យោងតាមសារព័ត៌មាន South China Morning Post ហាងលក់កាំភ្លើងនិងគ្រាប់រំសេវនៅទូទាំងសហរដ្ឋអាមេរិក កាលពីខែមុន បានរាយការណ៍អំពីកំណើននៃការលក់កាំភ្លើងនិងគ្រាប់។ ហាងលក់កាំភ្លើង ឈ្មោះ ammo.com បានរាយការណ៍អំពីកំណើនលក់ដល់ទៅ ២៧៦% កាលពីថ្ងៃទី១០ មីនា ខណៈដែលករណីឆ្លងវីរុសកូវីដ១៩ បានកើនឡើងនៅក្នុងសហរដ្ឋអាមេរិក។ ទន្ទឹមនឹងនេះ សារព័ត៌មានក្នុងស្រុករបស់អាមេរិក ក៏បានរាយការណ៍ផងដែរ អំពីការតម្រង់ជួរគ្នាវែងៗនៃអតិថិជនដែលសម្រុកទិញកាំភ្លើងនៅខាងក្រៅហាងលក់កាំភ្លើង។
នៅរដ្ឋកាលីហ្វ័រញ៉ា និងវ៉ាស៊ីងតុន ដែលមានករណីផ្ទុះរាតត្បាតនៃវីរុសកូវីដ១៩មុនដំបូងគេ អតិថិជនដែលផ្អើលទិញកាំភ្លើង គឺជាពលរដ្ឋអាមេរិកាំងដើមកំណើតអាស៊ី ដែលភ័យព្រួយពីសុវត្ថិភាពរបស់ពួកគេ។ ដោយសារវីរុសកូវីដ១៩ ត្រូវបានរាយការណ៍ថា រាតត្បាតដំបូងគេនៅទីក្រុងវូហាន ប្រទេសចិន ជាហេតុនាំឲ្យមានករណីខ្លាច ឬស្អប់ជនជាតិចិន នៅផ្នែកខ្លះនៃសហរដ្ឋអាមេរិក និងនៅជុំវិញពិភពលោក។
អត្ថបទទាក់ទង
ការវាយប្រហារលើជនជាតិអាស៊ី ត្រូវបានរាយការណ៍ថា បានកើតឡើងនៅក្នុងទីក្រុងឡូសអ៊ែនជេឡេស, សាន់ហ្វ្រាន់ស៊ីស្កូ, ញូវយ៉ក និងទីក្រុងនានានៅជុំវិញពិភពលោក ចាប់តាំងពីការផ្ទុះឡើងនៃវីរុសដ៏រាតត្បាត កូវីដ១៩នេះ។
យោងតាមសារព័ត៌មាន South China Morning Post, ហេតុផលសំខាន់ដែលនាំឲ្យពលរដ្ឋអាមេរិកាំងដើមកំណើតអាស៊ីនាំគ្នាផ្អើលទិញកាំភ្លើង គឺដើម្បីការពារខ្លួន ដោយអ្នកខ្លះដែលបានផ្ដល់សម្ភាសន៍បានរៀបរាប់ពីហេតុការណ៍លួច និងកុបកម្មកាលពីអតីតកាល រួមផ្សំនឹងការភ័យបារម្ភពីការវាយប្រហារ ដោយសារការរើសអើងទាក់ទងនឹងវីរុសកូវីដនេះផង។
បើតាមការឲ្យដឹងពីម្ចាស់ហាងលក់កាំភ្លើងមួយរូប កាលមុន ភ្ញៀវរបស់គាត់ភាគច្រើនជាអន្តោប្រវេសន៍ចិនមកពីចិនដីគោក ប៉ុន្តែ ឥឡូវនេះ អ្នកទិញក៏រួមមានពលរដ្ឋអាមេរិកាំងដើមកំណើតវៀតណាម ហ្វ៊ីលីពីន និងជប៉ុន ផងដែរ៕
