ចក្រភពអង់គ្លេស និងបណ្តាប្រទេសលោកខាងលិចផ្សេងទៀត កំពុងប្រើប្រាស់ទណ្ឌកម្មសេដ្ឋកិច្ច ដើម្បីបង្ខូចសេដ្ឋកិច្ចរុស្ស៊ី និងដាក់ទណ្ឌកម្មលើប្រធានាធិបតី វ្ល៉ាឌីមៀ ពូទីន ចំពោះការឈ្លានពានលើអ៊ុយក្រែន ដោយស្វែងរកការជំរុញឱ្យលោកពូទីនបោះបង់ចោលនូវអ្វីដែលក្រុងម៉ូស្គូហៅថា ប្រតិបត្តិការយោធាពិសេសទៅលើអ៊ុយក្រែន។ ដូច្នេះបើរុស្ស៊ីមិនចង់ប្រឈមមុននឹងការដាក់ទណ្ឌកម្មជាទ្វេដងបន្ថែមទៀតទេ លុះត្រាតែរុស្ស៊ីត្រូវប្រាកដថា នឹងមិនឈ្លានពានអ៊ុយក្រែនបន្ត ឬត្រូវបញ្ឈប់ការឈ្លានពានរបស់ខ្លួន។
នៅក្នុងបទសម្ភាសន៍ជាមួយសារព័ត៌មាន Telegraph រដ្ឋមន្ត្រីការបរទេសអង់គ្លេសលោកស្រី Liz Truss បានលើកឡើងពីលទ្ធភាពដែលវិធានការអាចបញ្ចប់បាន ប្រសិនបើទីក្រុងម៉ូស្គូផ្លាស់ប្តូរយុទ្ធសាស្ត្ររបស់ខ្លួន ខណៈកន្លងមករុស្ស៊ីបានត្រឹមតែចុះហត្ថលេខាលើកិច្ចព្រមព្រៀងជាច្រើនប៉ុណ្ណោះ ប៉ុន្តែពួកគេមិនបានគោរពតាមនោះទេ។ ដូច្នេះហើយ ទើបលោកខាងលិច រួមទាំងអង់គ្លេសចាំបាច់ត្រូវតែមានវិធានការដ៏តឹងរ៉ឹង។
អត្ថបទគួរអាន
រដ្ឋាភិបាលអង់គ្លេសបានឱ្យដឹងថា រហូតមកដល់ពេលនេះ ខ្លួនបានដាក់ទណ្ឌកម្មលើធនាគាររុស្ស៊ី ដែលមានទ្រព្យសម្បត្តិសរុបជាង ៦៥៨ ពាន់លានដុល្លារ និងក្រុមអ្នកជំនួយធំៗ ព្រមទាំងសមាជិកគ្រួសារដែលមានទ្រព្យសម្បត្តិសរុបជិត ២០០ពាន់លានដុល្លារ។
ជាមួយគ្នានេះ លោកស្រី Truss ក៏បានគូសបញ្ជាក់ដែរថា វិបត្តិនេះបាននាំឱ្យចក្រភពអង់គ្លេស និងសហភាពអឺរ៉ុបកាន់តែខិតជិតគ្នាជាងមុន បន្ទាប់ពីទំនាក់ទំនងកាន់តែរកាំរកុស ក្រោយអង់គ្លេសចាកចេញពីសហភាពអឺរ៉ុប៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
