យ៉ាងណាក៏ដោយ មន្ត្រីរបស់សេតវិមានបានចេញមកបកស្រាយថា សំដីរបស់លោកបៃឌិន គឺចង់សំដៅដល់ការរៀបចំលទ្ធិប្រជាធិបតេយ្យរបស់ពិភពលោកឲ្យរឹងមាំជាងនេះ ដើម្បីយកឈ្នះពួកផ្តាច់ការ និងជាពិសេសសម្រាប់ដោះស្រាយជម្លោះដែលអូសបន្លាយលើអ៊ុយក្រែន ហើយលោកបៃឌិន ក៏មិនបានគាំទ្រដល់ការផ្លាស់ប្តូររបបនៅក្នុងប្រទេសរុស្ស៊ីនោះដែរ។
នេះមិនមែនជាការនិយាយតែមួយមុខរបស់លោក ចូ បៃឌិន នោះទេ។ នៅក្នុងសុន្ទរកថាដដែល ក្នុងប្រទេសប៉ូឡូញ លោកថែមទាំងបានហៅលោក ពូទីនថាជាឃាតករថែមទៀត តាមរយៈការឈ្លានពានដ៏បង្ហូរឈាមក្នុងប្រទេសអ៊ុយក្រែន។
ប្រមុខដឹកនាំក្រុងវ៉ាស៊ីនតោនរូបនេះ បានជំរុញឱ្យកិច្ចខិតខំប្រឹងប្រែងបន្ថែម ដើម្បីកសាងលទ្ធិប្រជាធិបតេយ្យរបស់ពិភពលោក ដើម្បីប្រឈមមុខនឹងប្រទេសរុស្សីដែលលោកបានហៅថា ផ្តាច់ការ និងដែលជាការគំរាមកំហែងដល់សន្តិសុខ និងសេរីភាពពិភពលោក។
យ៉ាងណាក៏ដោយ ការដែលលោកចូ បៃឌិន និយាយថាមិនអាចបន្តឲ្យលោកពូទីនកាន់អំណាច បានទៀតនោះ គឺមិនបានសំដៅលើការដែលអាមេរិក ទៅផ្តួលរំលំរបបលោកពូទីននោះទេ។ មន្ត្រីនៃសេតវិមាន បានចេញមុខមកបកស្រាយនៅចុងបញ្ចប់នៃសុន្ទរកថារបស់លោក បៃឌិនថា ទីក្រុងវ៉ាស៊ីនតោនមិនគាំទ្រឲ្យមានការផ្លាស់ប្តូររបបនៅរុស្ស៊ីនោះទេ។ ចំណុចរបស់លោកប្រធានាធិបតីបៃឌិនបាននិយាយនោះ គឺមានន័យថា លោកពូទីនមិនអាចត្រូវបានអនុញ្ញាតឲ្យប្រើអំណាច ឈ្លានពានលើប្រទេសជិតខាង ឬក្នុងតំបន់បានស្រេចចិត្តឡើយ។
បន្ថែមពីលើនេះ សហរដ្ឋអាមេរិកបានបញ្ជាក់ជាថ្មីថា ខ្លួននឹងនៅតែមិនបញ្ជូនយោធាដោយផ្ទាល់ទៅអន្តរគមន៍ក្នុងសង្គ្រាមនៅអ៊ុយក្រែននោះទេ ប៉ុន្តែទីក្រុងវ៉ាស៊ិនតោននឹងបន្តផ្តល់ជំនួយជានិច្ចដល់អ៊ុយក្រែន។
ជុំវិញបញ្ហានេះ វិមានក្រឹមឡាំង បានទាត់ចោលការលើកឡើងរបស់ប្រធានាធិបតីអាមេរិកលោក ចូ បៃឌិន កាលពីថ្ងៃសៅរ៍ដែលថា លោកពូទីន មិនអាចបន្តកាន់អំណាចបានទេ ដោយបានឆ្លើយតបវិញថា អ្នកណាកាន់អំណាចនៅរុស្ស៊ីមិនជាប់ពាក់ព័ន្ធនឹងអាមេរិកឡើយ វាអាស្រ័យលើជនជាតិរុស្ស៊ីក្នុងការជ្រើសរើសប្រធានាធិបតីរបស់ពួកគេ។
អត្ថបទគួរអាន
អ្នកនាំពាក្យវិមានក្រឹមឡាំង លោក Dmitry Peskov បានប្រាប់រ៉យទ័រថា វាមិនមែនសម្រាប់លោក បៃឌិន ក្នុងការសម្រេចចិត្តនោះទេ។ ប្រធានាធិបតីរុស្ស៊ីត្រូវបានជ្រើសរើសដោយប្រជាជនរុស្ស៊ី។យ៉ាងណាមិញ អ្នកនាំពាក្យរូបនេះ មិនបានឆ្លើយតបទៅនឹងការបកស្រាយរបស់មន្ត្រីសេតវិមានឡើយ។
គួរជម្រាបថា លោកបៃឌិន បានបង្កើនការវាយប្រហារជាពាក្យសំដីខ្លាំងៗមែនទែន ទៅលើលោក ពូទីន ចាប់តាំងពីប្រធានាធិបតីរុស្ស៊ីរូបនេះ បានបញ្ជាឱ្យមានការឈ្លានពានអ៊ុយក្រែនកាលពីខែមុន។ ជាក់ស្តែង កាលពីសប្តាហ៍មុន ក្រឹមឡាំង បានចោទប្រកាន់លោក បៃឌិន ថាបានប្រមាថចំពោះលោកពូទីន បន្ទាប់ពីលោកបៃឌិន ហៅលោកពូទីន ថាជាឧក្រិដ្ឋជនសង្គ្រាម និងជា ឃាតករផ្តាច់ការ។
សូមជម្រាបថា គ្រាប់រ៉ុក្កែតបានវាយប្រហារទីក្រុងល្វីវ ភាគខាងលិចរបស់អ៊ុយក្រែនកាលពីថ្ងៃសៅរ៍ ស្របពេលដែលប្រធានាធិបតីសហរដ្ឋអាមេរិកកំពុងថ្លែងសារនៅប៉ូឡូញរិះគន់រុស្ស៊ី។ ការប្រយុទ្ធគ្នាយ៉ាងខ្លាំងក្លានៅតែផ្ទុះឡើងនៅក្នុងតំបន់ជាច្រើននៃប្រទេសអ៊ុយក្រែន ដែលវាសបញ្ជាក់ឲ្យឃើញថា វាមិនមានការបន្ធូរបន្ថយការប្រយុទ្ធឡើយ នៅក្នុងសង្គ្រាមដែលបានអូសបន្លាយអស់ពេលមួយខែហើយក្តី។
ប្រធានាធិបតីអ៊ុយក្រែន លោក ហ្សេឡេនស្គី នៅចុងក្រោយនេះ បាននិយាយទៅកាន់ប្រទេសលោកខាងលិចថា បើពួកគេខ្លាចអំណាចរុស្ស៊ីមិនហ៊ានតទល់នឹងរុស្ស៊ីទល់មុខក៏ហីទៅចុះ តែសូមផ្ដល់អាវុធមកឲ្យអ៊ុយក្រែនបន្ថែមទៀតដើម្បីទប់ទល់នឹងរុស្ស៊ី។ លោក ហ្សេឡេនស្គី ធ្លាប់បានអះអាងរួចហើយថា អ៊ុយក្រែននឹងប្រយុទ្ធជាមួយរុស្ស៊ីដល់ទីបញ្ចប់ រហូតដល់ដង្ហើមចុងក្រោយ៕
None
