ ក្រោយរំពឹងថា ក្រុមហ៊ុនបញ្ជាទិញអាចបញ្ចេញទំនិញក្នុងស្តុកអស់ គួបផ្សំបញ្ហាសង្គ្រាមនៅអ៊ុយក្រែនមិនវិវត្តកាន់តែអាក្រក់ ហើយស្ថានភាពអតិផរណានៅសហរដ្ឋអាមេរិក និងសហភាពអឺរ៉ុបមានភាពល្អប្រសើរ។ ប៉ុន្តែក្នុងករណីសង្គ្រាមនៅអ៊ុយក្រែនបន្តដាក់បន្ទុកលើកម្រិតអតិផរណារបស់សហរដ្ឋអាមេរិក និងសហភាពអឺរ៉ុប ដែលជាទីផ្សារនាំចេញដ៏ធំរបស់កម្ពុជា ការធ្លាក់ចុះការបញ្ហាទិញនឹងបន្តអូសបន្លាយបន្ថែមទៀត។ នេះបើតាមការអះអាងរបស់លោក កេន លូ។
ក្នុងកាលៈទេសៈដ៏លំបាកនេះ លោក កេន លូ ស្នើឲ្យភាគីនិយោជក និងនិយោជិតសហការ និងយោគយល់គ្នាទៅវិញទៅមកតាមរយៈរកចំណុចរួមមួយក្នុងការផ្តល់ប្រាក់ឈ្នួលឲ្យស្របតាមផលិតភាពការងារ ដ្បិតលោកយល់ថា ក្នុងកាលៈទេសៈដ៏លំបាកនេះមិនអាចដាក់បន្ទុកឲ្យភាគីម្ខាងទទួលខុសត្រូវដោយឯកឯងនោះទេ។ លោកជឿជាក់ថា ទាំងនិយោជក និងនិយោជិតនឹងអាចឆ្លងផុតពេលវេលាដ៏លំបាកនេះ ប្រសិនបើភាគីទាំងពីរមានការសហការ និងយោគយល់គ្នាលើបញ្ហាប្រាក់ឈ្នួល និងការធ្វើការងារ៕
